HOT STORIES OF THE WEEK

Nagpasalamat ang National Center for Commuter Safety and Protection (NCCP) sa pamahalaan sa dalawang pisong dagdag-pasahe sa mga jeep sa bansa.

Simula kasi bukas, July 1, nasa 11 pesos na ang minimum na pamasahe sa jeep sa Metro Manila gayundin sa Region 3 at Region 4.

Ayon kay NCCP Chairperson Elvira Medina, maluwag na tinatanggap ng kanilang grupo ang taas-pasahe dahil naiintindihan nila aniya ang sitwasyon ng mga drayber.

Nabatid na naghain ng petisyon para sa naturang pasahe ang mga tsuper kasunod ng walang humpay na pagsirit ng presyo ng produktong petrolyo.

Nagpaabot ng pagbati si Pope Francis kay President-Elect Ferdinand ‘Bongbong’ Marcos Jr.

Sa mensahe ni Pope Francis na ipinaabot kay Papal Nuncio to the Philippines Archbishop Charles Brown, sinabi nito na patuloy niyang ipagdarasal ang bagong lider ng Pilipinas.

Gayundin ang dasal para sa pagpapala ng Diyos sa kapayapaan at kaunlaran ng bansa.

Sinabi pa ni Brown na kanya ring binati si Marcos sa courtesy visit na naganap nitong Hunyo 10, kung saan tinalakay ang pagpapatibay sa relasyon ng simbahan at gobyerno.

Nagpalabas ng TRO ang Korte Suprema hinggil sa pag-upo ni dating Comelec Commissioner Rowena Guanzon bilang kinatawan ng P3PWD Partylist group.

Ito ay kasunod ng inihaing petisyon ni Duterte Youth Partylist Rep. Ducielle Cardema at asawa nito na si Ronald Cardema na Chairman ng National Youth Commission.

Dahil dito, binigyan ng Korte Suprema ng 10 araw ng walang palugit ang COMELEC maging si Guanzon upang ihain ang kanilang kumento kaugnay sa nasabing petisyon.

Bukod pa dito, binigyan din ng limang araw ng Korte Suprema ang COMELEC upang isumite ang inisyu nitong resolusyon na nagpapahintulot kay Guanzon na maging Subtitute Rep. ng P3PWD Partylist.

Samantala, kinumpirma naman ni Comelec Spokesperson Atty. John Rex Laudiangco na natanggap na nito ang kopya ng tro ng Korte Suprema, at tutugon sila sa direktiba na maghain ng komento, sa tulong ng Office of the Solicitor General.

Sa ngayon, tumanggi munang mag-komento si Guanzon hinggil sa nasabing desisyon ng Korte Suprema. —ulat mula kay Bert Mozo (Patrol 3)

Pitong sasakyan ang inararo ng isang 18 wheeler truck sa Boni Serrano Road Brgy. Libis Quezon City.

Kabilang sa karambola, ang naturang truck, apat na kotse, dalawang closed van, isang SUV, at isang AUV.

Dalawa sa mga sasakyang inararo ay nayupi kung saan, mabilis na tumakas ang driver at pahinante ng truck matapos ang aksidente.

Sa imbestigasyon ng mga otoridad, walang naitalang nasawi o nasugatan habang dalawa ang naitalang nasaktan kabilang na ang isang buntis.

Pinaghahanap na ang driver at pahinante ng truck na tumakas matapos ang aksidente.

Magiging 11 pesos na ang minimum fare sa jeepney sa buong bansa simula bukas, Hulyo 1.

Ito ay matapos aprubahan ng Land Transportation Franchising and Regulatory Board (LTFRB) ang hiling ng mga tsuper na dalawang pisong dagdag singil sa pamasahe.

Sa Hulyo 1 rin ay epektibo na ang 13 pesos na minimum na pasahe sa mga modern jeep sa buong bansa.

Kabilang rin sa mga ipinag-utos ng LTFRB ang pagkakaloob ng 20% diskwento sa mga pasaherong senior citizen, person with disabilities at estudyante.

Samantala, pinag-aaralan pa ng LTFRB ang hirit ng ilang transport group na dagdag na 5 piso para sa base fare.

Nasa 30,000 katao ang inaasahang daragsa sa Intramuros, Maynila upang manood ng inagurasyon ni President-Elect Ferdinand “Bongbong” Marcos Junior.

Ayon kay PNP Spokesman, Col. Jean Fajardo, binuksan ng organizers ang Intramuros Golf Course bilang area para sa mga civilian attendee na nais sumaksi sa makasaysayang aktibidad.

Dahil dito, pinayuhan ni Fajardo ang mga manonood na iwasang magdala ng mga backpack, non-transparent water containers, matutulis at matatalas na bagay, alak, sigarilyo, paputok at drones.

Kung hindi naman anya maiiwasang magdala ng anumang bag, magdala na laman ng transparent backpacks.

Dumating na sa bansa si US second gentleman Douglas Emhoff na dadalo sa inagurasyon bukas ni President-elect Ferdinand Bongbong Marcos, Jr.

Si Emhoff ay winelcome sa US Embassy ni Philippine Charge D’ Affaires Ad Interim Heather Variava.

Una nang inanunsyo ni US President Joe Biden ang pagpapadala ng US Presidential Delegation para dumalo sa inagurasyon ni PBBM at ito ay pangungunahan ni Emhoff na asawa ni US Vice President Kamala Harris.

Bukod kina Emhoff at Variava, kabilang din sa delegasyon ng Amerika sa inagurasyon ni PBBM sina Bobby Scott – Chairman of the Committee on Education and Labor, US Representative Virginia, Nani Coloretti, Deputy Director, Office of Management and Budget, Admiral James Sandy Winnefeld Jr. – dating Vice Chairman ng Joint Chiefs of Staff, Edgard Kagan, Special Assistant to the President at Senior Director for East Asia and Oceania, National Security Council at Chantale Wong, US Director- Asian Development Bank. —ulat mula kay Raoul C Esperas (Patrol 45)

Uubrang makapasok ng National Museum mula alas-6 ng umaga hanggang alas-9 ng umaga ang sinumang nais dumalo sa inagurasyon ni President-elect Ferdinand Bongbong Marcos, Jr., bukas, June 30.

Ito ayon kay MPD spokesperson Police Major Philipp Ines ay dahil bubuksan nila ang Victoria at General Luna Streets sa publiko papasok ng National Museum sa mga nasabing oras at alas-9 ng umaga ay isasara na ang mga ito.

Ang Marcos supporters ay ipinuwesto sa golf course sa Intramuros sa harap ng National Museum na kaya ang 25 hanggang 30K katao.

Bukod sa supporters, sinabi ni Ines na nasa halos 1, 500 VIP’S at VVIP’S ang inaasahang dadalo sa panunumpa ni PBBM.

Ang VVIP’s ay uupo sa taas ng Podium ng National Museum habang ang VIP’s ay naka puwesto sa lane sa kahabaan ng Padre Burgos Avenue.

Inihayag pa ni Ines na ang kabilang bahagi ng Padre Burgos Avenue malapit sa Museum ay bakante para sa isasagawang parada.

Nagpasalamat si President-Elect Ferdinand Marcos Junior sa mga Cebuano dahil sa ambag ng mga ito sa pagka-panalo niya at ng kanyang running-mate, na si Vice President-Elect Sara Duterte sa May 9 National at Local Elections.

Sa kanyang talumpati sa oath-taking ceremony ng mga opisyal ng One Cebu Party, tinukoy ni Marcos ang lalawigan bilang may pinaka-malaking ambag sa kanyang pagka-panalo sa presidential race.

Umabot sa mahigit isang milyon ang botong nakuha ni PBBM mula sa Cebu, na pinaka-vote-rich province.

Nakakuha naman ng 391,000 votes ang kanyang pinaka-malapit na karibal na si Outgoing Vice President Leni Robredo.

Magugunitang tinalo ni Robredo si Marcos sa Cebu noong 2016 Vice-Presidential Race.

Taong 1969 naman nang huling manalo ang isang Marcos sa Cebu, noong panahon ng kanyang amang si dating Pangulong Ferdinand Marcos Senior.

Aabot sa 4.7% ng COVID-19 vaccines ang maituturing na wastage o nasayang mula sa kabuuang bilang ng bakuna na natanggap ng Pilipinas.

Kinumpirma ito ni outgoing Health Secretary Francisco Duque III, kung saan nilinaw nito na ang nasabing bilang ay mababa sa 10% ng “Allowable vaccine wastage” ng World Health Organization.

Sa datos ng National Task Force Against COVID-19, na kinumpirma ni Health Undersecretary Myrna Cabotaje, aabot sa 245, 382, 600 COVID-19 vaccines ang nai-deliver sa bansa.

Samantala, ayon naman sa National Vaccination Operations Center, nasa 154, 132, 506 vaccine doses na ang naiturok hanggang nitong Hunyo a-26.