Pabor ang National Center for Commuter Safety and Protection sa hanggang tatlong pisong dagdag sa singil sa pasahe partikular sa mga jeep.
Ayon ito kay Elvira Medina, Chairperson ng grupo, subalit malaking problema ng publiko sa mga jeepney owners ay kalumaan ng kanilang mga sasakyan.
Hindi dapat ikarga sa mga pasahero ang mababang kalidad ng mga pampasaherong jeep kung saan ang mga lumang unit ay mas marami ang nakukunsumong gasolina.
Nanindigan si Pangulong Rodrigo Duterte na kailanma’y hindi isusuko ng Pilipinas ang soberanya nito sa West Philippine Sea.
Binigyang-diin ito ni Pangulong Duterte kasabay ng pagdiriwang ng ika-124 na anibersaryo ng Araw ng Kasarinlan, kahapon.
Gayunman, iginiit ng Punong Ehekutibo na malabong sumiklab ang digmaan sa pagitan ng Pilipinas at China dahil lamang sa maritime dispute.
Sa isinagawang commissioning ng BRP Melchora Aquino ng Philippine Coast Guard sa South Harbor, Maynila, inihayag ni Pangulong Duterte na magdurusa lamang ang mga Pilipino kapag nagkaroon ng giyera.
Aminado si outgoing President Rodrigo Duterte na minsan ay nais niyang sumama sa Philippine Coast Guard upang bisitahin ang West Philippine Sea bilang sibilyan kahit isa itong “sugal”.
Ito ang inihayag ni Pangulo Duterte matapos ang commissioning ng BRP Melchora Aquino o multi-role response vessel 9702 ng PCG sa Pier 15, South Harbor sa Maynila, kahapon.
Ayon sa Punong Ehekutibo, kung iimbitahan siya na sumakay sa nabanggit na barko bilang isang sibilyan ay handa siyang pumunta sa pinag-aagawang karagatan.
Samantala, pinuri naman ni Pangulong Duterte ang PCG para sa “excellent record” nito sa pagtulong sa gobyerno sa pagpapanatili sa kalayaan at integridad ng bansa bilang isang republika.
Sa huling bahagi ng Hunyo o unang bahagi pa ng Hulyo sisimulan ng Land Transportation and Franchising Regulatory Board ang pamamahagi ng second tranche ng fuel subsidy sa mga PUV operator at driver.
Ayon kay LTFRB Executive director Tina Cassion, inihahanda na nila ang mga dokumento para sa pamamahagi ng panibagong 6,500 peso fuel subsidy sa bawat benepisyaryo o kabuuang 5 billion pesos.
Noong nakaraang linggo anya ay wala pang 5,000 sa 377,000 benepisyaryo ang hindi pa nakatatanggap ng unang tranche ng fuel subsidy.
Nilinaw naman ni Cassion na ang tatanggap ng ikalawang bugso ng ayuda ay kapareho nang tumanggap ng unang tranche.
Hindi naman idinetalye ng LTFRB official ang dahilan ng bahagyang pagkabalam ng pamamahagi ng ikalawang bugso ng ayuda.
Hindi nagpatinag si Cebu Governor Gwendolyn Garcia makaraang i-overrule o hindi kilalanin ng DILG ang kanyang Executive Order na ginagawang opsyonal para sa publiko na magsuot ng face mask sa labas kung walang sintomas ng COVID-19.
Ayon kay Garcia, hindi niya babawiin ang kanyang kontrobersyal na patakaran.
Sa halip, inatasan ng gobernadora ang mga pulis sa lalawigan na huwag hulihin ang mga hindi nakasuot ng face mask, basta’t nasa bukas at maayos na bentilasyon ang mga lugar.
Una nang inihayag ni DILG Secretary Eduardo Año na ang kontrobersyal na utos ni Garcia ay kanyang tinatanggihan at binalaan ang mga hindi magsusuot facemask.
Iginiit din ng kalihim ang paninindigan ni Pangulong Rodrigo Duterte na dapat manaig ang mandato sa face mask hanggang matapos ang kanyang termino sa June 30.
Nananatiling manageable ang foreign borrowings ng bansa sa kabila ng record-high debts sa gitna ng COVID-19 pandemic.
Sa katunayan, nilinaw ng Department of Finance na nananatiling pinakamababa ang nasabing utang sa Asean-5.
Ayon kay retired undersecretary Gil Beltran, chief economist ng DOF, bagaman sumirit ang external debt stock ng Pilipinas sa 106.4 billion dollars noong isang taon, katumbas naman ito ng 27% ng Gross Domestic Product o GDP.
Kumpara ito sa 27.2% noong 2020 o sa panahon na lumagpak ang GDP sa gitna ng pinaka-matinding post-war recession dulot ng pandemya na kalahati anya ng naitalang 57.3% noong 2005.
Sa pinakabagong datos ng Bureau of the Treasury, sa naitalang 12.76 trillion peso outstanding debt ng gobyerno, hanggang noong Abril, tanging 30% o 3.83 trillion pesos lamang ang foreign borrowings.
Dinagsa ng libu-libong namamasyal ang muling pagbubukas sa publiko ng dolomite beach kasabay ng pagdiriwang ng ika-124 taong anibersaryo ng Araw ng Kalayaan, kahapon.
Magugunitang isinara ang dolomite beach sa Maynila para sa ikalawang yugto ng rehabilitasyon nito.
Bago pa man ang ingurasyon dakong alas-4 ng hapon, bumuhos na ang mga naghihintay sa muling pagbubukas ng nasabing pasyalan.
Ayon sa Department of Enviroment and Natural Resources (DENR), mahigpit pa ring ipatutupad sa dolomite beach ang health protocols kontra COVID-19, gaya ng pagsusuot ng face mask.
Samantala, aabot lamang sa 1,500 hanggang 3,500 na katao ang maaaring makapasok sa nabanggit na lugar sa piling mga oras.
Pansamantalang kinansela ng Manila International Airport Authority (MIAA) ang ilang domestic flights matapos ang muling pagsabog ng Bulkang Bulusan na nasa lalawigan ng Sorsogon.
Ayon sa MIAA, ang pagpapatigil ng biyahe sa paliparan ay alinsunod na rin sa panawagan ng Philippine Institute of Volcanology and Seismology (PHIVOLCS) na huwag na munang magpalipad ng eroplano malapit sa palibot ng Mt. Bulusan dahil delikado bunsod ng muling pag-aalburoto nito.
Kabilang sa mga nakansela ang flight ay ang Cebu Pacific 5J o 5J 325 at 326 Manila-Legazpi-Manila at 5J327 at 328 Manila-Legazpi-Manila; CEBGO o DG6111 at 6112 Manila-Naga-Manila at DG6117 at 6118 Manila-Naga-Manila; PAL Express o 2P 2923 at 2924 Manila-Legazpi-Manila maging ang 2P 2919 at 2920 Manila-Legazpi-Manila.
Sa ngayon, wala pang anunsiyo kung kailan ibabalik sa normal ang operasyon ng mga eroplano sa mga nakanselang lugar dahil sa Bulkang Bulusan.
Lumikas ang 145 pamilya matapos ang muling pag-alburoto ng Bulkang Bulusan sa lalawigan ng Sorsogon.
Ayon kay Arian Aguallo, Information officer ng Juban Municipal DRRM Office, ang nasabing bilang ng mga lumikas ay katumbas ng 469 na indibidwal mula sa Barangay Puting Sapa bunsod ng pagsabog ng Mt. Bulusan.
Sa ngayon, pansamantalang nanunuluyan sa Bayan ng Juban Evacuation Center at Tughan Evacuation Center ang mga lumikas na residente.
Samantala, sa naging pahayag ni Sorsogon Governor Senator-elect Francis ‘Chiz’ Escudero, pumalo na sa 2,877 pamilya o 11,374 personalidad ang naapektuhan ng ashfall sa Bayan ng Juban kabilang na diyan ang Casiguran, Magallanes, Castilla, Pilar at Sorsogon City sa Sorsogon Province.
Bukod pa sa nasabing mga lugar, apektado din ng phreatic eruption at ashfall ang Brgy. Añog, Puting Sapa, Bacolod, Buraburan, Catanusan, Calateo, Aroroy, at Rangas.
Asahan na bukas, Martes, ang pagpapatupad sa taas-singil sa presyo ng produktong petrolyo.
Sa anunsiyo ng ilang kumpaniya ng langis, maaaring tumaas ng ₱4.30 centavos hanggang ₱4.50 centavos ang kada litro ng diesel; habang ₱1.50 centavos hanggang ₱1.60 centavos naman ang dagdag-singil sa presyo ng kada litro ng gasolina.
Sa datos ng Department of Energy (DOE), simula noong Hunyo a-7 ang presyo ng kada litro ng gasolina ay tumaas ng ₱26.55 centavos; ₱36.85 centavos naman para sa diesel; at ₱33.10 centavos para sa kerosene.