HOT STORIES OF THE WEEK

Pursigido ang mga kongresista na isulong sa 19th Congress ang BBM Bill o ang tinatawag na Bayan Bangon Muli sa ilalim ng bagong administrasyon ni presumptive president Ferdinand “Bongbong” Marcos, Jr.

Ayon kay House Majority Leader Martin Romualdez, makakatulong ang naturang panukala upang muling makabangon ang bansa mula sa pandemiya.

Sinabi ni Romualdez na gagamitin ng bagong administrasyon ang natitirang resources para pasiglahin at palakasin ang ekonomiya ng Pilipinas.

Sa naging pahayag naman ni House Ways and Means Committee chairman Joey Salceda, ang BBM Bill ay magkakaloob ng special powers para sa susunod na Pangulo upang magkaroon ng “flexibility” sa paggamit ng 2022 budget, partikular na sa pagtugon sa pandemya.

Asahan na bukas, Martes, ang dagdag-bawas sa presyo ng produktong petrolyo.

Ayon sa ilang kumpaniya ng langis, maglalaro sa P2 hanggang P3 ang rollback sa kada litro ng diesel at kerosene.

Magkakaroon naman ng pagtaas sa presyo na P4.40 centavos sa kada litro naman ng gasolina.

Ayon sa Department of Energy, ang adjustment sa presyo ng mga langis sa bansa ay bunsod pa rin ng paggalaw sa pandaigdigang merkado at bakbakan sa pagitan ng Russia at Ukraine.

Bahagyang tumaas ang COVID-19 positivity rate sa Pilipinas ngayong linggo.

Batay sa datos ng Department of Health, umakyat sa 1.11% ang bilang nang nagpositibo sa bansa mula Mayo a-15 hanggang 21 kumpara sa 1.06% noong nakalipas na linggo.

Bahagya namang bumaba sa 191 ang naitalang bagong kaso kumpara sa 246 na naitala noong Sabado.

Sa bilang ng bagong kaso, 55 ay mula sa Metro Manila.

Samantala, umakyat na sa 3, 688, 941 na ang COVID-19 cases sa Pilipinas kabilang ang 3, 626, 234 recoveries.

Wala namang nadagdag sa bilang ng mga nasawi na nananatili sa 60, 455.

Nahaharap sa Disqualification case ang ilang nagwaging kandidato sa lokal na posisyon noong May 9 elections dahil sa pagkakasangkot umano sa vote buying at iba pang election offense.

Tumanggi na munang pangalanan ni Comelec commissioner George Garcia ang mga kandidato.

Bagaman maaaring umupo sa pwesto ang winning candidate, agad anya silang tatanggalin sa sandaling mapatunayan ang akusasyon.

Hanggang Mayo 19, 933 reklamo na ang ipinarating sa pamamagitan ng Facebook ang natanggap ng Comelec Task Force Kontra Bigay habang 88 ang mula sa E-mail.

Sa 73 reports naman na nakarating sa Comelec Law Department, 50 na ang naresolba na.

Balik-sesyon na ang Senado at Kamara upang bigyang daan ang pagbibilang ng mga boto sa pagka-presidente at bise presidente.

Alinsunod sa 1987 constitution, magsasagawa ng joint session ang dalawang kapulungan ng kongreso sa House Plenary Hall upang mag-Convene bilang National Board of Canvassers na magbibilang ng boto para sa mananalong presidente at bise-presidente.

Ayon kay House speaker Lord Allan Velasco, inaasahang sisimulan bukas ang canvassing ng mga boto.

Gayunman, kung maglalabas ng Temporary Restraining Order ang Korte Suprema matapos ang petisyon ng grupo ni  Fr. Christian Buenafe na humihiling na pigilan ang kongreso na mag-Convene at bilangin ang boto ni BBM.

Una nang sinabi ni House secretary General Mark Llandro Mendoza na magsisimula sa Mayo 24 ang canvassing, alas-2 ng hapon na tatagal hanggang alas-10 na gabi sa Mayo 27.

Samantala, posibleng sa Biyernes o Sabado, Mayo 28 iproklama ang mananalo sa pambansang posisyon bago mag-adjourn ang kongreso sa Hunyo a-3.

Bibigyang prayoridad ng Department of Foreign Affairs (DFA) ang mga Pilipinong Muslim na magsasagawa ng Hajj pilgrimage sa banal na siyudad ng Mecca sa Saudi Arabia.

Ayon sa Twitter ni Foreign Affairs Secretary Teodoro Locsin Jr., sinabi nito na maaari nilang iproseso ang kanilang mga pasaporte sa courtesy lanes ng lahat consular offices sa buong bansa.

Batay naman sa inilabas na abiso  ng DFA, pwedeng mag-walk in ang mga Pilipinong Muslim sa mga tanggapan simula bukas Mayo a-23 hanggang Hunyo a-3.

Kailangan lamang dalhin ng mga ito ang regular na requirements para sa passport issuance, certificate of Muslim Filipino tribal membership na inisyu ng National Commission on Muslim Filipinos (NCMF).

Isasagawa ang Hajj pilgrimage ay gaganapin sa darating na Hulyo.