HOT STORIES OF THE WEEK

Magsasagawa ng inspeksiyon sa mga motorista ang mga tauhan ng Philippine National Police (PNP) hinggil sa nalalapit na inagurasyon ni incoming President Ferdinand “Bongbong” Marcos Jr. sa Hunyo a-30.

Ayon kay PNP officer-in-charge PLT.Gen. Vicente Danao Jr., kanilang isasalang sa inspeksiyon ang lahat ng mga motorista o sasakyang dadaan sa mga kalsadang patungo sa lugar na pagdarausan ng inagurasyon ni PBBM.

Sinabi ni Danao, na tanging ang mga nasa guest list lamang na may “confirmed attendance” ang papayagang makapasok sa National Museum.

Nilinaw ni Danao na maging ang mga guest at  kanilang mga staff na dadalo sa inugurasyon ay isasalang din sa mahigpit na security check.

Samantala, nanawagan naman si PNP PIO Chief PLT.Gen. Roderick Alba sa mga dadalo sa nasabing event na huwag magdala ng mga prohibited items kabilang na ang mga sumusunod:

• backpacks at malalaking bags
• mga matutulis na bagay katulad ng cutters, blades, kutsilyo at iba pa.
• alak at yosi
• ibat-ibang klase ng kemikal
• fireworks at pyrotechnics

Inihihirit ng grupo ng transportasyon ang P3 provisional increase sa minimum fare sa mga pampasaherong jeep bunsod ng walang puknat na pagtaas sa presyo ng langis sa international market.

Kabilang sa P3 taas-singil sa pasahe ang P1 hike sa minimum fare na ipinagkaloob ng Land Transportation Franchising and Regulatory Board (LTFRB) para sa mga pampasaherong jeep sa National Capital Region (NCR), Central Luzon, mga lugar na sakop ng Region 4A at Region 4B.

Nabatid na limang transport groups ang naghain ng petisyon sa LTFRB noong Hunyo a-8 para sa 1 peso hike bilang tugon sa problema ng mga tsuper at operators na napilitang magtigil-pasada dahil ang malaking halaga sa kanilang kinikita ay napupunta lamang sa gasolina.

Inihayag ng Department of the Interior and Local Government (DILG) na dapat fully vaccinated ang mga dadalo sa inagurasyon ni incoming President Ferdinand “Bongbong” Marcos Jr. sa Hunyo a-30.

Ayon kay DILG Undersecretary Jonathan Malaya, kailangang magdala ng vaccine card ang BBM supporters na pupunta sa National Museum.

Sinabin ni Malaya na mahigpit pa rin nilang pinaiiral ang health protocols tulad ng pagsusuot ng face mask, social distancing at pagdi-disinfect ng mga kamay.

Layunin ng ahensya na hindi maging superspreader event ang makasaysayang event kaya’t dapat mapanati ang pagsunod sa minimum public health protocols.

Excited nang makabalik sa Palasyo ng Malacañang ang dating First Lady at ina ni incoming President Ferdinand “Bongbong” Marcos Jr. na si Imelda Marcos.

Sa naging pahayag ni Senator Imee Marcos, ang kaniyang ina ang pinaka- excited sa pagbalik sa palasyo matapos ang 36 na taon.

Matatandaang halos dalawang dekada na naging tahanan ng Pamilya Marcos ang Malacañang subalit napaalis sila sa Palasyo dahil sa EDSA People Power Revolution noong February 1986.

Sinabi ng Senadora na kanilang susundin kung ano ang gusto ng kanilang ina na saktong magdiriwang din ng ika-93 kaarawan sa Hulyo a-2.

Nakatakdang isagawa ang panunumpa ni BBM bilang ika-17 Pangulo ng Republika ng Pilipinas sa Hunyo a-30 kasabay ng pagtatapos ng termino ni Pangulong Rodrigo Duterte.

Papayagang makalapit sa National Museum sa Maynila ang mga supporters ni President-Elect Ferdinand ‘Bongbong’ Marcos Junior, para sa inagurasyon nito sa katapusan ng Hunyo.

Ayon kay Manila Police District Public Information Office Chief, Police Major Philip Ines, mayroong inilaang pwesto ang pulisya para sa pro-Marcos supporters.

Matatagpuan ito malapit sa golf course ng Intramuros na kayang mag-cater ng humigit-kumulang 200,000 katao.

Para sa mga anti-Marcos na walang permit, pinayagan ng MPD na makapag-rally ang mga ito sa Plaza Miranda, Plaza Dilao, at Liwasang Bonifacio.

Aabot sa 15,000 security personnel ang ide-deploy ng PNP para sa inagurasyon ni PBBM.

Idineklara ng lokal na pamahalaan ng San Juan City ang Hunyo a-30 bilang Special Non-Working Holiday sa lungsod.

Ayon kay San Juan City Mayor Francis Zamora, ito ay upang matiyak ang kaligtasan ng mga mamamayan at ang maayos na daloy ng trapiko sa araw ng panunumpa ni incoming President Ferdinand ‘Bongbong’ Marcos Jr.

Alinsunod na rin aniya ito sa panawagan ng Philippine National Police sa mga lungsod na malapit sa Maynila na magdeklara ng holiday sa Hunyo a-30.

Una nang nagdeklara si outgoing Manila Mayor Isko Moreno ng Special Non-working Holiday sa Lungsod ng Maynila para sa inagurasyon ni Marcos, na nakatakdang manumpa bilang ika-17 pangulo ng Pilipinas sa National Museum of the Philippines.

Umabot na sa mahigit 45K ang naitalang kaso ng Dengue sa bansa mula January 1 hanggang June 11, 2022.

Ang nasabing bilang ay mas mataas ng 45% kumpara sa naitalang kaso sa kaparehong panahon noong 2021.

Ayon sa Department of Health, mula Mayo a-15 hanggang Hunyo a-11, ay naitala ang 11,680 kaso ng Dengue.

Pinakamaraming kasong naitala sa nasabing panahon ang Central Luzon, na may 1,742; Central Visayas, 1,496; at Western Visayas, 962.

Samantala, sa 17 rehiyon, 15 ang nalampasan na ang alert o epidemic threshold sa nakalipas na apat na linggo.

Kabilang sa mga rehiyong ito ang Cagayan Valley, Central Luzon, CALABARZON, MIMAROPA, Bicol region, Western Visayas, Central Visayas, Eastern Visayas, Zamboanga Peninsula, Northern Mindanao, Davao region, Soccsksargen, National Capital Region, BARMM, at CAR.

Naitala rin ng DOH ang 217 na nasawi dahil sa dengue, kung saan 39 dito ay naitala noong Enero, 37 noong Pebrero; 34 noong Marso; 45 noong Abril, 58 noong Mayo; at 4 ngayong Hunyo.

Inihayag ng Private Hospitals Association of the Philippines Inc. (PHAPi) na maaaring doble pa sa naiuulat na kaso ng COVID-19 sa Pilipinas ang tunay na bilang nito.

Ayon kay PHAPi president Dr. Jose de Grano, ito ay posibleng dahil sa kakulangan sa COVID-19 testing, at itinuturing na lamang ng karamihan na regular flu ang COVID-19.

Sa kabila naman ng pagtaas ng mga kaso, sinabi ni de Grano na nananatiling manageable ang Hospital Utilization Rate ng bansa, at karamihan sa mga kaso ay mild o asymptomatic lamang.

Ipinunto naman ni de Grano ang kahalagahan ng pagsunod sa minimum public health standards, partikular ang pagsusuot ng face masks at paigtingin ang pagtuturok ng booster shot sa bansa.

Tinamaan ng COVID-19 si outgoing Parañaque City Mayor Edwin Olivarez.

Ayon kay Fernando Soriano, officer-in-charge ng Office of the City Administrator, asymptomatic ang Alkalde at naka-isolate na rin.

Fully vaccinated na aniya si Olivarez at nakatanggap na rin ng booster shot.

Nagsasagawa na ngayon ang City Epidemiology and Surveillance Unit ng contact tracing at mino-monitor na ang mga nakasalamuha ng Alkalde.

Pinayuhan naman ang mga naging close contacts ng Outgoing Mayor na obserbahan ang kanilang mga sarili, mag-isolate, at agad na humingi ng medical assistance sakaling makaramdam ng sintomas ng COVID-19.

Aabot sa mahigit 792,000 na healthcare workers, senior citizens, immunocompromised at mga indibidwal na may comorbidities ang nakatanggap na ng kanilang second booster ng COVID-19 vaccine.

Ayon kay Health Undersecretary Maria Rosario Vergeire, hanggang nitong Hunyo a-27 ay umabot na sa 70.5 milyong Pilipino ang fully vaccinated na laban sa nakahahawang sakit.

Sa nasabing bilang, mahigit 9.5 million ang adolescents at 3.4 milyon naman ang mga bata.

Papalo naman sa 15M indibidwal ang nabigyan na ng first booster shot.