Hindi madali ang mga hamon na kinakaharap ng House prosecution panel sa Senate impeachment court kaugnay sa paglilitis kay Vice President Sara Duterte.
Ito ang inihayag ni House prosecutor at Manila Rep. Joel Chua kasunod ng pambubully o pag-atake sa social media kina lead prosecutor Gerville Luistro at private prosecutor Amando Virgil Ligutan.
Ayon kay Chua, bukod sa matinding stress at tensyon sa loob ng impeachment court, hindi rin sila agad pinayagang magdala ng inuming tubig sa loob ng session hall, partikular noong unang araw ng paglilitis.
Kwento pa ni Chua, maging siya ay hinarang din ng mga security personnel at kinailangan pa niyang ubusin ang dalang tubig bago siya pinapasok sa loob ng bulwagan.
Para kay Chua, mas naging mahirap ang kanilang tungkulin dahil kinailangan nilang magsalita sa harap ng mga senator-judges at ng publiko kahit natutuyo na ang kanilang lalamunan.
Pinasalamatan rin ni Chua si Sen. Pia Cayetano matapos nitong imungkahi na payagan ang mga prosecutor na magdala ng tubig habang isinasagawa ang impeachment trial.
Ang mungkahi, aniya, ni Sen. Cayetano sa Senate impeachment court ay naging malaking kaginhawaan sa kanilang pagganap sa paglilitis. | via Geli Mendez (Patrol 30)
