HOT STORIES OF THE WEEK

Pumanaw na si dating Budget Secretary at Camarines Sur Representative Rolando Andaya Jr. sa edad na 55 ngayong araw.

Ito ang inanunsyo ng kaniyang anak sa isang social media post.

Hindi naman nabanggit ng mga anak nito ang dahilan ng pagkamatay ng kanilang ama.

Samantala, humihingi ng panalangin ang pamilya ni Andaya para sa yumaong ama.

Si Andaya ay nagsilbi bilang House Majority Leader ng isang taon sa ilalim ng 17th Congress at naging kalihim ng Department of Budget and Management noong 2006 hanggang 2010 sa ilalim ng administrasyon ni dating Pangulong Gloria Macapagal-Arroyo.

Lumisan na ng Malakanyang ang Pangulong Rodrigo Duterte, isang oras bago magtapos ang kanyang termino.

Kasunod na rin ito nang pagtanggap ni Duterte ng departure honors mula sa militar sa loob ng Palace grounds.

Sinaksihan naman ng bagong Pangulong Ferdinand Bongbong Marcos, Jr. ang pagkilala kay Duterte.

Nagkamay sina Duterte at Marcos bago umalis ang Pangulong Duterte pauwi sa Davao City.

Opisyal nang nagpaalam si dating Pangulong Rodrigo Duterte, bilang ika-16 na Presidente ng bansa.

Kasabay ng pagdating ni President-elect Ferdinand “Bongbong” Marcos Jr. sa Malakanyang para sa turnover ceremony, binigyan ng Departure Honor si Duterte.

Personal na sinalubong ni Duterte si Marcos at ilang minuto munang nag-usap, pasado alas-10 kaninang umaga.

Matapos nito ay dumiretso si PBBM sa National Museum  para sa kanyang panunumpa bilang ika-17 Pangulo ng bansa, kaninang alas-12 ng tanghali.

Naglunsad ng kilos-protesta ang ilang makakaliwang grupo kasabay ng inagurasyon ni President-elect Ferdinand “Bongbong” Marcos Jr. sa Lungsod ng Maynila.

Dahil pinagbawalan ang mga raliyista na makalapit sa paligid ng National Museum, partikular sa Liwasang Bonifacio kaya’t lumipat ang mga ito sa Plaza Miranda, Quiapo upang matiyak ang mapayapang demonstrasyon.

Ang naturang aktibidad ay pinangunahan ng grupong Bagong Alyansang Makabayan.

Una nang nagpulong ang Philippine National Police at si BAYAN Secretary General Renato Reyes para sa isang last-minute dialogue, kaninang umaga.

Samantala, ilang grupo rin ng kabataan ang nag-rally sa Plaza Miranda. —ulat mula kay Raoul C Esperas (Patrol 45), Aya Yupangco (Patrol 5)

Nakalabas na ng Philippine Area of Responsibility ang Bagyong Caloy.

Huling namataan ng PAGASA ang nasabing sama ng panahon, 575 kilometers, kanluran ng Iba, Zambales.

Kumikilos naman ang bagyo sa pa-kanluran pero mabagal ito habang tinutumbok ang Southern China.

Taglay nito ang lakas na hanging 55 kilometro kada oras at pagbugso na hanggang 70 kilometro kada oras.

Wala namang itinaas na anumang public storm warning signal.

Sa kabila nito, magdadala ng pag-ulan sa kanlurang bahagi ng Luzon at Visayas ang monsoon trough at southwest monsoon o habagat na pinaigting ng Bagyong Caloy.

Nanindigan ang Taiwan sa kanilang karapatan at planong magsagawa ng live-fire drills sa paligid ng Ligaw Island, na bahagi ng West Philippine Sea.

Ayon sa Taiwanese Foreign Ministry, palagi naman silang nagpapalabas ng babala tuwing nagsasagawa ng kanilang military exercises.

Ang nasabi anilang isla ay bahagi ng kanilang teritoryo at ginagawa lamang nila ang mga aktibidad na alinsunod sa International Law.

Una nang tinutulan ng Department of Foreign Affairs ang live fire drills na itinuturing na iligal dahil isasagawa ito sa Ligaw Island o Itu Aba na bahagi ng Kalayaan Islands, Palawan.

Tiniyak ni President-elect Ferdinand “Bongbong” Marcos Jr. na hahabulin niya ang mga sangkot sa smuggling ng agricultural products.

Ito ang binigyang-diin ni Marcos makaraang isumite sa kanya ni dating Senate President Tito Sotto III ang listahan ng mga government official na protektor umano ng smuggling ng mga nasabing produkto.

Ang naturang listahan ay bahagi ng Committee report hinggil sa naging imbestigasyon ng Senado sa agri-smuggling.

Bukod sa pagiging Pangulo, si Marcos ang pansamantalang uupong kalihim ng Department of Agriculture simula ngayong Hunyo a – 30.

Ikinalugod ng isang transport group ang panibagong dagdag sa minimum fare sa mga jeep sa buong bansa.

Kahapon ay naglabas ng kautusan ang LTFRB na nagbibigay ng dagdag na P2 sa mga lugar na walang ipinatupad na fare increase noong June 8 habang dagdag piso  sa NCR, Regions 3 at 4.

Magiging nasa P11 na ang pamasahe sa traditional jeep sa buong bansa habang P13 ang pamasahe sa modern jeepney, simula bukas.

Ayon kay PISTON president ka Mody Floranda, bagaman malaking bagay ang fare hike pero tila mababalewala lang ito kung magpapatuloy ang pagtaas ng presyo at pagbawas sa buwis ng produktong petrolyo.

Dahil anya sa pagtaas ng pamasahe ay posibleng may ilang jeepney driver na tumigil sa pamamasada ang muling bumiyahe.

Batay sa tala ng PISTON, nasa 30% na ng mga namamasada sa Metro Manila ang tumigil dahil sa taas presyo ng krudo.

Mula sa 74K tsuper ng jeep sa NCR, 23K sa mga ito ang huminto muna sa pamamasada.

Nagsasagawa na ng imbestigasyon ang Department of Agriculture sa pagkakasangot umano ng ilang opisyal nito sa listahan ng senado kaugnay sa agricultural smuggling.

Nilinaw ng DA na para sa administrative purposes ang kanilang imbestigasyon subalit may pagkakatugma ang listahan mula senado sa mga opisyal na kanilang iniimbestigahan.

Ayon kay DA secretary William Dar, ipauubaya nila sa Presidential Anti-Corruption Commission o Office of the Ombudsman ang imbestigasyon sa mga opisyal na iniuugnay sa agricultural smuggling.

Itinanggi rin ni DAR na may kaugnayan siya sa mga opisyal na isinasangkot.

Hawak na ni President-elect Bongbong Marcos ang nasabing listahan matapos itong isumite ni dating Senate President vIcente “Tito” Sotto III.

Nagpahayag ng pasasalamat ang Philippine National Police sa mga lokal na pamahalaan sa National Capital Region (NCR) na nagdeklara ng non-working holiday ngayong araw.

Ito ay kasunod ng deklarasyong ginawa ng Lungsod ng Maynila, Pasay, Navotas  at San Juan para bigyang daan ang inagurasyon ngayong araw ni President-elect Ferdinand Marcos Jr. bilang ika-17 pangulo ng bansa.

Ayon kay PNP Director for Operations Police Major General Valeriano de Leon, malaking tulong ang pagdedeklara ng non-working holiday sa mga residente at manggagawa sa Metro Manila na posibleng maapektuhan ng pagsasara ng mga kalsada at rerouting na ipinatupad ng mga otoridad para sa seguridad ng inagurasyon.