Magpapatuloy ang mga proyekto at programang sinimulan ni Pangulong Rodrigo Duterte.
Tiniyak ito ni President-elect Bongbong Marcos, tatlong araw bago ang kanyang opisyal na pag-upo sa Malakanyang.
Sa kanyang youtube channel, nagpasalamat din si Marcos kay Pangulong Duterte dahil sa pagsuporta nito sa kanya at kay Vice President-elect Sara Duterte-Carpio.
Magugunitang nagkita sina Marcos at Duterte sa inagurason ni Mayor Inday Sara sa Davao City noong Hunyo 19.
Asahan na bukas ang panibagong taas-presyo ng mga produktong petrolyo.
Ito, ayon kay Atty. Rino Abad, director ng Department of Energy Oil Industry Management Bureau, ay dahil sa paghina ng piso kontra dolyar.
Maglalaro sa P1.10 hanggang P1.30 ang inaasahang dagdag-presyo sa kada litro ng diesel.
P0.10 hanggang P0.20 naman maaaring maging dagdag o bawas sa kada litro ng gasolina habang walang inaasahang paggalaw sa presyo ng kerosene.
Sinimulan na ng Land Transportation Franchising and Regulatory Board (LTFRB) sa Davao Region ang pamamahagi ng final tranche ng fuel subsidy para sa mga driver at operators ng Public Utility Vehicle (PUVs).
Nabatid na aabot sa 628 operators ng utility vehicle express at 5,196 na taxi ang makikinabang sa subsidiya habang makakakuha naman ng panibagong card ang 708 public utility units na dati nang nagkaproblema sa pagtanggap ng subsidiya sa nabanggit na rehiyon.
Aabot sa 6,500 ang kabuuang matatanggap ng bawat benepisyaryo na makukuha naman sa kanilang mga card na gagamitin sa pagkarga ng gasolina at hindi ito maaaring i-convert bilang cash.
Nilinaw ng Energy Regulatory Commission (ERC) na wala na sa kanilang kamay ang desisyon sa kinakaharap na power outage sa Occidental Mindoro.
Ayon kay ERC Chairperson, Atty. Agnes Devanadera, ang Occidental Mindoro Consolidated Power Corporation (OMCPC) at Occidental Mindoro Electric Cooperative (OMECO) ang dapat mag-usap.
Ito’y dahil ang OMCPC at OMECO ang mayroong agreement pagdating sa pagsusupply ng kuryente sa lalawigan.
Naghahanda na sina President-elect Ferdinand “Bongbong” Marcos Jr. at kanyang pamilya at nasa proseso na ng paglipat sa Malakanyang upang maging first family.
Sa kanyang Youtube vlog, aminado si Marcos na bukod sa kanyang sarili, ang kanyang asawang si Liza at mga anak na sina Sandro, Simon at Vinny ay pawang nag-a-adjust sa kanilang mga paparating na bagong buhay bilang miyembro ng presidential family.
Kailangan anyang pansamantalang isuko ni Liza ang kanyang posisyon sa Law firm nitong M and Associates, na kanyang itinatag.
Inihahanda na rin ng panganay na anak nina Marcos na si Sandro ang kanyang bagong opisina para sa kanyang trabaho bilang kinatawan ng unang distrito ng Ilocos Norte.
Inamin din ni PBBM na panay reklamo na sina Simon at Vinny dahil sa biglaang pagdami ng kanilang security detail bagay na hindi naman anya maiiwasan kapag naging anak ng Pangulo.
Samantala, pinasalamatan naman ni PBBM si Pangulong Rodrigo Duterte sa opisyal na pagtatapos ng termino nito sa Huwebes, Hunyo 30.
Idineklara ng Vatican bilang kauna-unahang international shrine sa Pilipinas ang National Shrine of Our Lady of Peace and Good Voyage sa Antipolo City bilang kauna-unahang international shrine sa Pilipinas.
Sa website post ng Catholic Bishops’ Conference of the Philippines (CBCP) nito lamang linggo, mismong si Antipolo Bishop Francisco de Leon ang nag-anunsiyo ng magandang balita sa isang banal na misa para sa pagdiriwang ng ika-39 anibersaryo ng pagkakatatag ng Diocese sa Antipolo City.
Ayon kay de Leon, inaprubahan ng Vatican ang kanilang petisyon na pagkalooban ang naturang shrine ng pribilehiyo kung saan, hinihintay nalang ang kopya ng opisyal na deklarasyon ng Vatican hinggil dito.
Sakaling maibigay ang naturang kopya, ang Antipolo Cathedral ang magiging ikatlong international shrine sa Asya habang ang ito din ang magiging kauna-unahang Marian International Shrine sa Asya at ika-6 naman sa buong mundo.
Ang Simbahang Katolika ay mayroong tatlong uri ng Shrines, kabilang na dito ang Diocesan Shrines, na inaaprubahan ng Local Bishops; National Shrines na kinikilala ng Bishops’ Conference; at ang International Shrines na inendorso naman ng Vatican.
Wala pang naitatala na security threats ang Philippine National Police (PNP), tatlong araw bago ang inagurasyon ni incoming President-elect Ferdinand Marcos Jr.
Pero, ayon kay PNP spokesperson police colonel Jean Fajardo, patuloy pa ring nakikipag-ugnayan ang kanilang ahensya sa iba pang region forces para masiguro na nava-validate nito ang mga maling impormasyon.
Gayundin para makapagtalaga ng angkop na security measures upang mapigilan ang anumang pagtatangka sa nalalapit na inagurasyon.
Samantala, sinabi ni Fajardo na all set na ang PNP para rito kung saan nasa mahigit 15,000 security personnel ang kanilang idedeploy.
Nabatid na manunumpa si Marcos Jr. bilang ika-17 Pangulo ng bansa sa Hunyo 30 sa National Museum of the Philippines sa Ermita, Maynila.
Tumaas pa ang mga kaso ng dengue sa NCR at sa iba pang bahagi ng bansa sa gitna ng patuloy na banta ng COVID-19.
Batay sa datos ng Department of Health (DOH), umabot sa 3,048 ang naitalang mga kaso mula noong January hanggang May 2022.
Sa Cagayan Valley, nasa 317 mga kaso ng dengue ang naiulat mula January hanggang ngayong buwan kung saan umabot na sa 186 ang kabuuang bilang ng mga tinamaan na may edad isa hanggang 18, habang tatlo ang nasawi kabilang na ang isang bata.
Umabot naman sa 1,254 ang bilang ng dengue cases sa Cebu City kung saan 16 na ang namatay na karamihan ay mga bata.
Sa Isabela, nasa 1,149 ang naitalang dengue cases mula Enero hanggang Mayo habang 315 mga kaso sa Zamboanga City.
Samantala, 13 sa 17 rehiyon sa bansa ang nakitaan ng pagtaas ng mga kaso ng dengue kumpara sa kaparehong time period noong 2021.
Hinimok ni Pangulong Rodrigo Duterte ang papalit sa kanyang pwesto sa pagkapangulo sa bansa na si President-elect Bongbong Marcos Jr. na ipagpatuloy ang pagpapabuti sa sistema ng tren sa bansa.
Ito ang inihayag ng Pangulo sa naganap na opening ng Philippine National Railways (PNR) Lucena-San Pablo Commuter Line na magpapaikli sa oras ng biyahe sa pagitan ng San Pablo, Laguna at Lucena, Quezon mula sa isang oras hanggang 30 minuto.
Aniya ang epektibong mass transportation system ay hindi lamang nakapagpapalakas sa kalakalan sa pagitan ng rural at urban areas kundi pati ng turismo.
Ipinagbabawal na ang aborsyon o pagpapalaglag ng sanggol sa Amerika alinsunod sa inilabas na kautusan ng United States Supreme Court (USSC).
Sa botong lima mula sa siyam na hukom ng Korte ng Estados Unidos binaligtad ang desisyong Roe vs Wade noong 1973 na nagsasabing protektado ng konstitusyon ng US ang karapatan ng mga babae na magpalaglag.
Ito’y kung saan batay sa lumang batas maaaring ipalaglag ng isang babae ang kanyang ipinagbubuntis na sanggol sa unang tatlong buwan ng pagbubuntis nito.
Ayon sa ulat ng Planned Parenthood, isang healthcare organization na nagbibigay ng aborsyon, aabot sa 36M kababaihan ang maaapektuhan ng mawawalan access sa aborsyon.
Samantala, nasa 13 estado ng nasabing bansa naman ang maaapektuhan ng bagong batas.