Isinusulong ni Parañaque 2nd District Rep. Brian Yamsuan ang House Bill 9472, na layong lumikha ng isang permanenteng “Pondo para sa Pagbabago at Pag-asenso” o P3 Program na magbibigay ng pautang na may mababang interes at walang kolateral sa maliliit na negosyo, kabilang ang mga may-ari ng sari-sari store, karinderya, at mga tindero sa palengke.
Layon nitong mailigtas ang mga micro at small entrepreneurs (MSEs) sa mga money lenders o mga nagpapautang ng “five-six” at mabigyan sila ng access sa patas na capital at easy-to-pay terms.
Ayon kay Yamsuan, marami pa ring maliliit na negosyo ang nabibiktima ng mga “5-6” at online lenders na naniningil ng mataas na interes at gumagamit ng mapang-abusong paraan para gipitin ang ating mga kababayan.
Aniya, umaabot sa 20 percent ang rate ng pangongolekta kada buwan ng mga “five-six” lenders, dahilan para mabaon sa utang ang mga ordinaryong Pilipino.
Sa ilalim ng panukala, lilikhain ang “P3 Fund” na magpapautang sa mga kwalipikadong negosyante na may 1 percent interes kada buwan.
Naniniwala si Yamsuan na ang tuloy-tuloy na pagpopondo sa P3 ay magbibigay ng mas madaling access sa legal at abot-kayang pautang, na makatutulong para mapalago ang kabuhayan ng mga micro at small entrepreneurs na bumubuo ng malaking bahagi ng mga negosyo sa bansa.
Sakaling maisabatas, posibleng umabot sa 90 percent ang magbebenepisyo sa naturang programa.
