HOT STORIES OF THE WEEK

Handa ang Philippine National Police (PNP) sa oras na itaas muli sa Alert level 2 ang buong NCR.

Sinabi ito ni PNP Spokesperson, Col. Jean Fajardo matapos ang pahayag ng Department of Health na posibleng itaas ang restriksyon sa rehiyon dahil sa pagtaas ng kaso ng COVID-19.

Ayon kay Fajardo, susunod lamang ang PNP sa mandato ng gobyerno upang maging maayos ang pagpapatupad ng Alert level system.

Sa 17 siyudad at bayan sa Metro Manila, 14 ang nakitaan ng pagtaas ng kaso ng COVID-19.

Pero hindi tumaas ang severe at critical cases at hindi rin nagkaroon ng problema sa mga ospital.

Mayroong mga sakit sa hayop na pwedeng maipasa at maging laganap na sakit sa tao.

Sa panayam ng DWIZ, sinabi ni Dr. Niel Tanquilut,  Dean ng Veterinary Medicine Member of the Philippines One Health University Network, na ito yung mga sakit na tinatawag na  Zoonotic Diseases.

Halimbawa dito ang Bird flu na laganap sa Pilipinas at ang Swine flu na nasa ibang bansa.

Pero sa kabila naman ng pag-aaral, wala pang kaso sa mundo na naipasa na ito sa tao kaya hindi dapat mabahala ang iba.

Nanawagan ang OCTA Research Group sa gobyerno na i-urong muna ang pagbabalik ng face-to-face classes sa mga paaralan sa buong bansa.

Kasabay ito ng muling pagtaas ng kaso ng COVID-19 sa Pilipinas.

Ayon kay OCTA Research Fellow Dr. Guido David, mas mabuting i-urong muna ang pagbabalik ng in-person classes kahit isang buwan lang.

Ito ay upang maiwasang mahawa sa COVID-19 ang mga mag-aaral na lalabas pa ng bahay para makapag-klase sa paaralan.

Sa Agosto 22 nakatakda ang pagbabalik ng face-to-face classes sa bansa.

Magpupulong sa Biyernes ang League of Provinces of the Philippines (LPP) para pag-usapan kung dapat na bang gawing opsyonal ang pagsusuot ng face mask sa mga pampublikong lugar.

Kasunod ito ng ordinansang ipinatupad ni Cebu Governor Gwen Garcia kung saan tanging sa indoor places na lamang required na magsuot ng face mask.

Ayon kay Dakila Cua, National Chairman ng LPP at Governor ng Quirino Province, hihingin nila sa IATF ang kumpletong resolusyon sa isyu na magiging gabay sa pulong sa Biyernes.

Aminado naman si Cua na pinag-aaralan na rin nila sa Quirino kung susundan ang hakbang ng Cebu sa pagtanggal ng face mask requirement.

Gayunman, dapat muna anyang pag-aralan itong mabuti kung magiging mapanganib laban sa pagkahawa sa COVID-19.

Nakapagtala ang Department of Health (DOH) ng panibagong 257 nahawa sa COVID-19 kahapon.

Ayon sa DOH, bahagya pang tumaas ang bilang ng aktibong kaso na nasa 3, 130 mula sa 3, 097 noong Lunes.

Sa kabuuan, umabot na sa 3, 693, 865 ang COVID-19 cases sa bansa.

Wala namang nadagdag sa bilang ng mga nasawi sa bansa na nananatili pa rin 60, 461 habang 3, 630, 274 ang gumaling sa COVID-19.

Ang mga rehiyong nanguna sa nakapagtala ng panibagong kaso sa nakalipas na dalawang linggo ay ang NCR na may 1, 562; CALABARZON, 447 at Central Luzon na may 252.

Patuloy na pinag-aaralan ng mga eksperto kung dapat nang bigyan ng ikalawang booster shot ang general population sa Pilipinas.

Ayon kay Health Undersecretary Maria Rosario Vergeire, wala pa silang hawak na malinaw at kumpletong ebidensya para masabing epektibo ang ikalawang booster sa general population.

Sapat pa rin aniya ang ibinibigay na proteksyon ng unang booster laban sa severe at critical condition nang pagkahawa sa COVID-19.

Sa kasalukuyan, ang mga health workers, immuno-compromised at senior citizens pa lamang ang natuturukan nito.

Ikinokonsidera ng Land Transportation Franchising and Regulatory Board (LTFRB) na palawigin hanggang Hulyo o Agosto ang libreng sakay sa EDSA Bus Carousel.

Ayon kay Maria Kristina Cassion, Executive Director ng LTFRB, sa P 7-B pondong inilaan sa libreng sakay, 50% pa lang dito ang nagagamit.

Depende anya ang petsa ng pagpapalawig sa sobrang pondong inilaan sa programa.

Sa buong bansa, higit 100 ruta ang nag-aalok ng libreng sakay.

Hanggang Hunyo a-30 iiral ang libreng sakay sa buong Pilipinas.

Tinanggap na ni Pangulong Rodrigo Duterte ang resignation ni Philippine Charity Sweepstakes Office (PCSO) General Manager Royina Garma.

Hunyo a –6 nang magbitiw si Garma bilang Chairperson at GM ng PCSO pero hindi nito idinetalye ang dahilan ng kanyang resignation.

Kinumpirma ni Executive Secretary Salvador Medialdea na hahalili sa nagbitiw na opisyal si PCSO Chairman Anselmo Simeon pinili bilang Officer-in-Charge ng Office of the General Manager.

Taong 2019 nang italaga si Garma sa naturang Government-owned and Controlled Corporation.

Bago italaga sa PCSO, nagsilbi munang Cebu City Police Office Director si Garma.

Aminado si Pangulong Rodrigo Duterte na sa kanyang edad na 77 ay hirap na siya sa pagbabasa.

Sa kanyang talumpati sa pagbisita sa National Academy of Sports sa New Clark City sa Capas, Tarlac, inihayag ni Pangulong Duterte na hindi niya matiyak kung makababasa pa siya sa mga susunod na panahon.

Magugunitang inamin noon ng Punong Ehekutibo na mayroon siyang Neuromuscular Disease na Myasthenia Gravis at Barrett Esophagus dahil sa kanyang pag-inom noon ng alak.