Inimbitahan ni United States (US) President Joe Biden si President Ferdinand Marcos Jr. na magtungo sa White House.
Batay sa ulat iniabot ni US Second Gentleman Douglas Emhoff ang imbitasyon.
Kaugnay nito nauna nang inihayag ni Philippine Ambassador to the US Jose Manuel Romualdez na bibisita ang Pangulo sa US kapag umakma sa iskedyul nito.
Nabatid na si Emhoff ay asawa ni US Vice President Kamala Harris, ay dumalo rin sa inagurasyon ni PBBM nitong nagdaang Huwebes.
Humihingi pa ng kaunting panahon si newly appointed Foreign Affairs Sec. Enrique Manalo para tapusin ang ilan sa kanyang mga iiwang trabaho sa dating pwesto bilang permanent Representative to the United Nations.
Nagtapos ang panunungkulan ni Manalo sa naturang posisyon noong nakalipas na linggo at ngayo’y opisyal nang kalihim ng Department of Foreign Affairs (DFA) matapos manumpa kay Pang. Marcos.
Gaya ng nakasaad sa accomplishments ng batikang career diplomat, kumpiyansa ang Malacañang na magkakaroon na ng magandang resulta ang patuloy na pag-giit ng Pilipinas sa karapatan nito sa mga pinag-agawang teritoryo.
Tiniyak ni Pangulong Ferdinand Bongbong Marcos na tututukan at bibigyang prayoridad din ng kanyang administrasyon ang tuloy tuloy na pagpapalakas ng kapabilidad ng Philippine Air Force.
Ayon kay Pang. Marcos, sa ginanap na 75th Anniversary ng Philippines Air Force sa Mabalacat Pampanga, na napakalaki ng responsibilidad ng isang chief executive pagdating sa pagbibigay ng proteksyon sa teritoryo ng bansa, paglaban sa terorismo at pagsugpo sa insurhensya na dulot ng paghahasik ng kaguluhan ng mga komunistang grupo.
Kabilang pa aniya dito ang pagsasagawa ng mga humanitarian assistance at relief operation sa mga lugar na naapektuhan ng kalamidad.
Kaya naman, sinabi ng Pangulo, na napakahalaga na mapalakas ang kapabilidad ng Philippine Air Force lalo na ang pagkakaroon ng mas modernong transport aircraft at helicopter.
Kaugnay nito, pinapurihan din ni PBBM ang mga kawani ng Philippine Airforce na patuloy na tumutupad sa kanilang mga tungkulin para kapakanan ng bawat Pilipino.
Kinoronahan bilang Miss New Mexico 2022 sa USA beauty pageant ang Filipina-American na si Suzanne Perez.
Kasunod ito ng pagkapanalo nang isa ring Fil-Am na si Averie Daniela Bishop bilang Miss Texas 2022.
Si Suzanne ang kauna-unahang Filipino-American na kinoronahan bilang Miss New Mexico, USA.
Nagmula ang 25-anyos na si Suzanne sa Bislig, Surigao del Sur at nagtapos ng Bachelor’s Degree in Communication Science and Disorder sa Eastern New Mexico University.
Dati nang sumasali ang dalaga sa beauty pageant kung saan hinawakan niya ang koronang Miss World Philippines USA.
Idadaos ang Miss USA sa December 2022 kung saan maglalaban-laban ang 50 beauty contestants mula sa 50 states ng America.
Pinaplano na ng Department of Social Welfare and Development (DSWD) na agad i-deposit sa mga cards ang P6.2 billion
na pondong inilabas ng Department of Budget and Management.
Para ito sa pamamahagi ng P500 ayuda sa mga pinakamahihirap na pamilya sa bansa.
Ayon kay DSWD secretary Erwin Tulfo, tatagal nang lima hanggang anim na araw ang pag-deposit ng halaga patungo sa cash cards ng mga benepisyaryo.
Ang pamamahagi ng P500 ayuda ay nasa ilalim ng targeted cash transfer program ng DSWD na unang ipinag-utos ni dating Pangulong Rodrigo Duterte.
Tiniyak naman ni Tulfo na magiging mabilis ang pamamahagi ng halaga dahil hawak na ng mga benepisyaryo ang kanilang mga cards.
Nagbukas na ng satellite office si Vice President Sara Duterte-Carpio sa ilang rehiyon sa bansa.
Ito ay para sa agarang pagtulong sa mga Pilipino sa mga programa sa ilalim ng Office of the Vice President (OVP).
Sa Facebook post ni Duterte, anim na satellite offices ang binuksan sa unang araw na pag-upo nito sa pwesto.
Matatagpuan ito sa Dagupan, Cebu, Tacloban, Zamboanga, Davao at Tandag sa Surigao del Sur.
Una rito, nakipagpulong muna si Duterte kay dating Education Secretary Leonor Briones para sa pag-upo nito bilang susunod na kalihim ng DepEd.
Sumampa na sa 9,105 ang bilang ng aktibong kaso ng COVID-19 sa Pilipinas.
Ayon sa Department of Health (DOH), ito na ang pinakamataas na active cases simula noong Abril 28.
Nakapagtala naman ang kagawaran ng 1, 302 bagong nahawa sa COVID-19.
Ang mga rehiyong nanguna sa nakapagtala ng bagong kaso sa nakalipas na dalawang linggo ay ang NCR na may 5, 243; CALABARZON na may 1, 967 at Western Visayas na may 912.
Wala namang nadagdag sa bilang ng mga nasawi na nananatili pa rin sa 60, 578 habang 3, 637, 268 ang mga gumaling sa COVID-19.
Sa kabuuan, pumalo na sa 3, 706, 951 ang COVID-19 cases sa Pilipinas.
Handa na ang Commission on Elections (Comelec) sa muling pagbubukas ng Voters Registration sa Lunes.
Para ito sa mga bagong magpapatala, na-deactivate o hindi nakaboto sa nakalipas na halalan at maglilipat ng address o magbabago ng mga personal na impormasyon.
Ayon sa Comelec, magbubukas ang kanilang tanggapan simula alas-8 ng umaga hanggang alas-5 ng hapon, Lunes hanggang Sabado.
Kasama rito ang pista opisyal na tatagal hanggang Hulyo 23.
Sa desisyon ng Comelec en banc, pagsapit ng alas-3 ng hapon ng Hulyo 23, ililista na ang pangalan ng mga nakapila na magpaparehistro sa loob ng 300-meter radius ng registration area.
Ang mga pangalang ito lamang ang maaaring makakahabol sa pagpapatala sa huling araw.
Sinampahan na ng kasong murder ng National Bureau of Investigation (NBI) ang 22 pulis na sangkot sa pagkasawi ng 8 preso sa New Bilibid Prison.
Ayon sa NBI, nagmula sa National Capital Region Police Office ang mga pulis at nakadestino sa Bureau of Corrections nang masawi ang mga inmates.
Batay pa sa imbestigasyon, posibleng hindi namatay sa COVID-19 ang mga bilanggo dahil sa sari-saring iregularidad.
Ginamit lang umano ng mga ito ang COVID-19 pandemic para takpan ang pagpaslang sa kanila.
Hindi rin nagtutugma ang mga salaysay ng mga pulis tungkol sa pagkakahawa umano sa COVID-19 ng mga inmate, kumpara sa salaysay ng mga testigo, records, at CCTV footage na nakuha mula sa Bureau of Corrections (BuCor).
Ang reklamo ay inihain noon sa Department of Justice.
Hindi naman nagbigay ng ibang impormasyon ang BuCor dahil sa Data Privacy Act.
Pinalilinis ni Pangulong Ferdinand Marcos Jr. ang listahan ng mga benepisyaryo ng target na social assistance programs ng Department of Social Welfare and Development (DSWD).
Nais kasi ng Pangulo na alisin na ng kagawaran ang mga benepisyaryong hindi kwalipikadong makatanggap ng cash grants mula sa pamahalaan.
Ayon kay DSWD Secretary Erwin Tulfo, ilan na rin sa mga benepisyaryo ang graduate na mula sa Conditional Cash Transfer program (CCT) o mas kilala bilang Pantawid Pamilyang Pilipino Program (4Ps).
Partikular ito sa mga magulang na ang mga anak ay nakapagtapos na ng pag-aaral. Ngunit, hindi isnisuko ang kanilang accounts at patuloy na makatanggap ng cash grants.
Inaasahan namang sa mga susunod na linggo ay magpapalabas ng “amnesty” si tulfo na nananawagan sa mga unqualified 4Ps beneficiaries na isuko na ang kanilang accounts sa kagawaran sa loob ng 30 hanggang 60 araw, sakaling hindi ay posible itong sampahan ng kaso.
Plano rin niya na ipatupad ang reward system na kung saan makatatanggap ng pabuya ang informer kung maituturo kung sino sa kanilang komunidad ang dapat na alisin mula sa naturang listahan.