HOT STORIES OF THE WEEK

Pansamantalang itinigil ang operasyon ng Metro Rail Transit Line o MRT-3 makaraang mahulog at masawi ang dalawang lalaki sa riles ng tren sa Pasay City malapit sa EDSA, Taft Station.

Base sa imbestigasyon ng mga otoridad, sakay ng isang motorsiklo, bumulusok mula sa Tramo Flyover ang magka-angkas na biktima.

Sa nakuhang impormasyon ng DWIZ, bandang alas-6:30 kagabi, galing South Super Highway ang mga biktima at tinatahak ang Aurora Blvd. Flyover sa nasabing lungsod nang bigla mawalan ng kontrol ang rider dahil sa madulas na kalsada.

Dito na tumilapon ang dalawa hanggang sa mahulog sa riles ng MRT-3 dahilan ng kanilang pagkamatay.

Sa pahayag ng MRT-3 Management, walang naging problema o naganap na breakdown sa sistema ng MRT.

Sa ngayon, patuloy pang inaalam ng mga otoridad ang pagkakakilanlan sa dalawang biktima at iniimbestigahan na rin kung nakainom ang mga ito bago mangyari ang aksidente.

Tuloy-tuloy ang paghahain ng diplomatic protest ng incoming Marcos Administration laban sa bansang China hanggat hindi tumitigil sa kanilang mga ginagawang iligal na aktibidad sa karagatang sakop ng Pilipinas.

Ayon kay incoming National Security Adviser Secretary Clarita Carlos, bahala nang umabot ng 10K ang protesta ng bansa kontra China basta’t ang mahalaga, maipakita sa kanila na labag sa International Law ang mga ginagawa nila sa West Philippine Sea.

Subalit nilinaw ni Carlos na magpapatuloy parin ang pakikipag-usap ng gobyerno sa Tsina at sa iba pang mga bansa na mayroon ding claims sa WPS.

Matatandaan na sinabi kamakailan ni Carlos na isusulong parin ng susunod na Administrasyong Marcos ang isang critical engagement sa China tulad na lamang ng pagbuo ng wholistic framework upang masiguro ang maayos na ugnayan ng dalawang bansa sa isyung politikal, social at cultural aspect.

Samantala, nakapaghain narin ng diplomatic protest ang Dept. of Foreign Affairs kontra China matapos mamataan sa Julian Felipe Reef noong nakaraang buwan ng Abril ang nasa mahigit 100 chinese vessels.

Pabor si Incoming DTI Secretary Alfredo Pascual na maghanap ng alternatibong sangkap sa paggawa ng tinapay.

Sa gitna ito ng pagtaas ng presyo ng tinapay dahil sa delay ng delivery ng raw materials mula sa ibang bansa.

Sa panayam ng DWIZ, sinabi ni Pascual na nakausap na niya ang presidente ng Bakers Association of the Philippines.

Isa sa napagpulungan ang paghahalo ng Coco flour sa sangkap ng paggawa ng tinapay.

Hamak na mas masustansiya anila ito kumpara sa mga kasalukuyang sangkap.

Tatlong ahensiya ng gobyerno ang bubuhusan ng pondo sa ilalim ng Administrasyon ni President-elect Ferdinand ‘Bongbong’ Marcos Jr.

Sa panayam ng DWIZ, sinabi ni Amenah Pangandaman, Incoming Secretary ng Department of Budget and Management na kinabibilangan ito ng Department of Education (DepEd), Department of  Agriculture (DA) at Micro, Small and Medium Enterprises (MSMEs).

Sa DepEd, tulong ang pondo para sa pagpapatuloy ng face-to-face classes, ayuda sa magsasaka at mangingisda sa DA at tulong sa maliliit na negosyo sa MSMEs.

Maliban sa tatlo, target din ng susunod na administrasyon na ipagpatuloy ang pamamahagi ng ayuda para sa pamilyang Pilipino.

Nakalabas na ng ospital ang security guard na sinagasaaan ng isang SUV sa Mandaluyong City noong nakalipas na linggo.

Sa video message ng biktimang si Christian Floralde, sinabi nito na masama pa rin ang kaniyang loob sa may-ari ng SUV na tinakbuhan pa siya matapos sagasaan ng dalawang beses.

Desidido pa rin naman si Floralde na ituloy ang kaso laban sa SUV driver.

Sa ngayon, hinihintay na lamang ng Mandaluyong Police ang ‘warrant’ mula sa korte para tuluyang maaresto ang suspek.

Nitong Biyernes, hindi muli dumalo sa pagdinig sa Land Transportation Office (LTO) ang suspek.

Ginugunita na ngayong araw ang ika-124 na taong anibersaryo ng araw ng kalayaan sa Pilipinas.

Ngayong umaga, pangungunahan ni Pangulong Rodrigo Duterte ang komemorasyon sa Rizal Park.

May tema ang pagdiriwang na “Kalayaan 2022: pag-suong sa hamon ng panibagong bukas.”

Maliban sa simultaneous flag-raising event, magsasagawa rin ng wreath-laying sa ilang national historical sites ang National Historical Commission of the Philippines (NHCP).

Iba’t ibang aktibidad rin ang isasagawa ngayong araw ng NHCP tulad ng job fair na lalahukan ng ilang local at overseas employers.

May tema naman itong  “Trabaho, Negosyo, Kabuhayan Fair” na maghahandog ng higit 90K trabaho sa mga Pilipino.

Isasagawa ang Job fair sa Metro Manila, La Union, Bulacan, Laguna, Mindoro, Bacolod, Cagayan De Oro, General Santos City, Tuguegarao, at Zamboanga City.

Magkakasa ng simultaneous flag-raising at wreath-laying sa ilang national historical sites ang National Historical Commission of the Philippines (NHCP), bukas June 12.

Ito ay bilang bahagi ng ika-124th selebrasyon ng Araw ng Kalayaan.

Ayon kay NHCP senior researcher Francis Kristoffer Pasion, isasagawa ito sa Barasoian Church sa Malolos, Bulacan, Andres Bonifacio Monument sa Caloocan City at Mactan Shrine sa lalawigan ng Cebu.

Samantala, pangungunahan naman ni Pangulong Rodrigo Duterte ang komemorasyon ng Araw ng Kalayaan sa Rizal Park.

Maliban dito, magsasagawa rin ng socio-civic parade, cultural shows at job fair sa Kawit, Cavite kung saan unang idineklara ni Pangulong Emilio Aguinaldo ang kalayaan ng bansa.

Inaasahang maipapamahagi na ang second tranche ng fuel subsidy program para sa mga Public Utility Vehicle (PUV) drivers at operators sa katupusan ng buwan o sa unang bahagi Hulyo.

Ayon kay LTFRB Executive Director Tina Cassion, inihahanda na ng ahensya ang mga dokumento para sa pamamahagi ng P6,500 fuel subsidy sa kanilang benepisyaryo.

Aniya, sa ngayon kasi, wala na sa limang libo mula sa 377,000 na benepisyaryo ang hindi pa nakakatanggap ng first trance ng nasabing tulong.

Pero nilinaw niya na tanging ang mga kasama lamang noong unang bahagi ng fuel subsidy ang makakatanggap ng panibagong ayuda.

Matatandaang hinati ng LTFRB sa dalawang tranche ang inilaang P5 bilyong subsidiya para sa mga nasa sektor ng transportasyon na apektado ng krisis sa langis.

Dapat na paigtingin pa ng susunod na administrasyon ang sektor ng agrikultura sa bansa.

Ito ayon kay Incoming National Economic and Development Authority (NEDA) chief Arsenio Balisacan sa pamamagitan ng pananaliksik at hindi pagdepende sa pag-aangkat sa ibang bansa para maabot ang food security sa gitna ng banta ng krisis sa pagkain.

Paliwanag niya na hindi naiintindihan ng mga mambabatas na hindi pwedeng dumepende lamang sa pag-iimport dahil iba’t iba ang kilima, mga peste at lupa ng mga bansa.

Binigyang diin ni Balisacan na dapat palakasin ang research and development sa naturang sektor para magkaroon ng farm modern varieties at new species na babagay sa mga lokasyon.

Bukod dito, nais din niya na mapalakas ang manufacturing sector sa rural areas para sa development projects.

Nakapagtala ang Department of Health (DOH) ng panibagong 287 nahawa sa COVID-19 kahapon.

Batay sa huling datos, bahagyang bumaba ang bilang ng aktibong kaso na nasa 2, 697 mula sa 2, 529 noong Biyernes.

Ang mga rehiyong nanguna sa nakapagtala ng kaso sa nakalipas na dalawang linggo ay ang NCR na may 1, 292; CALABARZON, 373; Central Luzon, 226; Western Visayas, 168; at Soccskargen, 107.

Nananatili naman sa 60, 461 ang bilang ng nasawi at 3, 629, 459 ang gumaling sa COVID-19.

Sa kabuuan, umabot na sa 3, 692, 617 ang COVID-19 cases sa bansa.