Itutuloy na ng Department of Education ang nationwide simultaneous school safety drill sa September 3, para palakasin ang kahandaan ng mga paaralan sa active threat scenarios.
Ayon kay Education Secretary Sonny Angara, layunin ng aktibidad na bumuo ng kalmadong kahandaan at tamang response habits, at hindi magdulot ng takot.
Nauna nang ipinagpaliban noong Agosto a-bente singko ang nationwide safety drill para maiangkop ito sa child-centered at trauma-informed standards.
Dahil dito, mahigpit na ipagbabawal ang hyper-realistic at fear-inducing simulations, kabilang ang aktuwal na aggressor role-players, armas, at graphic materials.
Magsasanay ang mga estudyante sa pag-secure ng entry points, tahimik na pagtatago mula sa mga bintana, at pag-review ng evacuation routes.
Pagkatapos ng drill, magsasagawa ng first aid at post-drill debriefing ang guidance personnel at school health officers.
Binigyang-diin ni Secretary Angara na dapat pantay na bigyang-halaga ang pisikal na seguridad at peace of mind ng mga estudyante. | mula sa panulat ni Jordan Gutierrez
Lumala ang air quality sa ilang bahagi ng Iloilo City dahil sa transboundary haze mula sa mga sunog sa Kalimantan, Indonesia.
Ayon sa Iloilo City Operations Center, dinadala ng habagat ang particulate matter mula Indonesia patungo sa ilang bahagi ng Luzon at Visayas.
Ibinabala ng mga otoridad na maaaring magdulot ang hindi magandang air quality ng ubo, iritasyon sa lalamunan, pananakit o paninikip ng dibdib, at pagluha ng mga mata.
Pinayuhan na ang mga bata, senior citizens, buntis, at mga may hika, sakit sa puso o iba pang respiratory at cardiovascular conditions na iwasan ang outdoor physical activities at manatili sa loob ng bahay, lalo na sa mga lugar na may filtered air.
Patuloy namang mino-monitor ng Iloilo City Operations Center ang haze at habagat kasama ang PAGASA at iba pang air-quality monitoring sources. | mula sa panulat ni Jordan Gutierrez
Muling nanawagan si House Committee on Human Rights Chairperson Bienvenido “Benny” Abante Jr. kay Vice President Sara Duterte na personal na humarap sa Senate Impeachment Court at sagutin ang mga alegasyon laban sa kanya.
Ayon kay Abante, si VP Sara mismo ang makapagbibigay ng direktang sagot sa mga paratang, kabilang ang umano’y maling paggamit ng confidential funds.
Binigyang-diin ng mambabatas na hindi dapat iniinsulto ni VP Sara ang Impeachment Court.
Aniya, ang kaniyang panawagan ay hindi nangangahulugang hinuhusgahan na niyang guilty ang pangalawang pangulo kundi nakatuon dapat ang impeachment proceedings sa paghahanap ng katotohanan at pananagutan, at hindi sa politika.
Mahalaga aniya na marinig mismo ng taumbayan mula kay VP Sara kung ano ang tunay na nangyari at kung naaayon sa kaniyang mandato bilang Bise Presidente ang kaniyang mga naging hakbang.
Nabatid na nahaharap si VP Sara sa apat na Articles of Impeachment, kabilang na ang umano’y maling paggamit ng confidential funds, hindi maipaliwanag na yaman, umano’y panunuhol sa mga tauhan ng DepEd, at ang destabilisasyon at pagbabanta sa buhay ni Pangulong Ferdinand Marcos Jr.
Sa ngayon, patuloy na tinatalakay ang Article 1 sa Day 20 ng impeachment trial, kung saan nanumpa sa pagdinig si Col. Manaros Boransing III upang patunayan ang P15 million na confidential funds na iniuugnay sa military certification at mga Youth Leadership Summits na ginamit ng DepEd bilang tugon sa COA findings. | mula sa panulat ni Geli Mendez/DWIZ Patrol
Suportado ni House Deputy Speaker Paolo Ortega V ang panawagan ng House Prosecution para sa paglilinaw at kaunting kaluwagan sa sub judice rule ng Senate Impeachment Court.
Ayon kay Ortega, layunin ng prosecutors na maipaliwanag sa publiko ang mga kaganapan sa impeachment trial ni Vice President Sara Duterte nang hindi nalalabag ang ipinatutupad na patakaran.
Tiniyak ni Ortega na susunod ang House Prosecution sa lahat ng restriksiyong itinakda ng Impeachment Court, kabilang ang pagbabawal sa pagtalakay sa merito ng kaso.
Iginiit ni Ortega na mahalaga pa ring maibigay sa publiko ang tama at makatotohanang impormasyon, lalo na sa gitna ng pagkalat ng magkakaibang naratibo at misinformation online.
Naniniwala si Ortega na mas malakas na panlaban sa maling impormasyon ang katotohanan at mga ebidensyang inilalatag sa Impeachment Court. | mula sa panulat ni Geli Mendez
Asahan na ngayong araw ang pagharap ng dalawang opisyal ng Armed Forces of the Philippines bilang mga witness stand sa impeachment trial laban kay Vice President Sara Duterte.
Kabilang sa mga dadalo sina Col. Manaros Boransing III at Col. Magtangol Panopio upang pagtibayin ang mga naunang testimonya sa paglilitis, partikular ang alegasyong nakapaloob sa Article 1 na tumutukoy sa maling paggamit ng confidential funds.
Tinukoy ni impeachment adviser at spokesperson Robert Ace Barbers ang military certification na ginamit ng Department of Education o DepEd sa pagsagot sa mga findings ng Commission on Audit o COA kaugnay sa P112.5 million confidential funds.
Susuriin sa impeachment trial ang nasa P15 million na confidential funds na iniuugnay sa mga Youth Leadership Summits.
Sakali namang hindi makadalo ang dalawang opisyal, posibleng ipatawag nang mas maaga si Atty. Michael Poa, na dating chief of staff ni VP Sara sa DepEd at ngayo’y kabilang sa kaniyang defense team.
Asahan rin na tetestigo si Philippine Statistics Authority o PSA Assistant National Statistician Marizza Grande upang beripikahin sa paglilitis ang mga pangalang nasa acknowledgement receipts na tumanggap ng confidential funds.
Patuloy namang sinusuri ng prosecution ang mga natitirang testigo na posibleng bawasan upang mas mapabilis ang paglilitis at hindi na umabot pa sa Pasko o susunod na taon. | mula sa panulat ni Geli Mendez
Halos 300 uniformed personnel mula sa Philippine Army ang ipinadala sa Bataan, Tarlac, Zambales, Pampanga, at Pangasinan bilang bahagi ng humanitarian assistance and disaster response operations.
Bukod sa mga sundalo, 15 Army vehicles ang idineploy para sa operasyon. Mahigit 2,000 active-duty at reservist personnel, CAFGU members, mahigit 200 military truck, at 15 water assets naman ang naka-standby para sa deployment.
Tumulong din ang mga sundalo sa paglalagay ng sandbag upang maiwasan ang paglala ng pagbaha. Samantala, mino-monitor ng Army 51st Engineering Brigade ang Marikina River bilang paghahanda sa posibleng evacuation.
Nagsagawa rin ng sariling HADR operations ang Philippine Air Force 505th Search and Rescue Group sa Bacolor at San Fernando, Pampanga. Halos 700 pulis mula sa NCRPO ang ipinadala naman upang magbantay sa mga evacuation center, mahahalagang pasilidad, at binahang lugar.
Pumalo na sa 689.6-million pesos ang damage at losses sa agrikultura dahil sa habagat at mga nagdaang bagyong Luis at Maymay.
Ayon sa Department of Agriculture, apektado ang labing siyam na libong ektarya ng sakahan sa Ilocos Region, Cagayan Valley, Central Luzon, CALABARZON, MIMAROPA at Western Visayas, habang umabot sa labing pitong libong metrikong tonelada ang nawalang produksyon at dalawampu’t isang libong magsasaka ang apektado.
Pinakamalaki ang pinsala sa palay na umabot sa 451-million pesos, sinundan ng high-value crops na 147-million pesos at mais na 32-million pesos.
Patuloy pa ang assessment ng mga regional office ng DA para matukoy ang buong lawak ng pinsala at mga pangangailangan ng mga apektadong komunidad. | mula sa panulat ni Jordan Gutierrez
Malalaman na ng publiko kung saan napunta ang confidential funds ni Vice President Sara Duterte sa pagharap sa witness stand ng dalawang dating special disbursing officer sa impeachment court simula sa Lunes, Agosto a-disi syete.
Ayon kay Prosecution Spokesperson Atty. Benjamin Tolosa Jr., mahalaga ang testimonya nina Gina Acosta at Edward Fajarda para maipaliwanag kung saan napunta ang mga pondong hawak nila.
Si Acosta ang dating SDO ng Office of the Vice President, na humawak ng 500-million peso confidential funds, kabilang ang 125-million pesos noong 2022 na sinabing naubos sa loob lamang ng labing isang araw.
Si Fajarda naman ang dating SDO ng Department of Education, na may hawak na 112.5-million peso confidential funds.
Binigyang-diin ng prosekusyon na makatutulong ang testimonya ni Acosta at Fajarda para pagdugtungin ang mga naunang testimonya tungkol sa mga taong nakatanggap ng confidential funds, mga petsa ng paglabas ng pera at mga pinaggamitan ng naturang pondo. | mula sa panulat ni Jordan Gutierrez
Aarangkada na bukas, Agosto a-kinse, ang labing dalawang piso kada litro na fuel subsidy para sa mga driver at operator ng public utility jeepney at UV Express.
Ayon sa Land Transportation Franchising and Regulatory Board, maaaring umabot sa isang libo walong daang piso bawat linggo ang matitipid ng isang benepisyaryo.
Paliwanag ni Executive Secretary Ralph Recto, itinaas ang fuel subsidy dahil sa epekto ng patuloy na krisis sa Gitnang Silangan sa presyo ng langis.
Ang ipatutupad na dose pesos na diskwento ay mas mataas kumpara sa dating sampung piso bawat litro na subsidy noong Abril. | mula sa panulat ni Jordan Gutierrez