HOT STORIES OF THE WEEK

Suportado ni Senate President Vicente “Tito” Sotto III ang panukalang itaas sa Alert level 2 ang kasalukuyang Alert level system na ipinapatupad sa National Capital Region.

Tugon ito ni Sotto sa pahayag ni health Undersecretary Maria Rosario Vergeire na posibleng isailalim muli ang Metro Manila sa Alert level 2 sakaling tumaas pa ang kaso ng COVID-19.

Gayunman, nilinaw ng senador na anumang gagawing pagbabago sa Alert level status sa Metro Manila at iba pang bahagi ng bansa ay dapat nakabase sa mga datos at siyensya.

Iginiit naman ng mambabatas na ang mga planong paghihigpit sa patakaran na may kaugnayan sa COVID-19 pandemic ay dapat pag-usapang mabuti ng National at Local Government Units. —ulat mula kay Cely Ortega Bueno (Patrol 19)

Magpapadala ang DILG ng Show cause order kay Cebu Governor Gwen Garcia kung sasalungat pa rin ito sa mga alituntunin ng National Government sa pagsusuot ng face mask.

Ito, ayon kay Interior Undersecretary Epimaco Densing III, ang nakikita nilang huling hakbang sakaling magmatigas si Garcia.

Pero sa ngayon anya ay makikipag-usap muna ang DILG sa Gobernadora upang magpatupad ng adjustments sa Executive Order hinggil sa Facemask Policy.

Bagaman may magandang intensyon ang ipinatupad na polisiya ni Garcia, ipinunto ni Densing na dapat ay alinsunod ito sa mga kautusan ni Pangulong Rodrigo Duterte.

Kinilala na ang dalawang nasawi matapos mahulog sa riles sa bahagi ng MRT-3 EDSA-Pasay station mula sa Aurora Boulevard Flyover sa Pasay City, noong Linggo.

Batay sa imbestigasyon ng Pasay City Police, nawalan ng control sa motorsiklo ang magka-angkas na biktimang sina Rudy at pinsang Reinaldo Gleocam habang tinatahak ang Flyover.

Madulas ang kalsada matapos ang pag-ulan nang maganap ang aksidente dakong ala- 6:30 ng gabi.

Dahil dito, humampas ang motorsiklo sa railing ng Flyover kaya’t tumilapon at nahulog ang magpinsan sa riles ng MRT.

Sinuspinde naman ng MRT-3 ang operasyon nito matapos ang aksidente pero agad namang ibinalik dakong ala-7:30 ng gabi.

Samantala, inaalam na kung mabilis ang takbo ng motorsiklo habang pinag-aaralan na ng MMDA ang mga susunod na hakbang upang maiwasang maulit ang mga kahalintulad na aksidente.

Sa ikalawang sunod na linggo ngayong Hunyo, muling umarangkada ang bigtime price hike ng mga kumpanya ng langis.

Ito’y bunsod ng walang prenong paggalaw ng presyo sa International market na pinalala ng giyera sa pagitan ng Ukraine at Russia.

Epektibo alas-12:01 kaninang hatinggabi, buena manong nagpatupad ang Caltex ng dagdag P2. 15 centavos sa kada litro ng gasolina; P4.30 centavos sa diesel habang P4.85 centavos sa kerosene o gaas.

Ala-6 naman ngayong umaga inilarga ng Shell, Petron, Phoenix Petroleum, Flying V, PTT, Seaoil, Petrogazz at Jetti ang kahalintulad na increase.

Mamayang alas-8:01 ng umaga ipatutupad din ng Cleanfuel ang dagdag-presyo maliban sa kerosene.

Dahil sa panibagong bigtime increase, maglalaro na sa P90 hanggang P95 ang kada litro ng diesel sa Metro Manila at ilang karatig lugar.

Ito na ang ika-18 beses na nagpatupad ng dagdag-presyo sa mga produktong petrolyo sa bansa simula Enero ngayong taon.

Nanawagan sa mga residente ng Cebu si Philippine National Police Director for Operations at Joint Task Force COVID Shield Deputy Commander PMGEN. Valeriano de Leon na magkaroon ng boluntaryong pagsuot ng facemask sa pampublikong lugar.

Kasunod ito ng kautusan ng Cebu Provincial Government na nagpawalang bisa sa “mandatory” na pagsusuot ng facemask sa mga pampublikong lugar.

Ayon kay De Leon, makakabuti at mas magiging ligtas kung patuloy na magsusuot ng facemask ang bawat isa dahil nananatili parin ang banta ng COVID-19 maging ang mga bagong variants.

Sa ngayon, inatasan ang mga tauhan ng PNP na magkasa ng “maximum tolerance” sa mga hindi naka-face mask at paalalahanan hinggil sa umiiral na polisiya ng Inter-Agency Task Force (IATF).

Tututukan ng Philippine Air Force ang external threats sa Pilipinas matapos umanong bumaba ang internal threats sa bansa.

Ayon kay LT. Gen. Connor Anthony Canlas, kanilang ipatutupad ang complete monitoring sa buong bansa sakaling ma-install na ang karagdagang apat na radar sa taong 2024.

Matatandaang nagkaroon ng ‘Flight Plan 2028’ ang ahensya kung saan anim na taon na lang ang kailangan para mai-enhance ang Air Power Capabilities ng Pilipinas.

Sinabi ni Canlas na kailangang maipagpatuloy ng susunod na administrasyon ang modernisasyon ng Air Force upang mapaghandaan ang external threats dahil narin sa bakbakan ng Russia at Ukraine.