HOT STORIES OF THE WEEK

Hinamon ni Acting Philippine National Police (PNP) chief, LT. Gen. Vicente Danao, Jr. ang driver ng Sports Utility Vehicle (SUV) na sumagasa sa isang security guard sa Mandaluyong City kamakailan.

Ayon kay Danao, para mapatunayan sa publiko na hindi umano adik, dapat nang sumuko sa mga otoridad ang suspek na si Jose Antonio San Vicente.

Sinabi ni Danao na posibleng gumagamit ng iligal na droga ang suspek na nakasagasa sa guwardiyang si Christian Joseph Floralde na imbes na tulungan, lalo pa itong sinagasaan.

Iginiit ni Danao na ang ginagawang pagmamatigas ni Vicente ay nangangahulugan lamang na sinadya nito ang kaniyang ginawa o isang sign of guilty dahil ayaw din nitong sumuko sa mga otoridad.

Sa ngayon, hinihintay parin ng Mandaluyong City Police Station ang Warrant of Arrest na ilalabas ng hukuman sa kasong Frustrated Murder at Abandonment of One’s Victim na isinampa laban sa suspek.

Nakahanda na ang Metropolitan Manila Development Authority (MMDA) para sa Oplan Balik Eskwela 2022.

Ito ay para tiyakin na magiging ligtas ang muling pagbabalik ng 100% face-to-face classes sa bansa sa darating na Agosto.

Ayon kay Atty. Victor Nuñez, head of MMDA Traffic Discipline Office (TDO) – Enforcement, bilang kahandaan sa Academic Year 2022-2023, nangako ang kanilang ahensya na kanilang poprotektahan ang mga kabataan na bumibiyahe patungo sa kanilang eskwelahan.

Sinabi ni Nuñez na magsasagawa ng pagpupulong ang kanilang ahensya kung saan, ipapatawag ang mga School Administrator, Parent-Teacher Associations (PTA), at Local Traffic Bureau sa National Capital Region para pag-usapan o talakayin ang road safety checks sa mga school zones.

Nakikipag-ugnayan narin ang MMDA sa pamunuan ng Department of Transportation (DOTr), Land Transportation Office (LTO), and Land Transportation Franchising and Regulatory Board (LTFRB) para bantayan ang mga motoristang madalas dumadaan sa mga paaralan.

Layunin nitong maprotektahan ang kaligtasan ng mga masusugatan sa gitna ng kalsada.

Bukod pa diyan, sinabi din ni Nuñes na kanilang pipinturahan ang pedestrian lanes sa mga bisinidad ng eskwelahan sa Metro Manila.

Bubuksan ng Commission on Elections (Comelec) sa susunod na buwan ang voter registration para sa Dec 5, 2022 Barangay at Sangguniang Kabataan polls.

Ayon kay Comelec acting spokesperson John Rex Laudiangco, ang tentative o panukalang pagpapatuloy ng registration ay planong ikasa sa Hulyo a-14 hanggang a-30 ngayong taon.

Umaasa si Laudiangco na aabot sa 66, 053, 357 ang kabuuang bilang ng mga rehistradong botante para sa Barangay elections habang inaasahan namang aabot sa 23, 059, 227 ang kabuuang bilang para naman sa Sangguniang Kabataan elections.

Inimbitahan ng Egypt para sa climate change conference si President Elect Ferdinand Bongbong Marcos, Jr.

Ang imbitasyon sa nasabing event sa Nobyembre ay ipinaabot ni Ambasador Ahmed Shehabeldin Ibrahim matapos mag courtesy call kay Marcos.

Bukod dito, tinutukan nina Marcos at Ibrahim ang mga pananaw ng dalawang bansa hinggil sa mga usaping may kinalaman sa pagpapaigting sa bilateral relations ng Pilipinas at Egypt.

Sinabi ni Ibrahim na naging mabunga ang kanilang paghaharap ni Marcos kung saan ipinaabot niya rin na ang Pilipinas ang isa sa itinuturing nilang key sports ng international relations.

Mananatiling tagapagsalita ng Commission on Elections si Law Department Director John Rex Laudiangco.

Batay ito sa Memorandum na nilagdaan ni Acting Comelec Chairperson Socorro Inting noong Hunyo a-10, na ipinalabas lamang ngayong araw.

Si Laudiangco ang nagsilbing spokesperson ng poll body sa panahon ng maikling panunungkulan ni dating Comelec chief Saidamen Pangarungan.

Muling magpapatupad ng taas presyo sa produktong petrolyo ang mga kumpanya ng langis.

Sa abiso ng Pilipinas Shell Petroleum Corp., P2.15 per liter ang itataas sa presyo ng gasolina, P4.30 sa diesel habang P4.85 naman sa kerosene.

Ipapatupad rin ng Cleanfuel ang naturang price adjustment maliban sa kerosene.

Epektibo simula bukas ng ala-6 ng umaga ang nasabing adjustment ng Pilipinas Shell Petroleum Corp., habang alas-8 naman ang Cleanfuel.

Ayon sa Department of Energy, ang pagsirit ng presyo ng petrolyo ay bunsod ng pagluwag ng lockdown sa China, European Union Ban sa Russian Oil Imports at panahon ng summer sa Northern Hemisphere Countries mula Hunyo hanggang Setyembre.

Tuluyan nang itinigil ang weekly Talk to the People ni Pangulong Rodrigo Duterte.

Madalas itong napapanood tuwing Lunes ng gabi kung saan, personal na nagbibigay ng ulat sa taumbayan si Pangulong Duterte kaugnay sa sitwasyon ng bansa kasabay ng pagbibigay direktiba sa kanyang mga gabinete.

Noong Hunyo a-6 nang huling humarap sa publiko ang Punong Ehekutibo kasama sina DILG Sec. Eduardo Año, DOH Sec. Francisco Duque, NDRRMC Executive Dir. Ricardo Jalad at NTF against COVID-19 Chief Implementer Carlito Galvez Jr.

Noong Mayo a – 30 nang isagawa ang huling full cabinet meeting na saktong isang buwan bago bumaba sa pwesto si Pangulong Duterte.

Pinasalamatan din dito ng Pangulo ang mga miyembro ng kanyang gabinete kasabay ng pagsasagawa ng thanksgiving party. —ulat mula kay Jopel Pelenio (Patrol 17)

Matagal nang dapat ibinigay ang titulo bilang National Artist sa aktres na si Nora Aunor.

Ito, ayon kay ACT-CIS Partylist Representative Nina Taduran, kasunod ng pagkilala sa aktres bilang National Artist matapos ang ilang taong pagbalewala sa nominasyon nito.

Nararapat lamang aniya kay Aunor ang pagkilala dahil sa dedikasyon at husay nito sa pag-arte.

Gayundin ang paggawa at pagganap nito sa makabuluhang mga pelikula, pagiging  singer, producer, director, talent manager at hindi na mabilang na pagkilala hindi lamang sa pilipinas kundi sa ibang bansa.

Nagpaabot naman ng pasasalamat ang mambabatas kay Pangulong Duterte sa pagkilala kay Aunor bilang kauna-unahang babaeng aktor at direktor na bibigyan ng pagkilala bilang National Artist for Film and Broadcast.  —ulat mula kay Tina Nolasco (Patrol 11)

Dapat pa ring ipagpatuloy ng publiko ang pagsusuot ng face mask.

Ito, ayon kay Dr. Rontgene Solante, isang Infectious Disease Expert at miyembro ng Vaccine Expert Panel, sa gitna ng kontrobersyal na facemask policy na ipinatupad sa Cebu.

Binigyang diin ni Solante na nasa State of Public Health Emergency pa rin sa bansa at hindi aniya dapat ilagay sa alanganin ang kalusugan ng publiko.

Sinabi pa ni Solante na hindi natin dapat gayahin ang ibang mga bansa na nagtatanggal na ng face mask policy dahil iba ang kapasidad ng mga ito.