HOT STORIES OF THE WEEK

Aprubado na ng Regional Tripartite Wages and Productivity Board (RTWPB) ang P55 na dagdag-sahod para sa mga minimum wage earner sa Region 5.

Ayon sa Department of Labor and Employment, hahatiin sa dalawang tranche ang P55 na umento sa sahod sa rehiyon.

Unang ibibigay ang P35, oras na maging epektibo ang kautusan habang sa December 1, 2022 ipatutupad ang dagdag pang P20.

Dahil sa kautusan, aabot na sa P365 ang minimum wage rate sa Bicol.

Maliban sa wage hike, inaprubahan din ng Wage Board ang 1K hanggang 1, 500 na dagdag sahod ng domestic worker sa rehiyon kaya aabot na sa 4K ang kanilang buwanang sahod.

Tuloy ang paghahanda ng Commission on Elections (COMELEC) para sa Barangay at SK elections sa kabila ng planong ipagpaliban ito.

Ayon kay COMELEC commissioner George Garcia, hindi totoo ang balita na nagamit na ng poll body ang lahat ng pondo para sa Barangay at SK elections sa Disyembre.

Sa katunayan, wala pa aniya silang natatanggap ng pondo mula sa Department of Budget and Management (DBM).

Tiniyak naman ng poll official na hindi magagalaw ang pondong ibibigay ng DBM sakaling ipagpaliban ang Barangay elections.

Sa Hunyo o Hulyo inaasahan ang muling pag-uumpisa ng voter’s registration.

Nilinaw ng Commission on Elections (COMELEC) na wala nang pakinabang ang natagpuang election-related documents sa bakanteng lote sa Amadeo, Cavite.

Ayon kay COMELEC commissioner George Garcia, basura na ang mga balota at election paraphernalia na nakasilid sa itim na kahon.

Gayunman, itutuloy pa rin ng COMELEC ang imbestigasyon para hindi mabalik sa kanila ang sisi.

Unang kumalat sa Facebook ang video at larawan ng mga black box sa Cavite na naglalaman ng Election Returns, ink, stamp pads, secrect folders at iba pang gamit sa halalan.

Kasado na ngayong araw ang idaraos na special elections sa 12 barangay sa Bayan ng Tubaran, Lanao del Sur.

Ayon kay Teofisto Elnas, Deputy Executive Director for Operations ng Commission on Elections, 6, 921 rehistradong botante ang lalahok sa special polls.

Nakadeploy na rin ang Contingency Vote Counting Machines at SD cards sakaling magkaroon ng aberya.

Samantala, aabot sa 60 pulis ang idineploy sa lalawigan upang magsilbing Special Board of Election Inspectors.

Nagpulong naman ang AFP, PNP, Field Operations Group ng Project Management Office at Gun ban and Security Concerns Committee para sa security plan sa halalan.

MAGKAKASUNOD na nag-courtesy call kay incoming President Ferdinand ‘Bongbong’ Marcos, Jr., ang apat na diplomats mula sa bansang Amerika, Japan, South Korea at India sa BBM Headquarters sa Mandaluyong City ngayong Lunes ng umaga.

Unang bumisita kay Marcos si Japanese Ambassador to the Philippines Kazuhiko Koshikawa dakong alas-9:00 ng umaga, kasunod si South Korean Ambassador Kim Inchul na dumating ganap na alas-10:00 ng umaga.

Bandang alas-11:00 ng umaga ay nagbigay -pugay din kay Marcos si Indian Ambassador Shambhu S. Kumaran, kasunod si US Chargé d’Affaires Heather Variava na dumating bago mag-alas-12:00 ng tanghali.

Sa pakikipagpulong kay Marcos, tiniyak ng mga envoy ang pagpapalakas sa ugnayan sa ‘trade and diplomacy’ ng kani-kanilang bansa sa Pilipinas, gayundin ang iisang layunin sa pagsusulong ng matatag na demokrasya, ‘self-determination,’ at ‘economic recovery.’

“We were able to discuss many of the things that how are we going to handle the next few years in terms of the relationship of our countries,” ani Marcos sa press conference matapos ang serye ng pakikipagpulong sa mga diplomats.

Tiniyak aniya ng apat na diplomat ang kahandaan nilang magbigay ng tulong sa Pilipinas, partikular sa mga programa may kaugnayan sa pagbangon ng ekonomiya na pinalugmok ng pandemya.

“Ang lagi ko lang pinapaalala sa kanila sinasabi ko palagay ko sa pandemyang ito ang recovery ng lahat natin ay hindi kakayanin ng kahit na isang bansa kahit na gaano kayaman kailangan the partnership will be the one that will bring us to keep the global economy as stable as possible,” sabi pa ni Marcos.

“As you know, nakakatanggap na ako ng mga congratulatory messages from heads of states nakausap ko na sila, ang unang nakatawag sa amin ay si US President Joe Biden, and Chinese President Xi,” dagdag pa ni Marcos.

“Also, Japanese Prime Minister Kishida, I even spoke with the outgoing Prime Minister of Australia, PM Morrison who had just went through an election. So, marami na talagang nangyayari, we’re already being recognized, This new administration is being recognized mukha namang wala ng problema sa recognition. Maybe the comfortable margin that we enjoy during the election has a part to play with that,” wika pa niya.

“We’ve been having excellent progress for the past few years, and we look forward to continuing the progress that in the relevance under the new administration,” sabi naman ni Indian Ambassador Kumaran.

Maliban sa Indian ambassador, ang tatlo pang diplomat ay tumanggi nang magpa-interview sa mga mamamahayag.

Sa kanyang panig, siniguro ni Marcos na ang Pilipinas ay nananatiling kaibigan, ka-partner at kaalyado ng apat na bansa.

Si Marcos, ang kauna-unahang majority president simula noong 1986,  ay nanalo via landslide sa nakuhang 31 milyon boto nitong nakalipas na  May 9 national elections.

Nauna nang nagpahayag ng suporta at pagbati sa paparating na Marcos administration ang mga ‘powerful leaders’ ng bansang US, China, Russia, Japan, South Korea at mga pinuno ng European Union.

Pinuri rin ng mga ito ang pagkakaroon ng malinis, maayos at mapayapang eleksiyon ng Pilipinas.

Pito ang nasawi habang mahigit 100 ang nasagip ng mga otoridad sa nasunog na pampasaherong bangka sa Polillio Island.

Ipinabatid ni Philippine Coast Guard (PCG) Spokesman Commodore Armand Balilo, na lima sa mga nasawi ay lalaki at dalawa ay babae samantalang 26 ang isinugod sa pinakamalapit na ospital.

Ayon sa local government unit ng Polillio, ang Merchant 2 boat ay umalis ng isla, alas-5 ng madaling araw kanina at patungong Real, Quezon.

Alas-6 ng umaga nang magbigay ng abandon ship command ang kapitan ng bangka nang magsimula ang sunog na kinumpirmang under control mag-a-alas-10 ng umaga.

Nasa 124 passengers ang sakay ng Merchant 2, base sa Manifesto bagamat inihayag ni Polillio Mayor Cristina Bosque na ilang pasahero ang wala sa Manifesto.

Nai-tow o nahila naman ang nasabing bangka sa pampang na sakop ng Baluti Island, Barangay Cawayan sa bayan ng Real. —sa ulat ni Aya Yupangco (Patrol 5) at Bert Mozo (Patrol 3)

Dapat na gawin sa tamang lugar o venue ang mga planong programa o rally habang isasagawa ng Kongreso ang canvassing ng mga boto para sa presidente at bise presidente.

Ito ang sinabi ni Philippine National Police (PNP) Officer-In-Charge, Lieutenant General Vicente Danao Jr. na kung saan patuloy niyang pinapaalalahanan ang mga tauhan ng ahensya na ipatupad ang maximum tolerance sa pagharap sa mga magrarally.

Umapela rin si Danao sa mga sasama sa rally na maging kalmado at iwasan ang pagdaos ng programa sa mga ipinagbabawal na lugar lalo na sa canvassing area.

Bukas, inaasahang magsisimula ang canvassing sa Batasang Pambansa Complex sa Quezon City para sa naturang posisyon sa 2022 Polls.

Dapat i-isolate ang mga dayuhang mula sa ibang bansa na magpapakita ng sintomas ng ‘Monkeypox’ para maiwasan ang posibleng pagkalat nito.

Ito ang sinabi ni infectious disease expert Dr. Rontgene Solante, na kailangang bantayan ang mga turista na papasok sa Pilipinas mula sa bansa na mayroong naitalang kaso ng Monkeypox.

Dagdag niya na dapat agad na i-report sa Department of Health (DOH) ang mga dayuhan sakaling makaramdam ito ng mga sintomas tulad ng lagnat, kulani o lymph nodes, rashes, hirap sa paghinga, joint pain at iba pa.

Binigyang-diin pa ni Solante na mataas ang hawaan ng sakit na Monkeypox sa pamamagitan ng direct contact o respiratory droplets sa pakikipag-usap kaya hinikayat nito ang publiko na patuloy na magsuot ng face masks at palaging maghugas ng kamay para sa proteksyon.

Pinaghahandaan na ng Philippine National Police (PNP) ang inagurasyon ng bagong upong presidente at bise presidente.

Inaasahan ng PNP na marami ang dadalo kaya planong ihiwalay ang naturang inagurasyon ni presumptive president Bongbong Marcos at presumptive vice president Sara Duterte-Carpio.

Planong ikasa sa June 19 ang inagurasyon para kay Inday Sara upang makasama ang kaniyang Ama na si Pangulong Rodrigo Duterte.

Isasagawa naman sa June 30, ang inagurasyon para kay BBM alinsunod sa nakasaad sa konstitusyon.

Tiniyak naman ng PNP na magiging mapayapa ang pagdaraos ng nasabing aktibidad maging ang pagkakaroon ng maayos na pagsasalin ng kapangyarihan sa susunod na administrasyon.

Sinisilip na ng Commission on Elections (COMELEC) ang mga kasong kanilang natatanggap hinggil sa vote buying sa ibat-ibang lugar sa bansa.

Ito ay matapos ilabas ang partial report ng International Observers Mission (IOM) na hindi umano naging patas o walang pagkakapantay- pantay ang naganap na botohan.

Iginiit ng IOM na nagkaroon ng malawakang vote buying o pagbebenta at pagbili ng boto, Red tagging at ibat-ibang uri ng karahasan noong May 9 elections.

Nabatid na umabot na sa mahigit 9K reklamo ang natanggap ng Task Force Kontra Daya kung saan, mahigit 2K dito ang reklamo ng aberya kabilang na diyan ang mga VCM at SD cards.

Ayon kay Commissioner George Garcia, hindi nila kinikilala ang opiniyon ng IOM dahil hindi umano ito nag apply ng accreditation base narin sa rules ng kanilang ahensya.

Sa kabila nito, iginiit ni Garcia na welcome naman ang mga puna, komento at reklamo, kaugnay sa katatapos lamang na halalan dahil bahagi ito ng kanilang serbisyo sa bansa.