HOT STORIES OF THE WEEK

Dapat umanong maturukan na ng booster dose ang mga bata nasa edad 12 hanggang 17 na magbabalik eskwela na sa Agosto.

Ito ang hiniling ni Presidential Adviser for Entrepreneurship Joey Concepcion makaraang ipagpaliban ng gobyerno ang pagtuturok ng unang booster dose para sa mga batang non-immunocompromised matapos magkaroon ng problema sa Health Technology Assessment Council (HTAC).

Sinabi ni Concepcion na kailangang masiguro ang kaligtasan ng mga bata sa pagbalik ng klase.

Ayon kay National Vaccination Operations Center (NVOC) Chairperson and Health Undersecretary Dr. Myrna Cabotaje, naglatag ng kondisyon ang HTAC kung saan binanggit na maaari lamang mabigyan ng booster shot ang nasabing age group kung nakaabot na sa 40% ang booster coverage ng mga senior citizen.

Pansamantala munang lilimitahan ng Metropolitan Manila Development Authority (MMDA) ang operasyon sa Pasig River Ferry Service (PRFS) sa Hunyo a-30.

Ito ay bilang pagbigay daan sa inagurasyon ni incoming President Ferdinand “Bongbong” Marcos Jr.

Ayon sa MMDA, magiging limitado ang operasyon mula Pinagbuhatan Station hanggang Sta. Ana station.

Samantala, magpapatupad naman ang Philippine Coast Guard (PCG) ng “No Sail Zone” sa ilang bahagi ng Ilog Pasig sa araw ng inagurasyon.

Sakop ng “No Sail Zone” ang Pier 13 Muelle de San Francisco, Port Area Manila, Mabini Bridge, Ayala Bridge, at Malacañang.

Patuloy na minomonitor ng mga tauhan ng metropolitan Manila Development Authority (MMDA) ang sitwasyon ng trapiko sa Timog Flyover Southbound.

Ito ay matapos isara noong Sabado ang nasabing lugar upang bigyang-daan ang pagkukumpuni sa mga sirang kalsada na tatagal sa loob ng isang buwan.

Katuwang ng MMDA sa mahigpit na pagbabantay ang mga kinatawan ng Department of Public Works and Highways (DPWH), PNP Highway Patrol Group (PNP-HPG), at Inter-Agency Council for Traffic (I-ACT).

Ayon kay MMDA Chairman Atty. Romando Artes, naglagay sila ng karagdagang mga tauhan na magmamando sa daloy ng trapiko sa mga apektadong lugar.

Bukod pa dito, pinaigting din ng ahensya ang clearing operation para alisin ang mga nakahambalang at iligal na nakaparking sa mga pangunahing kalsada.

Naglagay na rin ang MMDA ng karagdagang directional signages bilang gabay sa mga motorista sa mga alternatibong ruta.

Sa datos ng MMDA Traffic Engineering Center, nasa mahigit 100K sasakyan kada araw ang dumaraan sa nabanggit na lugar.

Nasa 57,354 naman na mga sasakyan ang gumagamit sa Flyover habang 51,770 naman na mga sasakyan ang dumaraan sa Service Road.

Epektibo na ngayong araw ang ika-apat na sunod na linggong taas-singil sa presyo ng produktong petrolyo.

Ayon sa ilang kumpaniya ng langis, ipatutupad ang P1. 65 centavos na dagdag-singil sa presyo sa kada litro ng diesel; nasa P.50 centavos naman ang taas-singil sa presyo ng kada litro ng gasolina; at P.10 centavos naman ang magiging singil sa kada litro ng kerosene.

Una nang nagpatupad ng taas-singil sa presyo ng langis kaninang alas-12 ng madaling araw ang kumpaniyang Caltex habang kaninang alas-6 ng umaga naman nagpatupad ng taas-singil sa presyo ng langis ang kumpaniyang Pilipinas Shell at Seaoil.

Samantala, magpapatupad din ng kaparehong presyo ang Cleanfuel mamayang alas-8 ng umaga.

Sa datos ng Department of Energy (DOE) noong Hunyo a-21, ang year-to-date adjustments stand at net increase sa produktong petrolyo ay pumalo na sa P29. 50 centavos sa kada litro ng gasolina; P44. 25 centavos sa kada litro ng diesel; habang P39. 65 cenatavos naman sa kada litro ng kerosene.

Nagsimula na ang anim na araw na gun ban sa Metro Manila bilang paghahanda sa inagurasyon ni President-Elect Ferdinand Marcos Jr. sa Hunyo 30.

Ayon sa Philippine National Police (PNP), epektibo ang gun ban hanggang July para mapigilan ang mga pagbabanta sa gaganaping inagurasyon.

Sa ngayon, nangangalap pa ang ahensya ng impormasyon at plano para sa guidelines ng pagpapatupad ng gun ban, kabilangna ang rerouting at traffic plans.

Magkakaron din bukas ng Inter Agency Press Conference upang pag-aralan ang mga guidelines para sa paghahanda sa oath-taking ng bagong pangulo.

Ipinanawagan ni House Strategic Intelligence Committee Chair at Surigao Del Sur Representative Johnny Pimentel sa gobyerno na alisin na ang suspensyon ng gas at oil drilling activities sa Recto Bank sa West Philippine Sea (WPS) dahil sa tapos na aniya ang pag-uusap ukol dito.

Sa ganito aniyang paraan aniya ay maaari na magpatuloy sa drilling o paghuhukay ang pribadong sektor na kinontrata ng gobyerno ng bansa upang bumuo ng Offshore Sampaguita Gas Discovery sa Recto Bank

Samantala, hinihimok naman ni House Ways and Means Chair Joey Salceda ang susunod na administrasyon na muling i-calibrate ang mga tuntunin sa joint development efforts sa China ukol sa mga asset sa WPS. —sa ulat ni Tina Nolasco (Patrol 11)

Pinayuhan ng Philippine National Police (PNP) ang mga manonood na iwasang magdala ng mga bagpack sa inagurasyon ni President-Elect Ferdinand Marcos Jr. sa National Museum sa Hunyo 30.

Ayon kay PNP Director for Operations Police Major General Valeriano De Leon, inaasahan nila na marami ang pupunta para masaksihan ang oath-taking ng bagong pangulo.

Sinabi pa niya na wala pang naitatalang seryosong banta ang ahensya kaugnay sa inagurasyon.

Samantala, pinayuhan rin ni De Leon ang mga may sakit o health conditions na huwag nang pumunta sa aktibidad at manood na lamang ng oath-taking sa television.

Nagkasa ng rehearsal para sa civic at military parade ang iba’t ibang pwersa ng Armed Forces of the Philippines (AFP) at Philippine National Police (PNP) kaugnay sa nalalapit na inagurasyon ni President-Elect Ferdinand “Bongbong” Marcos Jr. sa June 30.

Nagsimula ang martsa sa bahagi ng Maria Orosa na kinabibilangan ng mga tauhan ng Philippine Coast Guard (PCG), mga pulis mula sa PNP, Philippine Navy, Philippine Air Force (PAF) at Philippine Military Academy (PMA).

Layunin ng rehearsal na matiyak ang kahandaan ng mga security forces para sa inagurasyon.

Muli namang magkakasa ng rehearsal ang mga anturang ahensya sa Miyerkules o bisperas ng panunumpa ng bagong pangulo ng bansa.

Sinimulan na ng Philippine Coast Guard (PCG) ang paglilibot sa Manila Bay at Pasig River upang tiyakin ang seguridad sa nalalapit na ingurasyon ni President-elect Ferdinand Marcos Jr. sa June 30.

Ayon kay PCG Spokesperson Commodore Armand Balilo, nakatakda silang mag-deploy nang mas marami pang tauhan bukas.

Dagdag niya, mayroon ding Multi-Role Response Vessels (MRRV) na itatalaga sa magkakaibang shift.

Una nang sinabi ng PCG na magpapatupad ito ng no-sail zone sa bahagi ng Pasig River malapit sa Malacañang sa naturang araw.

Sinabi rin ni Lieutenant Commander Michael Encina na ang pagsasara ng Malacañang Restricted Area ay magmumula sa Hospicio De San Jose hanggang sa Pureza, Santa Mesa, Manila.

Tatlong araw bago matapos ang termino, nagpasalamat si Pangulong Rodrigo Duterte sa mga Pinoy na sumupota sa kanya maging ang mga dumalo sa thanksgiving event para sa kanya sa quirino grandstand, sa Maynila, kagabi.

Bukod sa mga music artist na nagtanghal sa “Salamat PRRD” concert, sumentro rin ang nasabing aktibidad sa mga tagumpay ni Pangulong Duterte sa nakalipas na anim na taon.

Kabilang sa mga nag-perform ang rapper na si Andrew E., Ice Seguerra, Dulce at Martin Nievera.

Nagkaroon din ng fireworks display at drone show kung saan itinampok ang mukha ng Pangulo at ang “fist symbol.”

Sa pagtatapos ng event, nag-perform si Pangulong Duterte at inawit ang kanyang paboritong kantang “Ikaw” kasama si Nievera.