HEADLINES

Uubrang makabisita sa mga nagbukas nang pasyalang sa Maynila, kapwa ang mga bakunado at hindi bakunado.

Ayon ito kay Tourism Secretary Bernadette Romulo-Puyat bagamat mahigpit pa rin ang pinaiiral na restrictions para hind kumalat ang COVID 19, sa ilalim ng alert level 4 sa Metro Manila.

Bagamat bukas ang mga nasabing pasyalan sa lahat, ipinabatid ni Puyat na mayroong express lane para sa vaccinated visitors.

Sinabi ni Puyat na masaya ang DOT dahil mayroon nang mapupuntahang tourist destinations ang mga Pinoy sa loob ng Metro Manila tulad ng Intramuros at Rizal Park.

Posibleng umabot na sa peak o sukdulan ang pagsirit ng kaso ng COVID-19 sa Metro Manila.

Binigyang diin ito ni Dr. Guido David, Fellow ng OCTA Research Group matapos bumaba pa sa 1.22 ang reproduction number ng COVID-19 sa NCR.

Gayunman, sinabi ni David na kailangan pang magkasa ng mga hakbanging magpapababa pa sa reproduction number.

Bukod sa reproduction number, ipinabatid ng OCTA Group na bumaba rin sa 24% ang positivity rate sa Metro Manila.

Iginiit ni Presidential Adviser for Entrepreneurship Jose Concepcion, III ang pagpapalawig sa paggalaw ng mga fully vaccinated.

Kasunod na rin ito ng pangamba ng airline companies na bumagsak ang kanilang industriya dahil sa mahigpit na travel restrictions.

Sinabi ni Concepcion na nakausap niya ang mga nasa aviation industry at nauunawaan niya ang concerns ng mga ito.

Binigyang diin ni Concepcion na dapat paluwagin ang restrictions sa fully vaccinated upang makabawi ang mga industriyang nalugi na ng bilyong piso kabilang ang aviation sector  nuong nagsimula ang pandemya.

Puspusan ang pagkumbinsi ng isang grupo kay Manila Mayor Isko Moreno para tumakbo sa 2022 Presidential Elections.

Kasunod na rin ito nang paglulunsad ng Young Entrepreneurs Supporting Isko Moreno (YES Isko) sa kanilang kampanya sa Bonifacio Shrine sa lungsod ng Maynila.

Ayon kay Ali Garangan II, Convenor Ng YES Isko, naniniwala sila sa kakayahan ng Alkalde na pamunuan ang buong bansa lalo’t malaking bahagi ng track record nito ang marami at magagandang positibong nagawa sa lungsod ng Maynila.

Bahala na ang United Opposition na pumili nang isasabak na presidentiable sa 2022 National Elections.

Ayon ito kay Vice President Leni Robredo bagama’t tatanggapin niya sakali mang siya ang i-nominate ng United Opposition para isabong sa halalan.

Sinabi ni Robredo na siya naman ay posibleng makapag pasya na sa katapusan ng buwang ito kaugnay sa tatakbuhang posisyon.

Kasabay nito, ipinabatid ni Robredo na maraming gusot pa ang kailangang plantsahin sa ginawa niyang hiwalay na pulong kina Senador Manny Pacquiao at Manila Mayor Isko Moreno.

Paiigtingin pa ng mga simbahan sa Metro Manila ang mga panuntunan sa pagdaraos ng misa tuwing Linggo.

Sa gitna na rin ito nang ipinatutupad na alert level 4 sa Metro Manila.

Nag post na sa kani-kanilang social media accounts ang iba’t ibang simbahan ng guidelines na pinayagan ng IATF.

Kabilang dito ang 10% lamang na kapasidad o mga maaaring pumasok sa simbahan at pawang fully vaccinated lamang.

Ihihiwalay naman ang mga hindi pa bakunado na labas uubrang makinig ng misa.

Ipinaalala rin ng mga simbahan ang pagdadala ng vaccination card bukod pa sa pagsusuot ng face mask at face shield.

Naka depende sa pagresolba sa pandemya ang pagtaas ng kita ng turismo sa bansa.

Ayon ito kay BSP Senior Assistant Governor Ilumnada Sicat na nagsabing posibleng sa taong 2023 pa tuluyang makabangon ang turismo sa bansa.

Kabilang sa factors nang pagbagsak ng turismo ang mabagal na vaccination program at local transmission ng COVID-19.

Bago ang pandemya, umaasa ang BSP na 15% aakyat ang kita sa turismo na hirap na anitong maabot sa ngayon kaya’t target ng Department of Tourim na manghikayat ng 10-M dayuhan sa 2022.

Tinatarget ng pamahalaan na umabot sa 20-M katao ang maturukan ng kumpletong dose ng bakuna kontra COVID-19 bago matapos ang kasalukuyang buwan.

Ayon kay Vaccine Czar Carlito Galvez Jr., sa ngayon ay nasa higit 40-M na ang naiturok na bakuna sa bansa.

17.97-M sa mga ito ay pawang mga full vaccinated na.

Pagmamalaki pa ni Galvez na aabot sa 421,606 ang daily average vaccination rate ng ating bansa.

Kasunod nito, binigyang diin ni Galvez na patunay lamang ang mga numerong ito na maganda ang nagiging usad ng vaccination program ng ating bansa.