HOT STORIES OF THE WEEK

Tuluy-tuloy pa rin ang ginagawang mga pagbabakuna ng Primary vaccine at ng Booster dose sa buong bansa.

Sinabi ni Health Undersecretary Myrna Cabotaje, na nananatiling pinangangasiwaan ng mga lokal na pamahalaan ang pagtuturok ng vaccine at ang pagbibigay ng third dose.

Pero pinapayagan narin ani Cabotaje na magturok ng booster dose ang mga drugstore na kasama sa vaccination program at binigyan ng accreditation ng pamahalaan.

Mayroon din aniyang mga workplaces na doon ginagawa ang pagbabakuna ng first Booster shot para sa kanilang sariling mga empleyado.

Kaya naman hindi lamang ani Cabotaje ang mga LGU ang pinahintulutang magturok ng bakuna kundi pati narin iyong private sector.

Maging ang mga private Physicians na may sariling klinika ay puwede naring magbigay ng kanilang first booster jab.

Hindi lamang mandato ng BRP Teresa Magbanua ang pagsasagawa ng Marine environmental protection command na ang layunin ay ipreserba, protektahan at pangalagaan ang mga Marine Environment area ng bansa.

Sa Laging Handa Briefing sinabi ni PCG Rear Admiral Bobby Patrimonio, na matapos ang kanilang aktibidad na ito, ay muli silang magpapatrolya sa West Philippine Sea o sa Benham Rise.

Pahayag ni Patrimonio, kanilang ipagpapatuloy ang pagsasagawa ng sovereign patrol sa ibat ibang isla o lugar sa WPS kasama ang iba pang vessel ng PCG.

Maliban dito, lagi rin aniyang nakahanda ang kanilang mga barko para mag-transport ng mga goods at mga indibidwal sakaling may makaranas ng maritime disaster saan mang bahagi ng karagatan sa Pilipinas.

Hinikayat ng Regional Tripartite Wages and Productivity Board o RTWPB ang mga employer sa Western Visayas na ipatupad na ang bagong minimum wage order na magiging epektibo sa June 5.

Ayon kay Labor and Employment Regional Director at RTWPB chair Sixto Rodriguez Jr., pinagtibay na ng National Wages and Productivity Commission (NWPC) ang wage order sa rehiyon noon pang Mayo 17.

Nakasaad sa wage order na mula sa dating P315 ay magiging P410 na ang minimum wage rate sa agricultural sector sa Western Visayas.

Ang buwanang sahod naman ng mga kasambahay ay magiging P4,500 mula sa dating P4,000.

Samantala, nilinaw ni Rodriguez na maaari pa ring umapela ang mga employer hinggil sa nasabing kautusan.

Humiling ang Department of Agriculture (DA) sa susunod na administrasyon  ng 24 billion pesos na pondo upang matugunan ang nagbabadyang krisis sa pagkain.

Magugunitang nagbabala si DA secretary William Dar na posibleng magkaroon ng food crisis dahil sa nagpapatuloy na giyera sa Ukraine na nakaaantala sa global food supply chain na nakaaapekto naman sa agricultural productivity ng Pilipinas.

Gayunpaman, gagamitin ng ahensya ang naturang pondo para pataasin ang produksyon ng pagkain, pambili ng fertilizer at ibabahaging ayuda para sa mga magsasaka at mangingisda.

Layunin nito na maging abot-kaya ang pagkain gaya ng pangako ni presumptive president Ferdinand “Bongbong” Marcos Jr. na 20 pesos kada kilo ng bigas.

Target din nina Senators Imee Marcos at Chiz Escudero na maging Senate President sa 19th Congress.

Inamin ni Senator-Elect Raffy Tulfo na bukod kina Senate Minority Leader Migz Zubiri at Senator Cynthia Villar, tinawagan din siya ni Marcos upang kausapin hinggil sa senate presidency.

Gayunman, hindi idinetalye ni Tulfo kung gaano kahaba ang naging pag-uusap nila ni Marcos.

Matapos naman anya ang proclamation noong Miyerkules ay nakausap niya si Escudero at kanya itong tinanong kung balak tumakbong Senate President at inamin nitong pag-iisipan pa niya ito.

Una nang ibinunyag ni Senador Sonny Angara na target nina Marcos at Senator-Elect Loren Legarda ang pangalawang puwesto na Senate President Pro Tempore.

Namemeligro umanong magkaroon ng Constitutional Crisis sakaling katigan o pagbigyan ng Korte Suprema ang petisyon na humihiling na pigilan pansamantala ang nakatakdang pag-canvass ng Kongreso sa boto para sa presidential at vice presidential elections.

Ito, ayon kay Senate President Vicente “Tito” Sotto, III, ay dahil pagtapos ng June 3 kapag nag-adjourn sine die na ang sesyon ng Kongreso ay hindi na sila maaaring muling magsesyon.

Kapag nagkataon anya ay maaaring walang mag-canvass ng boto para sa mga tumakbo sa pagka-pangulo at pangalawag  pangulo gayung sa ilalim ng konstitusyon ibinibigay ang mandato sa Kongreso.

Kinuwestyon ni Sotto ano ang mangyayari pagsapit ng July 25 o huling araw ng Lunes sa buwan ng Hulyo sa pagbubukas ng 19th Congress kung walang naproklamang nanalong pangulo at pangalawang pangulo.

Maaaring nangangahulugan anya ito na walang uupong presidente at bise presidente pagsapit ng June 30 kung kailan matatapos ang termino nina Pangulong Rodrigo Duterte at Vice President Leni Robredo.

Tila ipinapanukala din umano ng mga petitioner ay holdover o magpatuloy sa panunungkulan ang mga kasalukuyang naka-upo na maaaring magdulot ng Constitutional Crisis. —sa ulat ni Cely Ortega-Bueno (Patrol 19)

Magsasagawa na rin ng motu propio investigation ang Commission on Human Rights, sa pamamagitan ng kanilang Regional Office sa Region 9 at pakikipag-ugnayan sa Bangsamoro Human Rights Commission, sa pagpatay sa isang transgender student sa Tawi-Tawi.

Ayon kay Mohammad Ghamidi Amilhassan, investigator on case ng Bangsamoro-HRC, pinag-aaralan na nila ang kaso at maaari ring magkaloob ng anumang uri ng tulong ang kanilang tanggapan.

Naniniwala naman ang LGBTIQ community sa naturang lugar na “hate crime” ang nangyari sa biktimang si Khay Abdulgajir.

Inihayag ni Salm Kairo Dumanlag, Executive Director ng Mindanao Pride, may “chilling effect” ang mga ganitong uri ng krimen na naganap sa gitna ng selebrasyon para labanan ang diskriminasyon sa mga trans, bisexual at LGBTIQ community.

Gayunman, hindi naniniwala si Capt. Kuhutan Imlani Junior, Officer-In-Charge ng Bongao Police Station, na hate crime ang motibo sa pamamaslang.

Isang estudyanteng transgender ang brutal na pinatay at natagpuang laslas ang leeg at may mga saksak sa Tawi-Tawi.

Kinilala ang biktimang si Khay Abdulgajir, na nakitang patay sa kalsada noong Mayo 17.

Ayon kay Capt. Kuhutan Imlani Junior, Officer-In-Charge ng Bongao Police Station, kabilang sa anggulong sinisilip ang posibilidad na miyembro rin ng LGBTQ plus ang nasa likod ng krimen.

Batay sa imbestigasyon, sinundo si Abdulgajir ng isang kaibigan noong lunes para sa trabaho bilang event organizer.

Kinabukasan ng madaling araw ay nakita na ang bangkay ng biktima at nawawala ang cellphone.

Kabilang pa anya sa anggulong kanilang tinitingnan ay dahil sa selos at hanap-buhay habang inaalam na ang pagkakakilanlan ng nasa likod ng pamamaslang.

Nagpaliwanag ang National Wages and Productivity Commission (NWPC) kung bakit hindi maaaring magkaroon ng standard minimum rate sa buong bansa.

Sa gitna ito ng mga batikos na hindi sapat ang inaprubahang dagdag-sweldo ng Regional Tripartite Wages and Productivity Boards (RTWPB).

Ayon kay NWPC Executive Director Maria Criselda Sy, may mga kondisyong ikinukonsidera ang Regional Wage Boards sa pagtatakda ng minimum wage ng mga manggagawa.

Una anya ay ang pangangailangan ng mga manggagawa at kanilang pamilya; kapasidad na magbayad ng mga employer at ang economic development lalo’t nasa recovery stage pa rin ang bansa kaya’t maingat ang pagsusuri sa socio-economic situation ng mga rehiyon.

Aminado si Sy na wala sa kanilang kakayahan na magtakda ng standard minimum wage sa buong bansa.

Ipinunto ng opisyal na ang minimum wage policy ay isa lamang sa support police ng gobyerno upang alalayan ang mga low-income earner tulad din ng pagbibigay ng conditional cash transfer, fuel vouchers at libreng sakay.

Magugunitang naglabas na ng wage hike order ang regional wage board sa National Capital Region, Western Visayas, Ilocos, Cagayan Valley at CARAGA.

Sa June 4 na epektibo ang 33 pesos na dagdag sa arawang sahod sa mga minimum wage earner sa NCR habang sa June 5 ipatutupad ang hanggang 110 pesos na increase sa Western Visayas.

Naitala ng Commission on Elections (COMELEC) ang pinakamataas na bilang ng voter turnout para sa 2022 elections.

Ayon kay COMELEC Education and Information Division Director James Jimenez, ito na ang pinakamataas na turn-out sa Automated election history sa bansa na may 83% voters o katumbas ng 55, 549, 791 mula sa kabuuang 65, 745, 512 registered voters na bumoto noong halalan.

Hinangaan naman ni COMELEC chairman Saidamen Pangarungan ang mga Pilipinong matiyagang naghintay sa mga pila noong Mayo a-9 para lang masigurong magagamit nila ang kanilang karapatang bumoto.

Matatandaang nakapagtala ng 81.95% rate ng voter turnout noong 2016 presidential elections sa Pilipinas.