HOT STORIES OF THE WEEK

Aarangkada na ngayong araw ang dagdag-bawas sa presyo ng mga kumpaniya ng langis sa bansa.

Ayon sa Pilipinas Shell, Cleanfuel at Petro Gazz, epektibo na kaninang alas-6 ng umaga ang singil sa produktong petrolyo kung saan, maglalaro sa P3.95 centavos ang taas singil sa kada litro ng gasolina.

Magtatapyas naman ng P2.45 centavos sa kada litro ng kerosene habang P2.30 centavos naman ang magiging bawas-singil sa kada litro ng diesel.

Ayon sa Department of Energy (DOE), ang adjustments o pabago-bagong presyo ng langis sa bansa ay bunsod pa rin ng paggalaw sa pandaigdigang merkado at bakbakan sa pagitan ng Russia at Ukraine.

Natunton na sa Negros Oriental ang unang kaso ng Omicron subvariant na BA.4 sa bansa.

Kinumpirma ng Negros Oriental Provincial Health Office na naitala sa bayan ng Dauin ang kaso ng BA.4 na kabilang sa variant of concern.

Ayon kay assistant provincial health officer, Dr. Liland Estacion, magaling na ang pasyente bago pa man dumating sa probinsya.

Ang nasabing pasyente na isang seafarer at dalawang linggong sumailalim sa quarantine sa isang hotel sa Metro Manila, subalit hindi naman binanggit ni Estacion kung kailan.

May 4 nang dumating sa bansa ang Pinoy seafarer mula middle east.

Samantala, sumailalim na ang balikbayan at pamilya nito sa swab test habang sinusuri na sa laboratoryo ang kanilang specimens.

Pinangalanan na ni presumptive president Ferdinand “Bongbong” Marcos Jr. ang ilan sa kaniyang Cabinet nominees.

Ayon kay Marcos, tinanggap na ni Cavite Representative Crispin “Boying” Remulla ang kaniyang alok na maging Secretary ng Department of Justice.

Si Economist Arsenio Balisacan naman ang inalok ni BBM na maging Chairman ng National Economic Development Authority.

Samantala, tinanggap na rin nina Bienvenido Laguesma na pamunuan ang Department of Labor and Employment habang si Susan “Toots” Ople sa Department for Migrant Workers.

Una na ring tinanggap nina Atty. Vic Rodriguez ang alok ni Marcos na maging susunod na Executive Secretary ng administrasyon at si dating MMDA chair Banhur Abalos bilang DILG Chief.

Si presumptive vice president Sara Duterte-Carpio naman ang magiging bagong kalihim ng Department of Education (DepEd).

Makatatanggap ng dagdag 2,000 pesos honararia ang bawat poll worker na nag-overtime sa May 9 elections matapos ang mga naranasang delay at aberya sa mga Vote Counting Machine (VCM).

Ayon kay commissioner George Garcia, ang dagdag-bayad ay ibibigay sa mga poll worker sa 2,308 polling precincts na nakaranas ng aberya sa mga VCM at SD card.

Humingi naman ng paumanhin si Garcia sa mga guro dahil hindi maibigay ng Comelec ang halagang hinihingi ng Department of Education para sa dagdag kompensasyon.

Aabot sa 647,812 na DepEd personnel ang nagsilbi sa May 9 elections.

Wala pang hawak na ebidensiya ang World Health Organization (WHO) kung nag-mutate na ang monkeypox virus.

Ayon kay Rosamund Lewis, isang opisyal mula sa WHO Emergencies Programme, kontrolado na ang pagkalat ng monkeypox lalo na sa Europe at north america.

Kung mayroon nang mutation, naniniwala si Lewis na pinabababa na nito ang pagkalat ng virus na matutukoy sa pamamagitan ng genome sequencing.

Bagaman hindi karaniwang kumakalat sa tao ang monkeypox, maililipat pa rin ito sa pamamagitan ng pagtatalik o close-to-person contact at paggamit ng kagamitang pagmamay-ari ng mayroong monkeypox.

Ilan sa mga bansang mayroon nang monkeypox virus ang Australia, Canada, France, Germany, Portugal, Spain, U.S.A at Sweden.

Mag a-update na ang Social Security System (SSS) ng contact information ng kanilang mga miyembro.

Ito’y matapos muling buksan ng SSS ang online updating ng records sa My.SSS portal.

Ayon kay SSS president at chief executive officer Michael Regina, maaari nang baguhin ng SSS members ang kanilang contact details tulad ng telephone number, mobile number, mailing address, foreign address at e-mail address, nang hindi na kailangan magpunta sa SSS branch o via Online.

Pero kung walang rehistradong mobile number, kailangang magtungo ng miyembro sa SSS at isumite ang mobile number sa pamamagitan ng Member data change request form at mag-set ng appointment sa pamamagitan ng kanilang My.SSS account.

Noong Agosto a-3 2021, sinuspinde ng SSS ang online updating ng contact details para bigyang-daan ang upgrade sa Online portal.

Tumaas na ang presyo ng imported na bigas sa mga pamilihan sa bansa.

Ayon kay Rosendo So, chairman ng Samahang Industriya ng Agrikultura (SINAG), dahil ito sa price hike ng bigas sa International Market na $50 na kada metriko tonelada.

Bahagya namang bumaba ang presyo ng lokal na bigas na nasa P38 hanggang P40 kada kilo.

Bukod sa bigas, tumaas din ang presyo ng gulay sa bansa maging ang transportation cost nito.

Inaasahan naman ang pagsipa ng presyo ng isda na karaniwan tuwing tag-ulan.

Ligtas at epektibo para sa mga edad anim na buwan hanggang limang taon ang tatlong doses ng Pfizer-Biontech vaccines.

Sinabi ito ng US Food and Drug Administration kasabay ng pinaplanong pulong para pag-usapan kung papayagan na ring mabakunahan ang mga natitirang underage group na hindi pa eligible sa bakuna.

Ayon kay Pfizer CEO Albert Bourla, batay sa kanilang ginawang Clinical trial, lumabas na 80.3% na epektibo ang tatlong doses na 3 micrograms kada turok.

Bagaman mayroong side effects, tiniyak ni Bourla na kaparehas lang ito ng iba pang bakuna.

Umaasa naman ang Pfizer official na makukumpleto na ang pag-aaral upang maturukan na rin ng bakuna ang mga anim na taon hanggang limang buwang gulang.