Nanindigan ang House prosecution panel na walang anumang sitwasyon ang maaaring magbigay-katwiran sa umano’y pagbabanta ni Vice President Sara Duterte laban kay Pangulong Ferdinand Marcos Jr., na saklaw ng Article 4 sa impeachment complaint.
Ito ang sinabi ni House prosecutor at Bicol Saro Party-list Rep. Terry Ridon na isa sa pinakamahalagang naging kaganapan sa unang linggo ng impeachment trial ay ang posisyon ng depensa na makatwiran umano ang naging pahayag ni VP Sara na aniya’y maituturing na pag-amin na nagbitaw nga ng pahayag ang bise presidente.
Ayon kay Ridon, ang ebidensya ng prosekusyon ay bahagi na ng opisyal na rekord ng Senate Impeachment Court matapos itong sumailalim sa direct at cross-examination.
Aniya, kapwa kinikilala ng prosekusyon at depensa na nagkaroon ng pagbabanta ang bise presidente, ngunit ang pagpapasya ay kung may sapat ba itong katwiran na nakasalalay sa Senate Impeachment Court.
Muli ring tinutulan ng House prosecution panel ang argumento ng depensa na ginawa ni VP Sara ang mga pahayag dahil sa umano’y “Oplan Romanov” o ang umano’y planong pag-ubos sa pamilya Duterte.
Iginiit ng prosecutors na walang emosyon o anumang inaakalang banta laban sa bise presidente ang maaaring magbigay-katwiran sa umano’y pagbabanta ni VP Sara laban sa pangulo ng bansa. | via Geli Mendez (Patrol 30)
