HOT STORIES OF THE WEEK

Naitala ng Department of Health (DOH) kahapon ang pinakamataas na bilang ng aktibong kaso ng COVID-19 simula noong Abril a-29.

Ayon sa DOH, sumampa sa 7,192 ang aktibong kaso ng COVID-19 sa bansa habang 576 naman ang bagong COVID-19 cases ang naitala kahapon, dahilan para pumalo na sa kabuuang 3, 702, 319 ang caseload.

Umakyat naman sa 3, 634, 596 ang gumaling habang mayroong 13 nadagdag sa death toll kaya’t umabot na sa 60, 531 ang nasawi.

Nangunguna pa rin ang Metro Manila sa mga rehiyong may pinaka-maraming bagong COVID-19 cases sa nakalipas na dalawang linggo, na may 4,078; sinundan ito ng CALABARZON, na may 1,448; Western Visayas, 717; Central Luzon, 552 at Central Visayas, na may 400.

Mananatili ang National Capital Region (NCR) at ilang bahagi ng bansa simula July 1-15, 2022.

Ito ay base sa desisyon ng Inter-Agency Task Force (IATF).

Kasunod nito, gumamit ng bagong matrix ang IATF sa pagtukoy ng Alert Level system na Alert classifiction sa provinces, Highly Urbanized, Independent Component Cities (ICCS), component cities and municipalities.

Ayon kay acting presidential spokesman Martin Andanar, kabilang dito ang mga sumusunod;

Sa Cordillera Administrative Region: ang Abra, Apayao, Kalinga, Mountain Province, at Baguio City;

Sa REGION 1: Ilocos Norte, Ilocos Sur, La Union, Pangasinan, at Dagupan City;

Sa REGION 2: Batanes, Cagayan, Isabela, Quirino,Nueva Vizcaya  at City of Santiago;

Sa REGION 3: Aurora, Bataan, Bulacan, Nueva Ecija, Pampanga, Tarlac, Zambales, Angeles City, at  Olongapo City;

Sa REGION 4-A: Batangas, Cavite, Laguna, Rizal, at Lucena City;

Sa REGION 4-B: Marinduque, Oriental Mindoro, Romblon, at Puerto Princesa City; at

Sa REGION 5: Albay, Catanduanes, Naga City at Sorsogon.

Sa Visayas, ang mga lugar sa isasailalim sa Alert Level 1 ay ang mga sumusunod;

Sa REGION 6; Aklan, Capiz, Guimaras, Iloilo Province, Bacolod City, at Iloilo City;

Sa REGION 7: Siquijor, Cebu City, Lapu-Lapu City, at Mandaue City

Sa REGION 8: Biliran, Eastern Samar, Southern Leyte, Ormoc City, at Tacloban City;

Gayundin sa Mindanao sa Region 9 ang Zamboanga City;

Sa REGION 10: Camiguin, Bukidnon, Misamis Oriental,Misamis Occidental,  Cagayan De Oro City, at Iligan City;

Sa REGION 11: Davao City at Davao Oriental

REGION 12: South Cotabato

Sa CARAGA: Surigao Del Sur, Butuan City, Agusan Del Norte at Agusan Del Sur.

Ang mga lugar naman na isasailalim sa Alert Level 2 simula a primero hanggang  Hulyo 15, nang walang prejudice mula sa kanilang siyudad at munisipalidad ay ang mga sumusunod;

• BENGUET
• IFUGAO
• QUEZON PROVINCE
• OCCIDENTAL MINDORO
• PALAWAN
• CAMARINES NORTE
• CAMARINES SUR
• MASBATE
• ANTIQUE
• NEGROS OCCIDENTAL

Igagalang ng Philippine National Police ang karapatan ng mga magkakasa ng kilos protesta sa mismong araw ng inagurasyon ni President-elect Ferdinand “Bongbong” Marcos Jr., sa Hunyo a-30.

Ito ay kung restespetuhin din nila ang karapatan ng ibang mga mamamayan sa kapayapaan at kaayusan.

Paalala ito ni PNP Director for Operations Police Major General Valeriano de Leon, kasabay ng pagbibigay diin na mandato ng PNP na siguraduhin na hindi makaka-abala sa ibang tao ang pagpapahayag ng saloobin ng mga grupong may lehitimong hinaing.

Pinayuhan din ni de Leon ang mga magsasagawa ng kilos protesta na huwag nang magpumilit na lumapit sa National Museum inauguration site, dahil mayroon na aniyang mga freedom park tulad ng Plaza Miranda, Plaza Dilao, at Liwasang Bonifacio.

Malaya aniya silang magtipon dito na wala nang permit, pero mayroong mga naka-deploy na Civil Disturbance Management Units para pigilan sila kung magtatangkang lumabas sa kanilang “designated area”.

Pakiusap ni de Leon, may mga dayuhang bisita sa aktibidad at nanonood ang buong mundo sa makasaysayang kaganapan, kaya sana ay panatilihing maayos at mapayapa ang pagpapahayag ng saloobin.

Dapat masusing tingnan ng Department of Agriculture ang sinasabing negatibo o hindi magandang epekto sa mga magsasaka ng Rice Tarrification Law o Republic Act 11203.

Ito ang panawagan ni senator Lito Lapid kay outgoing agriculture secretary William Dar sa ipinadala nitong liham sa kalihim kahapon.

Pinatutukoy rin ni Lapid kay Dar ang mga posibleng amendments o dapat rebisahin sa nasabing batas.

Isinagawa ng senador ang hakbang makaraang magpasaklolo sa kanya ang mga magsasaka at farm worker hinggil sa negatibong epekto ng Rice Tarrification Law.

Bagaman patapos na anya ang termino ni Dar, dapat nitong suriing maigi ang naging implementasyon ng naturang batas na nagdulot ng pasakit sa maraming magsasaka.

Ito’y upang mabigyan ng gabay ang susunod na administrasyon kung paano ma-i-sasaayos ang naturang programa para sa kapakanan ng sektor ng agrikultura. —mula sa ulat ni Cely Ortega-Bueno (Patrol 19)

Nagpaalam na sa mga opisyal at mga empleyado ng Manila City Hall si Mayor Isko Moreno kasunod ng pagtatapos ng kaniyang termino bilang Alkalde ng Lungsod sa Hunyo a-30.

Kasabay nito, nanawagan si Moreno sa mga residente na suportahan ang papasok na administrasyon ni Mayor-elect Honey Lacuna sa ilalim ng papasok na administrasyon sa pamumuno ni incoming President Ferdinand “Bongbong” Marcos, Jr.

Pinasalamatan ni Moreno ang walang sawang sumuporta at naglingkod sa ilalim ng kaniyang pamumuno.

Sa kabila nito, nangako si Moreno sa mga Manileño na kaniyang ipagpapatuloy ang pagtulong sa Lungsod bilang isang pribadong mamamayan.

Planong muling ihain ni Senator Ronald “Bato” Dela Rosa ang kanyang Mandatory ROTC o Reserve Officers’ Training Corps Bill sa pagpasok ng 19th Congress sa Hulyo a-25.

Ayon kay Dela Rosa, ang ROTC Bill na kaniyang ihahain ay mild version lang kumpara sa Mandatory 2-year military service na isinusulong ni Vice President-elect Sara Duterte-Carpio.

Layunin ng naturang panukala na magkaroon ng ROTC Program sa Grade 11 at 12 sa mga pampubliko at pribadong paaralan.

Matatandaang noong 2002, naging optional ang mandatory Military Training sa kolehiyo kasunod na rin ng pagkamatay ni University of Santo Tomas Student Mark Chua na napaslang umano ng mga opisyal ng ROTC matapos niyang ibunyag ang irregularidad sa paghawak ng pondo nito.

Tumaas sa 5.9% ang COVID-19 positivity rate sa Metro Manila sa gitna ng patuloy na pagtaas ng bilang ng nagkakasakit.

Ayon kay OCTA research group fellow, Dr. Guido David, ang nasabing bilang ay naitala noong June 25 kumpara sa 3.9% noong June 19 at 5.6% noong June 22.

Ang positivity rate ay tumutukoy sa porsyento ng mga taong nagpopositibo sa COVID-19 sa kabuuang bilang ng mga indibidwal na nasuri.

Inihayag ni David na sumirit na rin sa 11.9% ang positivity rate sa lalawigan ng Rizal mula sa 6.3%; Laguna, 7.5% mula sa 3.1% at Cavite, 6% mula sa 3.6%.

Gayunman, wala pa naman anyang dapat ikabahala ang publiko at hindi pa kailangang itaas sa moderate risk o ang Alert level status sa bansa, lalo’t kontrolado pa ang sitwasyon.

Hinihintay nalang ng Department of Tourism (DOT) ang bagong guidelines o health protocols na ipatutupad ng susunod na administrasyon sa ilalim ng pamumuno ni incoming President Ferdinand “Bongbong” Marcos Jr.

Ayon kay DOT Secretary Christina Garcia-Frasco, kabilang sa kanilang inaasahang magpapatuloy ang mask mandate.

Sinabi ni Frasco na sa tulong ng ipinatutupad na health protocols laban sa COVID-19 ng Department of the Interior and Local Government (DILG) at Inter-Agency Task Force (IATF), mas mapapataas pa ang turismo at ekonomiya ng bansa.

Naka-alert status na ang buong Philippine National Police (PNP) ilang araw bago ang inagurasyon ni incoming president Ferdinand “Bongbong” Marcos Jr.

Ayon kay PNP Spokesperson Col. Jean Fajardo, mas maghihigpit ang kanilang ahensiya para sa seguridad ng publiko kasabay ng pag-upo ng susunod na pangulo ng bansa.

Sinabi ni Fajardo na “All Systems Go” na ang kanilang ahensya para sa Oath Taking Ceremony ni PBBM na gaganapin sa National Museum.

Iginiit ni Pangulong Rodrigo Duterte na hindi mawawala ang kurapsiyon sa gobyerno na malaking problema ng bansa.

Ayon kay Duterte, naaapektuhan ang bansa dahil nasisilaw sa pera ang mga opisyal dahilan kaya nagkakaroon ng kurapsiyon sa mga ahensya ng gobyerno.

Matatandaang July 2021 nang ihayag ni Duterte na hindi mapupuksa ang kurapsyon sa pamahalaan sa loob ng isang araw lang dahil talamak na ito partikular na sa mga opisyal.

Sinabi pa ng Pangulo na tinanggal na niya sa pwesto ang ilang corrupt na opisyal sa Bureau of Customs (BOC) at Bureau of Immigration (BI).