HOT STORIES OF THE WEEK

Inimbitahan ng Commission on Elections si Pangulong Rodrigo Duterte sa proklamasyon ng 12 nanalong senador na gaganapin sa Philippine International Convention Center, mamayang hapon.

Ito ang kauna-unahang beses na nag-imbita ng Pangulo ang COMELEC upang saksihan ang proklamasyon ng mga nagwaging kandidato sa May 9 elections.

Pinadalhan din ng Poll body ng imbitasyon sina Vice President Leni Robredo, Senate President Vicente Tito Sotto III, House Speaker Lord Allan Velasco at Chief Justice Alexander Gesmundo.

Gayunman, aminado si COMELEC commissioner George Garcia na hindi nila tiyak kung makadadalo ang mga nasabing opisyal lalo’t mayroon ding ‘prior engagements’ ang mga ito.

Batay sa regulasyon ng Poll body, ang bawat ipoproklamang senador ay maaaring magsama ng limang indibidwal at ang dress code para sa mga bisita at nanalong kandidato ay kasuotang Pilipino.

Hindi na rin oobligahin ng COMELEC ang mga dadalo na magpakita ng negative antigen o RT-PCR test pero dapat ay mayroong vaccination card.

Kasalukuyang nasa Australia si presumptive president Ferdinand “Bongbong” Marcos Jr. upang magpahinga, matapos manguna sa partial and unofficial tally ng COMELEC.

Kinumpirma ni Atty. Vic Rodriguez, spokesman ni BBM, na kasama ni Marcos para sa private trip ang pamilya nito upang i-enjoy ang nalalabi niyang mga araw bilang pribadong mamamayan.

Mismo anyang si Philippine Ambassador to Australia Helen Dela Vega ang nagparating ng impormasyon sa kanila.

Nagkataon din na kaarawan ng anak ni Marcos na si Vinny, na una nang napaulat na mag-e-enroll sa University of Melbourne.

Nakausap na rin umano sa telepono ni Australian Prime Minister Scott Morrison si BBM upang batiin sa pagkapanalo nito sa eleksyon.

Walang nakikitang problema ang COMELEC sa inagurasyon ng mga nanalong kandidato sa 2022 elections bago pa man mag-Hunyo.

Ito’y kahit sa Hunyo a – 30 pa dapat opisyal na mauupo sa posisyon ang nanalong presidente at bise presidente alinsunod sa 1987 constitution.

Tugon ito ni Comelec commissioner George Garcia sa gitna ng plano ni presumptive vice president at Davao City Mayor Sara Duterte-Carpio na mag-Oath taking sa June 19, sa kanilang lungsod.

Ayon kay Garcia, mag-o-oath taking lang naman si Duterte – Carpio at sa Hunyo a – 30 pa opisyal na uupo bilang halal na bise presidente na nakasaad sa batas.

Hindi naman anya malalabag ang nakasaad sa Article 7, Section 4 ng saligang batas dahil wala namang binabanggit dito kung dapat bang isabay ang Oath taking sa opisyal na pag-upo ng nanalong pangulo at pangalawang-pangulo.

Inihalimbawa pa ng Poll official ang panunumpa nina dating US President Barrack Obama at Donald Trump na nanumpa kahit hindi pa opisyal na umuupo at parehas din naman ang probisyon ng kanilang konstitusyon sa saligang batas ng Pilipinas.

Una nang ipinaliwanag ng presidential daughter na nais niyang mauna sa panunumpa para makadalo sa inagurasyon ni presumptive president Ferdinand “Bongbong” Marcos Jr.

Inihayag ng Commission on Elections (COMELEC) na base sa batas na ipinatupad ng kanilang ahensya, ang mga kandidato at mga political party kasama na ang mga party-list groups ay kailangang magsumite ng kanilang Statements of Contributions and Expenditures (SOCE) sa loob ng 30 araw pagkatapos ng eleksyon.

Sa panayam ng DWIZ sinabi ni Atty. Efraim Bag-Id, Head ng Campaign Finance Office ng COMELEC, tatagal lang hanggang sa Hunyo a-8 ang palugit para maisumite ang mga report na kailangang maipasa sa kanilang ahensya.

Sinabi pa ni Bag-id na magkakaroon ng pirmahan sa mga resibo at limitado lang ang paggastos ng mga kandidato sa kanilang kontribusyon dahil mayroon itong kaukulang parusa.

Inihayag ni Committee on Electoral Reforms vice chairman senator Koko Pimentel na sang-ayon siya sa mga panawagan na repasuhin o buwagin na ang party-list system sa bansa.

Ayon kay Pimentel, parang kabute na nagsulputan ang mga party-list groups at malayo na ang tunay na intensyon nito sa layunin ng kanilang mga kinatawan.

Ngunit binigyang-diin nito na mangangailangan ng pag-amyenda sa ating saligang batas bago mabuwag ang naturang sistema.

Samantala, maaari aniya itong isulong sa 19th Congress, ngunit depende pa rin ito kung kasama ang charter change sa mga proyoridad ng paparating na administrasyon.

Iniurong ng Department of Environment and Natural Resources (DENR) ang petsa ng muling pagbubukas ng Manila Baywalk Dolomite Beach.

Nakatakda sanang buksan ito sa Mayo a-20 ngunit inilipat ito sa Hunyo a-3.

Ayon sa DENR, ilang imprastraktura sa lugar ay hindi pa natatapos at kinakailangan ring maglinis malapit sa US Embassy.

Maliban dito, sinabi ng ahensya na dapat matiyak ang kalinisan at kaligtasan ng tubig sa Manila Bay.

Noong September 2020 nang unang buksan sa publiko ang Dolomite Beach.

WALANG kaduda-duda na talagang suportado ng mayorya ng mga Pinoy si incoming President Ferdinand ”Bongbong’Marcos dahil kabilang sa 31 milyon na nagbigay sa kanya ng makasaysayan at record-breaking na pagkapanalo ay mga kababayan natin na nasa ibang bansa.

Maliban sa pangunguna sa halos lahat ng rehiyon at voting classes sa bansa, si Marcos ay nakakuha din ng landslide victory mula sa mga overseas Filipino  voters.

Base sa ulat mula sa ibat-ibang Philippine diplomatic posts at sa mismong Commission on Elections (Comelec) Transparency Media server  ay nagpakita na si Marcos ay nakakuha ng 330,231 na boto, na malayong -malayo ang lamang mula sa 89,624 na nakuha ng pumapangalawa sa kanya.

Sa Asia Pacific cluster kung saan kabilang ang China, Japan, Australia, Thailand, Malaysia, Korea, Singapore, at Taiwan,  nakakuha si Marcos ng 159,186 na boto habang 35,862 na boto lang ang nakuha ni Leni Robredo.

Ang pinakamaraming boto na nakuha ni Marcos ay sa Singapore kung saan 36,806 na ang nakuha niya laban sa 12,283  ni Robredo.

Sumunod ang Japan kung saan nakakuha siya ng 25,410 na boto at sa Taiwan na may 23,906.

Ang kalamangan ni Marcos ay patuloy hanggang Middle East at Africa cluster, na binubuo ng Lebanon, Qatar, Saudi Arabia, Kuwait, Oman, United Arab Emirates, at Bahrain.

Nakakuha ang presumptive president ng 111,025 na boto habang 19,856 lang si Robredo.

Sa Saudi Arabia na mayroon ng 98% voter turnout, nakakuha si Marcos ng 46,748 na boto kumpara kay Robredo na 8,582 lang.

Napanatili din ni Marcos ang kanyang pangunguna sa America at Europe clusters, kung saan nakakuha siya ng 28,623, at 31,397.

Base sa partial at unofficial results na inilabas nitong May 13, 2022, patuloy ang pangunguna si Marcos sa presidential race na may 31,104,175 na boto habang 14,822,051 naman ang sumunod sa kanya.

Isang Certificate of Canvass na lamang ang hindi pa naisasama sa kabuuang bilang ng National Board of Canvassers ng Comelec para sa resulta ng eleksyon sa pagka-senador at party-list, kahapon.

Pasado ala-5 ng hapon nang matapos ang pagbibilang sa 172 mula sa kabuuang 173 COCs.

Huling itinala ng poll body sa canvassing ang 14 na COC mula sa Overseas voters, partikular ang huling ballot box mula sa embahada ng Pilipinas sa Oslo, Norway.

Tanging ang mga boto mula sa Lanao del Sur ang kukumpleto sa canvassing.

Magugunitang nakaranas ng karahasan at gulo sa ilang lugar noong May 9, tulad sa mga Bayan ng Butig, Binidayan at Tubaran, Lanao del Sur.

Nakatakda naman sa Mayo a – 24 ang special elections sa 14 na barangay sa mga nasabing lugar.

Inihayag ni House Ways and Means Committee Chairman at Albay 2nd District Rep. Joey Salceda na kinakailangan ng Pilipinas ng P326 billion na bagong kita kada taon para mabayaran ang utang nito sa ibang bansa.

Nabatid na pumalo na sa P12.68 trillion ang utang ng bansa hanggang noong katapusan ng Marso bunsod ng panghihiram ng gobyerno para matugunan ang problema sa COVID-19 at muling ibangon ang ekonomiya ng bansa.

Kasama din sa kailangang mabayaran ang interes sa naging utang ng Pilipinas kung saan, lumobo na sa 63.5% ang debt-to-GDP ratio noong buwan ng Marso.

Ayon naman kay Bangko Sentral ng Pilipinas (BSP) Governor Benjamin Diokno, manageable pa rin ang utang pero dapat na mapanatili ng susunod na administrasyon ang paglago ng ekonomiya ng bansa.

Samantala, inirerekomenda naman nina Chua at Salceda ang pagpapatupad ng mga reporma na magpapataas sa income generation ng bansa upang mahikayat ang mas maraming dayuhang mamumuhunan o nais magkaroon ng negosyo sa Pilipinas.

Inihayag ng Commission on Elections (COMELEC) na dapat umanong maipakita ang mga testigo at ebidensiya hinggil sa vote buying.

Ayon Commissioner Imee Ferolino, malabong maaksyunan ng Task Force Kontra Bigay ng COMELEC ang mahigit 1,000 vote buying incidents na kanilang natanggap dahil wala itong sapat na katibayan.

Sa pahayag ng Law Department ng COMELEC, sa 80 reklamo, 73 dito ang may kaugnayan sa vote buying kung saan, 49 dito, ang iniimbestigahan na ng task force dahil sa mga kalakip na ebidensya.

Sinabi ni Ferolino na karamihan umano sa mga sumbong ay nagpadala lamang ng mga video kaugnay sa pagbili at pagbebenta ng boto pero wala umanong kalakip na impormasyon kung saang lugar at kung sinong kandidato ang nasa likod ng naturang aktibidad.

Sa ngayon, nakikipag-ugnayan na rin ang komisyon sa National Telecommunications Commission (NTC) para malaman ang impormasyon hinggil sa naturang impormasyon.