HOT STORIES OF THE WEEK

Nagpasalamat naman ang aktor at senator-elect na si Robin Padilla sa lahat ng sumuporta sa kanya matapos manguna sa senatorial race sa May 9 elections.

Ito ang naging mensahe ni Binoy makaraan ang proklamasyon nilang 12 nanalong senador sa Philippine International Convention Center (PICC), sa Pasay City, kahapon.

Partikular na pinasalamatan ni Padilla ang mga Muslim at Kristyano na nagkaroon anya ng malaking ambag sa kanyang panalo na kanyang itinuturing na makabuluhang pagkakaisa.

Samantala, nanawagan naman ang neophyte senator sa kanyang mga kapwa mambabatas na magkaisa upang ipursige ang reporma sa Saligang Batas.

Bumaba ng 50% ang crime rate sa bansa sa nakalipas na limang taon.

Ayon kay DILG Undersecretary Epimaco Densing, umabot sa 1.35 million ang bilang ng naitalang krimen sa nasabing panahon kumpara sa 2.7 million noong 2010 hanggang 2015.

Simula anya nang ipatupad ang Anti-Drug War noong 2016, bumulusok sa 50% ang antas ng krimen.

Binigyang-diin ni Densing na malaki ang naitulong ng drug war na inilunsad ni Pangulong Rodrigo Duterte sa pagpapababa sa krimen, dahil karamihan sa mga naitatalang krimen ay may kinalaman o nag-ugat din sa iligal na droga.

Idinagdag pa ng DILG Official na ilang laboratoryo na rin ng illegal drugs ang matagal nang tumigil sa operasyon at maraming drug lords ang umalis ng bansa sa panahon ni Pangulong Duterte.

Malaki ang tiyansa na maging maulap ang kalangitan na may kalat-kalat na pag-ulan, pagkulog at pagkidlat sa hapon hanggang sa gabi sa bahagi ng Ilocos Region, Bataan, Zambales, Pampanga, Bulacan, CALABARZON at Metro Manila.

Ayon kay PAGASA weather specialist Obet Badrina, inaasahang mas lalakas ang buhos ng ulan ngayong araw kaya’t huwag kalilimutang magdala ng payong at iba pang panangga sa ulan upang maiwasang magkasakit.

Inaasahan naman ang maaliwalas na panahon sa bahagi ng Visayas pero posible paring makaranas ng isolated rain showers at thunderstorms sa hapon hanggang sa gabi.

Magkakaroon naman ng localized thunderstorms sa Mindanao lalo na sa hapon hanggang sa gabi.

Kinalma ni Manila Archbishop Cardinal Jose Advincula ang mga Katoliko na sa halip ay magtiwala sa Democratic Process kaugnay sa nakalipas na eleksyon.

Sinabi ni Advincula na tapos na ang halalan kaya’t dapat nang ipagpatuloy ang pagmamahal, pag-aruga at pagdarasal para sa bansa.

Kasabay nito, nagpasalamat din si Advincula sa mga kabataang first time voters na naging mukha ng bansa para sa kinabukasan.

Pinapurihan din ni Advincula ang mga volunteer ng PPCRV sa pagtiyak na magkakaruon ng malinis na eleksyon.

Nasakote sa loob ng New Bilibid Prison, Muntinlupa City ang peke at nagpapanggap sa social media bilang si Atty. Vic Rodriguez, taga­pagsalita ni presumptive president Ferdinand ‘Bongbong’ Marcos Jr.

Kinilala ng National Bureau of Investigation ang suspek na si Ryan Ace Castillejos na nakapiit sa NBP Maximum Security Compound.

Kinumpirma ni Justice Secretary Menardo Guevarra na pinagsisilbihan ni Castillejos ang dalawang taong sentensya sa kasong Two counts of Qualified Theft.

Nadiskubre ang modus ng suspek matapos madakip ang kasabwat umano niyang si Caseilyn Dela Cruz, 31- anyos at residente ng Barangay Lolomboy, Bocaue, Bulacan noong April 18.

Si Dela Cruz ang taga-kolekta umano ng mga nakukulimbat ni Castillejos sa kanyang mga biktima bagaman palaisipan kung paano nakapagpuslit ang suspek ng cellphone sa loob ng selda.

Bukod kay Rodriguez, nagpanggap din umano si Castillejos bilang sina PNP Officer-in-Charge, Lt. Gen. Vicente Danao at Liza Araneta-Marcos na asawa ni BBM.

Nakumpiska sa selda ng suspek ang notebook kung saan nakalista ang pangalan ng panganay na anak nina BBM na si Sandro Marcos kasama sina dating Vice President Jejomar Binay, Customs Commissioner Rey Guerrero at Pasig City Mayor Vico Sotto.

Modus ni Castillejos na magpanggap at humingi ng pera mula sa mga supporter ni Marcos para umano sa mga apektado ng kalamidad at kabilang din sa tinangka nitong biktimahin si Volunteer Against Crime and Corruption President Arsenio Evangelista.

Isa’t kalahating buwan bago bumaba sa pwesto, aprubado na ni Pangulong Rodrigo Duterte ang bagong batas na nagpapalawig sa validity ng lisensiya ng pagdadala ng armas.

Sa ilalim ng Republic Act 11766 na nilagdaan ng Pangulo noong Mayo a –6, sa halip na dalawang taon, tatagal na ng lima hanggang sampung taon ang license to carry firearms ng isang indibidwal.

Pinalalawig din ng batas ang registration ng baril sa lima hanggang sampung taon mula sa apat na taon at nakabatay ang renewal ng lisensiya sa birthdate ng may- ari.

Sakali namang mabigo ang licensee na makapag-renew nang dalawang beses, madi-disqualify na ito sa pag-apply ng lisensya.

Hiniling ng isang labor group sa gobyerno ang pagpapababa sa cost of living sa gitna ng inaprubahang salary increase para sa mga minimum wage earner, lalo sa Metro Manila at ilan pang rehiyon.

Ayon sa Grupong SENTRO na kung mayroong political will, matutuldukan ng pamahalaan ang overpricing, maibaba ang singil sa kuryente at makapaglalatag ng service contracting para sa public transportation upang maibsan ang epekto ng oil price hike.

Iginiit din ng SENTRO ang agarang pagbuwag sa Regional Tripartite Wages and Productivity Boards (RTWPB) dahil umano sa kabiguan nito.

Hindi rin umano sapat ang inaprubahang umento ng RTWPB sa National Capital Region at Western Visayas para sa mga manggagawa upang makarecover mula sa sumadsad nilang purchasing power.

Samantala, inihayag ni National Wages and Productivity Commission Executive Director Criselda Sy na bukas ang NWPC sa anumang panawagang magsagawa ng review sa umiiral na Wage Rationalization Act.

Inalok ni presumptive president Ferdinand “Bongbong” Marcos Jr. si dating Labor Secretary Bienvenido Laguesma at OFW Rights Advocate Susan “Toots” Ople na maging bahagi ng kanyang administrasyon.

Ito ang kinumpirma ni Atty. Vic Rodriguez, tagapagsalita ni Marcos, isang araw matapos lumipad patungong Australia si BBM.

Ayon kay Rodriguez, bago umalis ay kinausap ni Marcos si Laguesma at inalok na pamunuan muli ang Department of Labor and Employment habang si Ople ang itatalaga niyang kalihim ng bagong tatag na Department of Migrant Workers.

Kapwa anya respetado sa larangan ng Labor and Employment ang kinausap ng susunod na pangulo at tinanong kung nais maglingkod sa gobyerno sa ilalim ng pamahalaang Marcos.

Gayunman, wala pang desisyon sina Laguesma at Ople na kapwa humiling muna ng panahon upang konsultahin ang kanilang pamilya at mga kaibigan.

Magugunitang kinumpirma ng kampo ni Marcos ang planong pagtatalaga kay presumptive vice president Sara Duterte-Carpio bilang Education Secretary at si dating MMDA chairman Benhur Abalos bilang Interior Secretary.

Landslide rin ang pagka-panalo ni incoming president Ferdinand “Bongbong” Marcos Jr. sa Overseas Absentee Voting.

Sa ulat mula sa iba’t ibang philippine diplomatic posts at sa mismong Commission on Elections Transparency Media Server, nakakuha si Marcos ng 330,231 votes kumpara sa 89,624 ni Vice President Leni Robredo.

Sa Asia Pacific Cluster, kabilang ang China, Japan, Australia, Thailand, Malaysia, Korea, Singapore at Taiwan, nakakuha naman si BBM ng 159,186 votes kumpara sa 35,862 ni Robredo.

Ang pinakamaraming boto na nakuha ni Marcos ay mula sa Singapore, na sinundan ng Japan at Taiwan.

Ganito rin ang naging resulta hanggang Middle East at Africa cluster, na binubuo ng Lebanon, Qatar, Saudi Arabia, Kuwait, Oman, United Arab Emirates, Bahrain, Saudi Arabia, Amerika at Europe clusters.

Wala umanong interes na maging Senate President ang nagbabalik-senadong si Loren Legarda, kahit siya ang magiging pinaka-senior member ng mataas na kapulungan ng kongreso.

Ayon kay Senator-elect Legarda, inimbita siya sa mga meeting hinggil sa Senate Presidency pero wala pang pinal na pasya ang mga kapwa mambabatas kung sino ang susuportahan sa mga naghahangad na Senate President.

Sa sandaling opisyal nang maupo sa Hunyo  a – 30, ito na ang magiging ika-apat na termino ni Legarda bilang senador.

Iginiit ng Outgoing Representative ng Lone District of Antique na ang mahalaga anya ay mag-usap at kung sino ang may magkakaparehong adbokasiya ay magsama-sama  sa mayorya o Majority Bloc.

Para kay Legarda, marami namang mga senador na kwalipikadong maging Senate President sa 19th Congress.

Kabilang sa mga lumulutang na contender sa Senate Presidency ay sina Senators Cynthia Villar, Juan Miguel Zubiri, Win Gatchalian at Chiz Escudero. —ulat mula kay Cely Ortega Bueno (Patrol 19)