Ilang kalsada sa Lungsod ng Maynila ang isasara o sarado na ngayong araw upang magbigay-daan sa posibleng kilos-protesta ng United People’s Initiative.
Ayon sa Manila Public Information Office, isinara na kaninang hatinggabi ang Mendiola, partikular ang kahabaan ng C-M Recto Avenue mula Nicanor Reyes hanggang Mendiola Street; at Legarda Street mula Figueras Street hanggang San Rafael Street.
Sarado na rin kaning hatinggabi ang Ayala Bridge at ang Ayala Boulevard eastbound mula San Marcelino Street hanggang Romualdez Street.
Samantala, isasara rin ang mga sumusunod na kalsada sa paligid ng Liwasang Bonifacio simula mamayang alas-dos ng hapon:
Magallanes Drive mula Jones Bridge hanggang MacArthur Bridge
MacArthur Bridge southbound mula Plaza Lacson hanggang Liwasang Bonifacio
Quezon Boulevard southbound mula A. Mendoza Street at Fugoso Street hanggang Quezon Bridge
Lerma Street southbound mula España Boulevard hanggang A. Mendoza Street.
Kaugnay nito, inaabisuhan ng Manila LGU ang mga motorista na planuhin ang kanilang mga biyahe, iwasan ang mga nabanggit na mga kalsada hangga’t maaari, at dumaan sa mga alternatibong ruta upang maiwasan ang abala. | Sa panulat ni Anjo Riñon
