HOT STORIES OF THE WEEK

Ipinawalang-bisa o i-vineto ni Pangulong Ferdinand Bongbong Marcos Jr. ang House Bill No. 7575 na gawing Special Economic Zone and Freeport Zone ang Bulacan Airport City.

Batay sa liham ng Pangulo na ipinadala sa tanggapan ng Senate President, sinabi nito na hindi nito sinusuportahan ang naturang bill dahil salungat ito sa layunin ng gobyerno na bumuo ng tax system.

Bagamat kinikilala ng Pangulo ang naturang layunin ng bill ay kailangan pa ring mag-ingat sa paggamit ng pondo dahil humaharap pa rin ang bansa sa matinding krisis sa COVID-19 pandemic.

Samantala, sinabi ng National Economic and Development Authority (NEDA) na kailangan ang malalimang pag-aaral sa planong economic zone para matiyak kung mayroon itong pakinabang sa bansa.

Pinili ni Pangulong Ferdinand Bongbong Marcos Jr. ang Bahay Pangarap bilang official residence nito.

Ito ang inihayag ni Jose Manuel Romualdez, Philippine Ambassador to the United States, ang buong pamilya ni PBBM ay titira sa Bahay Pangarap kung saan kasalukuyan itong inaayos.

Ang Bahay Pangarap ay matatagpuan sa loob ng Malacañang Park, na nasa kabilang bahagi ng  Pasig River at nakaharap sa  Presidential Palace.

Ginagamit ang complex nito sa recreational retreat ng mga dating Pangulo ng bansa.

Unang ipinakilala noong panahon ng namayapang Pangulo Manuel Quezon taong 1936.

Samantala, tumira na rin sa bahay pangarap sina dating Pangulong Rodrigo Roa Duterte at Benigno Aquino III.

Tiniyak ng Department of Trade and Industry (DTI) na walang paggalaw ng presyo sa mga basic commodities at prime commodities sa bansa.

Ito ay dahil pa rin sa patuloy na pagtaas ng presyo ng produktong petrolyo sa pandaigdigang merkado dulot ng giyera sa pagitan ng Russia at Ukraine.

Ayon kay DTI Undersecretary Ruth Castelo, alam ng ahensya ang pag-aray ng consumers sa pagtaas ng mga bilihin

Aniya, hindi gagalaw ang presyo ng mga pangunahing bilihin hangga’t hindi pa ito naaaprubahan ng DTI.

Sa ngayon aniya, pinag-aaralan pa ng DTI ang mga presyo ng mga pangunahing bilihin bago ito i-publish at habang wala pang paggalaw sa mga presyo ay babantayan ng DTI ang mga negosyante kung sumusunod sa Suggested Retail Price (SRP) bulletin.

Samantala, siniguro naman ng bagong DTI Secretary na si Fred Pascual na patuloy nilang pagagandahin ang sistema sa DTI.

Pinapurihan ni Pangulong Ferdinand Marcos “Bongbong” Junior ang kanyang ama na si dating Pangulong Ferdinand Marcos Senior sa inaugural address nito.

Ayon kay PBBM, nagpatayo ang kanyang ama sa termino nito ng maraming imprastraktura at nakapag-produce ng mas maraming bigas sa bansa.

Samantala, aminado naman ang nakababatang Marcos na hindi siya interesadong mang-akin ng tagumpay ng iba sa halip nais niyang ituloy anumang nasimulan ng dating administrasyon.

Dumalo si dating Pangulong Rodrigo Duterte sa isang homecoming concert matapos ang kanyang pagbabalik bilang pribadong mamamayan sa Davao City kahapon.

Inorganisa ang aktibidad na tinawag na “Salamat, Tatay Digong: Homecoming Concert,” ng kanyang mga supporter bilang pagpupugay sa kauna-unahang pangulo mula Mindanao.

Nagpasalamat naman si Duterte sa kanyang mga kapwa Davaoeño sa suporta na kanilang ibinuhos.

Matapos lisanin ang malakanyang, nag-shopping muna ang dating pangulo sa Greenbelt, Makati City.

Eksakto alas-12 ng tanghali kahapon opisyal nagtapos ang anim na taong termino ni Duterte bilang ika-16 na pangulo ng Pilipinas.

Kumpiyansa si Pangulong Bongbong Marcos na makakamit ng Pilipinas ang hinahangad na pagbabago, pagkakaisa at kaunlaran sa hinaharap.

Ito, ayon kay Pangulong Marcos, ay dahil sa kakayahan at pagpupursige ng mga Pilipino na abutin ang mga pangarap.

Hindi anya nawawalan ng pag-asa ang mga Pinoy at nananatiling naka-tindig anumang pagsubok ang kaharapin kaya’t napakalaki ng kanyang tiwala sa mga mamamayan, lalo sa susunod na henerasyon.

Kaisa si Pangulong Bongbong Marcos sa paghahangad ng bawat Pilipino na makamit ang kapayapaan sa bayan at pag-asa sa mas ligtas at masaganang bansa.

Binigyang-diin ito ni Pangulong Marcos sa kanyang talumpati na hindi nag-iisa ang bawat mamamayan sa pangarap na muling ibangon at paunlarin ang Pilipinas.

Sa naturang talumpati, tinawag din ng pangulo na makasaysayan ang nasabing aktibidad dahil sa pamamagitan ng boto ng mga mamamayan ay isinantabi ang pulitika nang pagkakahati.

Tututukan ni Pangulong Bongbong Marcos ang food sufficiency sa bansa sa gitna ng nagpapatuloy na Global Food Crisis bunsod ng giyera sa pagitan ng Russia at Ukraine.

Ito ang kanyang tiniyak sa kauna-unahan niyang talumpati matapos ang inagurasyon bilang ika-17 pangulo ng bansa, kahapon.

Ayon kay Marcos, ang supply ng pagkain ang dapat i-prayoridad gaya ng ginagawang pag-trato ng mga mayamang bansa sa kanilang agriculture sector.

Sumisigaw na anya ang naturang sektor para sa agarang pagtugon sa matagal nang iginigiit na atensyon.

Pangkalahatang naging mapayapa at matagumpay ang lahat ng mga plano sa seguridad sa inagurasyon ni Pangulong Ferdinand “Bongbong’ Marcos Junior.

Ayon kay PNP Officer-In-Charge, Lt. Gen. Vicente Danao Junior, walang iniulat na anumang kaguluhan o untoward incidents sa makasaysayang panunumpa ng ika-17 pangulo ng bansa.

Ito, anya, ay kahit naglunsad ng kilos-protesta ang ilang grupo sa Lungsod ng Maynila, kung saan idinaos ang inagurasyon.

Umabot ng ilang araw ang preparasyon para sa nasabing aktibidad upang matiyak na maging ligtas ang lahat nang dumalo. —sa ulat ni Gilbert Perdez (Patrol 13)

Pinangunahan ni Pangulong Bongbong Marcos ang panunumpa ng mga miyembro ng kanyang gabinete kabilang na si Vice President Sara Duterte na bagong kalihim ng Department of Education (DepEd).

Bukod kay Duterte, kabilang din sa mga nag-oath taking sina Executive Secretary Victor Rodriguez; Secretaries Benjamin Diokno ng Finance; Jose Crispin Remulla ng Justice;

Emmanuel Bonoan ng Public Works and Highways; Bienvenido Laguesma ng Labor and Employment; Susan Ople ng Migrant Workers Affairs; Alfredo Pascual ng Trade and Industry;

Erwin Tulfo ng Social Welfare and Development; Benhur Abalos ng Interior and Local Government; Cristina Frasco ng Tourism; Ivan John Uy ng Information and Technology;

Jaime Bautista ng Transpotation; Amenah Pangandaman ng Budget and Management at Conrado Estrella, III ng Agrarian Reform.

Samantala, nanumpa rin kay PBBM ang kanyang panganay na si Sandro Marcos, bilang kinatawan naman sa kongreso ng unang distrito ng Ilocos Norte.