HOT STORIES OF THE WEEK

Maaaring hindi na magpatupad ng mas mataas na COVID-19 Alert level kung mababa pa rin ang hospitalization rate sa kabila ng tumataas na mga bagong infection sa nakalipas na ilang linggo.

Ito ang inihayag ni Presidential Adviser for Entrepreneurship Joey Concepcion sa gitna ng pangambang posibleng ibalik sa Alert level 2 status ang National Capital Region.

Ayon kay Concepcion, hindi naman lahat ng COVID-19 cases ay humahantong sa mga ospital dahil ilan lamang ang severe at critical na na a-admit, kaya’t wala pang dahilan na isailalim muli ang NCR sa mas mataas na Alert level.

Una nang ibinabala ng Department of Health na may posibilidad na ibalik sa Alert level 2 ang Metro Manila kung patuloy na tataas ang COVID-19 cases.

Nakatakdang mag-expire ngayong araw sa NCR at iba pang bahagi ng bansa ang Alert level 1, na pinaka-mababang COVID Alert level system.

Sakaling bumalik sa Level 2, balik din sa 50% ang indoor capacity ng mga establisyimento at aktibidad para sa mga fully vaccinated adults habang 70% ang outdoor capacity.

Posibleng itaas sa Moderate COVID-19 risk classification mula sa Low risk ang Metro Manila bunsod ng patuloy na pagtaas muli ng mga bagong infection ngayong buwan.

Ibinabala ito ni OCTA Research Group Fellow, Professor Guido David makaraang sumampa sa 53% o 131 ang 7-day average ng COVID-19 cases mula sa 86 cases per day.

Ayon kay David, tumaas din ang reproduction number o bumilis ang hawaan sa 1.59 mula sa 1.21% habang ang positivity rate ay umakyat sa 2.7% mula sa 2.2%.

Bahagya rin anyang umakyat ang Healthcare Utilization Rate sa 23% kumpara sa 21% noong nakaraang linggo kaya’t maaaring itaas ang risk level sa loob ng isa hanggang dalawang linggo.

Idinagdag pa ni David na bagaman hindi gaanong kalaki ang mga bilang, nakikitaan nila ito ng trend o pattern at nagkakaroon ng pagtaas kada linggo at sa katunayan ay apat na linggo nang sumisirit ang COVID cases simula pa noong unang linggo ng Mayo.

Indikasyon ito na hindi pa tuluyang bumabagal ang hawaan ng COVID-19 sa Metro Manila.

Handang-handa na umano si Senator-elect Robin Padilla na makipag-debate sa senado.

Pero, Filipino at hindi raw Ingles ang gagamitin niyang lingguwahe sa pakikipag-debate dahil mga Pilipino naman ang kanyang makaka-debate.

Ito ang inihayag ni Padilla, matapos bumisita sa senado na bahagi ng kanyang paghahanda bilang bagong mambabatas.

Sa kanyang pagtungo sa senado, binigyan ang aktor ng briefing ni Deputy Secretary for Legislation, Atty. Edwin Bellen hinggil sa proceedings sa mataas na kapulungan ng kongreso tulad ng pagsasagawa ng committee hearing at pagdalo sa plenary session.

Tiniyak ni Padilla na 100% na siyang handa para sa kanyang bagong tungkulin, lalo ang pagsusulong ng pederalismo.

Bukod sa Senate orientation, una ng sumalang si Binoy sa briefing hinggil sa ekonomiya, foreign policy at iba pang aspeto na may kinalaman sa kanyang pagiging senador.

Samantala, inihayag ni Padilla na wala pang kumakausap sa kanya hinggil sa komite na nais niyang hawakan, partikular ang senate Committee on Constitutional Amendments and Revisions of Codes. —ulat mula kay Cely Ortega Bueno (Patrol 19)

Maka-aapekto sa inaasahang paglago ng ekonomiya ng bansa ngayong taon sakaling muling itaas sa Alert level 2 ang Metro Manila.

Ito ang pangamba ni Senator Joel Villanueva sa harap ng posibleng pagsasailalim muli sa National Capital Region sa Alert level 2 bunsod ng tumataas na namang kaso ng COVID-19.

Ayon kay Villanueva, sa pagtaya ng World Bank, lalago ang ekonomiya ng bansa ng 5.7% ngayong taon, na pinakamataas sa Asya, habang 5.6% ang inaasahang paglago sa taong 2023 hanggang 2024.

Crucial anya ngayong panahon ang pagbubukas ng ekonomiya, lalo na sa turismo sakaling itaas muli ang Alert level.

Gayunman, idinagdag ng senador na ang IATF at team ng mga eksperto nito ang dapat magrekomenda sa dapat gawin alinsunod sa pinaka-bagong datos at dapat ibatay din sa karanasan ng ibang bansa. —ulat mula kay Cely Ortega Bueno (Patrol 19)

Pinag-aaralan na ng MMDA na higpitan ang mga patakaran sa paggamit ng E-bikes at E-scooters matapos ang mga napaulat na insidente noong isang taon.

Ayon kay MMDA Traffic Discipline Office for Enforcement Head Victor Nuñez, medyo maluwag ang ahensiya sa pagpapatupad ng Administrative Order 2021-039 ng Land Transportation Office.

Ito’y sa gitna ng binawasang public transportation capacity, noong isang taon.

Pero dahil balik na anya sa 100% ang mass public transport at mag re-resume na rin ang face-to-face class, posibleng maraming mga estudyante ang gumamit ng E-bikes at E-scooters kaya’t nais nilang i-promote ang road safety.

Sa ilalim ng A.O. 2021-039, ang E-vehicles na may maximum speed na 50 kilometers per hour ay required na magparehistro sa LTO.

Ang mga E-vehicle user ay dapat magkaroon ng driver’s license, dapat limitado lamang sa bicycle lanes, barangay roads at bawal dumaan sa mga major thoroughfares, maliban kung tatawid lang.

Noong nakaraang taon, nakapagtala ang MMDA ng 346 road crashes na kinasangkutan ng E-vehicles sa kahabaan ng mga pangunahing lansangan sa Metro Manila.

Nanindigan ang Malacañang sa utos ni Pangulong Rodrigo Duterte sa publiko na ipagpatuloy ang pagsusuot ng face masks sa kabila ng bagong polisiya sa lalawigan ng Cebu.

Una nang inilabas ni Cebu Governor Gwendolyn Garcia ang executive order na nag-uutos na gawing opsiyonal ang pagsusuot ng Anti-COVID masks sa well-ventilated at open spaces na taliwas sa kautusan ng Pangulo.

Ayon kay Acting Presidential Spokesman Martin Andanar, malinaw ang direktiba ng Punong Ehekutibo na nakabatay sa siyensya.

Suportado rin anya ng ligal na opinyon ni Justice Secretary Menardo Guevarra ang Inter-Agency Task Force Resolution sa mandatoryong pagsusuot ng face masks.

Inihayag din ng Palace official na iniatas na ng Department of the Interior and Local Government sa Philippine National Police na ipatupad ang umiiral na IATF resolution.

Nabawasan ang mga sasakyang bumabagtas sa ilang kalsada sa Metro Manila, lalo sa EDSA sa gitna ng walang prenong Oil price hike.

Batay sa monitoring ng MMDA, aabot na lamang sa 392,000 vehicles ang bumagtas sa EDSA noong June 9 kumpara sa 417,000 noong May 5, 2022 at 405,000 bago magkaroon ng COVID-19 pandemic.

Ayon kay MMDA Chairman Romando Artes, base sa kanilang CCTV footage ay nabawasan ang mga sasakyan sa EDSA dakong alas-8 ng umaga noong Lunes kumpara noong Mayo a –5.

Sa halip anya magdala ng sasakyan ay mas pinili ng mga vehicle owner na sumakay na lamang sa mga pampublikong transportasyon dahil sa hindi maawat na pagtaas ng presyo ng mga produktong petrolyo.

Matapos magpiyansa, pinalaya na ang tinaguriang “Tinang 83” na binubuo ng mga Magsasaka at Land Reform Advocates sa Tarlac.

Nanindigan ang mga miyembro ng Tinang 83 na kanilang itutuloy ang ligal na hakbang upang maibasura ang mga kaso laban sa kanila.

Kahapon ay nagpasaklolo ang grupo sa Commission on Human Rights upang maibasura ang kasong Malicious Mischief at Illegal Assembly na kanilang kinakaharap.

Ayon kay Atty. Jo Clemente, isa sa mga abogado ng Tinang 83, posibleng maghain sila ng Motion to Quash upang hindi na magkaroon ng arraignment at ma-dismiss na ang kaso.

Inaresto ang mga magsasaka at Land Reform Advocate noong Huwebes matapos manira umano ng mga pananim sa isang aktibidad sa Hacienda Tinang sa Bayan ng Concepcion.

Sa Collective Certificate of Land Ownership Award na inilabas ng Department of Agrarian Reform, aabot sa 236 farmers ang benepisyaryo ng lupa pero kinuwestyon ito ng SN Multipurpose Cooperative na nagsabing ibinenta ng ilang beneficiaries ang kanilang lupain.

Humihirit na rin ng dagdag-pasahe ang mga operator ng Provincial at City Bus sa Metro Manila bunsod ng walang prenong pagtaas ng presyo ng mga produktong petrolyo.

Ayon kay Provincial Buses Association of the Philippines (PBOAP) Executive Director Alex Yague, maghahain sila ng petisyon sa LTFRB para sa minimum fare increase.

Hihilingin anya nila ngayong linggo ang additional P50 sa kada 100 kilometers o katumbas ng 50 centavos sa kada litro ng diesel.

Inihayag naman ng Pasang Masda na bukod sa pisong provisional increase, hihirit din sila ng piso hanggang dalawang piso pang dagdag sa minimum fare sa jeep.

Ayon kay Pasang Masda President Obet Martin, malaking tulong para sa kanila sakaling aprubahan ang kanilang hiling at sakali namang bumalik sa normal o bumaba muli ang presyo ng krudo ay kanilang ibabalik sa P9 ang pasahe.

Gayunman, hindi na anya magiging sapat ang kanilang kinikita kung magpapatuloy ang oil price hike.

Magugunitang inaprubahan ng LTFRB ang pisong provisional increase sa minimum fare sa jeep na bumibyahe sa Metro Manila, Region 3 at Region 4.