HEADLINES

Dumating na kahapon dakong alas-9:20 ng umaga ang 661,200 doses ng bakuna kontra COVID-19 na gawang Astrazeneca.

Dumating ito sa Ninoy Aquino International Airport (NAIA) lulan ng China Airlines.

Sinalubong ng ilang opisyal ng pamahalaan ang pagdating ng mga suplay ng bakuna sa pangunguna ni Vaccine Czar Carlito Galvez Jr., at  Presidential Adviser for Entrepreneurship Joey Concepcion.

Mababatid na ang naturang Astrazeneca vaccine na dumating kahapon ay binili ng mga pribadong sektor sa pamamagitan ng Tripartite Agreement.

Samantala, sa pinakahuling datos ng National Task Force Against COVID-19, umabot na sa 58.2-M ng bakuna ang napasakamay ng ating bansa.

Nagpatupad ang Pilipinas ng travel restriction laban sa apat na bansang may mataas na naitalang kaso ng COVID-19.

Ayon kay Presidential Spokesperson Harry Roque, kabilang na ngayon  sa red list o mga bansang nasa high risk ng COVID-19, ito ang mga bansang Grenada, Papua New Guinea, Serbia, at Slovenia.

Mababatid na tatagal ang ibinabang restriskyon ng Pilipinas sa nabanggit na apat na bansa hanggang sa katapusan ng buwang ito.

Una rito ay ipinatupad ang travel restriction sa ilan pang mga bansa gaya ng Azerbaijan, Guam, Israel, Kosovo, North Macedonia, Switzerland, at iba pa.

Patuloy ang pag-aaral sa pinaiiral na bagong quarantine status sa Metro Manila kasabay ang alert level system.

Ayon kay Health Undersecretary Maria Rosario Vergeire na ang naturang quarantine status ay maituturing na dynamic o nababago-bago dahil din sa anila sa sitwasyon ng banta ng virus.

Ito pa aniya ang dahilan kung bakit hindi pwedeng iisang alert level lamang ang ipatutupad sa mahabang panahon.

Paliwanag pa ni Vergeire, kaya’y kada linggo ay kanilang i-aassess ang paggalaw ng virus sa rehiyon para matukoy kung ano ang nararapat na pairaling paghihigpit.

Sa huli, iginiit ni Vergeire na nasa Inter-Agency Task Force (IATF) pa rin ang desisyon kung ano ang aaprubahang quarantine status at alert level system sa iba’t ibang lugar sa bansa.

Nakabili ng Porsche 911 Turbo S na nagkakahalaga ng P8.5-M ang Company Secretary ng Pharmally na kinilalang si Mohit Dargani.

Ito ang lumabas sa pagdinig ng Senate Blue Ribbon Committee hinggil sa maanomalya at overpriced na mga face masks at iba pang medical supplies.

Maliban sa Company Secretary napag-alaman din ng Kumite na may Lamborghini na nasa higit P13-M ang halaga naman ang kapatid nitong si Twinkle Dargani na Presidente ng naturang kumpanya.

Habang si Pharmally Director Linconn Ong naman ay nakabili ng tatlong high end cars na isang Lexus at dalawang Porsche.

Magugunitang napag-alaman na ang Pharmally Pharmaceutical Corporation ay may 650,000 lamang na capital pero nakakuha ito ng proyekto sa pamahalaan na nasa P8-B ang halaga.

Dinapuan ng COVID-19 si Manila Archbishop Jose Cardinal Advincula.

Ito ang kinumpirma ni Manila Cathedral Chancellor Fr. Reginald Malicdem.

Aniya sa ngayon ay walang malalang sintomas ng virus na nararamdaman ang opisyal ng simbahan maliban na lamang sa kakaunting sinat.

Sa ngayon, ay naka-quarantine na at patuloy ding minomonitor ng mga espesyalista si Advincula para sa agarang paggaling nito.

Nauna rito, pinangunahan pa ni Advincula ang misa sa San Felipe Neri Parish sa lungsod ng Mandaluyong nitong Setyembre 15.

Pumalo na sa pitong alkalde ng Iloilo ang nagpositobo sa COVID-19.

Ayon sa Iloilo Provincial Health Department, ito’y sina Sta. Barbara Mayor Rema Somo; new Lucena Mayor Liecel Mondejar-Seville; Oton Mayor Carina Flores; Maasin Mayor Francis Amboy; Janiuay Mayor Bienvenido Margarico at iba pa.

Bukod dito, may ilang mga vice mayor din ng lalawigan ang nag-positibo sa COVID-19.

Sa huli, kapwa nanagawan sa kanilang mga nasasakupan ang mga opisyal na dinapuan ng COVID-19 na sumunod sa mandatory quarantine gayundin ang pagbabakuna para magkaroon anila ng karagdagang proteksyon pangontra sa banta ng virus at mga variants nito.

Uubra pa ring makakuha ng mga ebidensya ang ICC investigators kaugnay sa war on drugs ng Duterte administration, kahit hindi magtungo ng Pilipinas.

Ito ang paniniwala ni Atty. Kristina Conti, abogado ng rise up, isang grupo ng mga kaanak ng mga biktima sa nasabing drugs campaign.

Sinabi ni Conti na maaari namang makatulong o makapagbigay ng mga ebidensya ang mga grupo ng mga abogado sa imbestigasyon ng ICC.

Puwede naman aniya silang magkita o magkausap ng ICC investigators virtually kung saan maaari rin nilang maisumite ang mga hawak na ebidensya sa drugs war campaign ng administrasyon.

Pinangangambang sumirit pa sa 43K ang arawang kaso ng COVID-19 sa Metro Manila hanggang sa katapusan ng buwang ito.

Ito ayon kay health undersecretary Maria Rosario Vergeire ay base na rin sa mobility, public health system at pagsunod sa minimum health standards.

Gayunman, sinabi ni Vergeire na maaaring bumaba ang arawang kaso ng COVID-19 sa NCR sakaling maging epektibo ang ipinatutupad na GCQ with alert level 4.

Binalikan ni senate blue ribbon committee chair Richard Gordon ang Pangulong Rodrigo Duterte dahil sa pagtatanggol sa mga indibidwal na sangkot sa umano’y overpriced medical supplies.

Tinawag na cheap politician ni Gordon ang Pangulo sa pagpapatuloy ng pagdinig ng senado sa nasabing anomalya.

Binigyang-diin ni Gordon na kitang kita ang pagsisilbing abogado ng Pangulo kina dating budget undersecretary Lloyd Christopher Lao at dating presidential economic adviser Michael Yang.

Sinabihan pa ni Gordon ang Pangulo na hindi dapat mabahala sa mga pagtatanong para malaman ang katotohanan subalit malinaw ang pagsisinungaling ng mga dating opisyal na pilit idinidipensa ng Pangulo.

Muling iginiit ni Gordon na ang utang na loob ay hindi dapat palitan ng katiwalian o maging lisensya para magnakaw sa gobyerno.

Nagsanib-puwersa ang Philippine Navy at Philippine Marines para sa isang Naval war fighting exercise upang mapalakas ang pagtutulungan sa pagtugon sa anumang bantang kakaharapin ng AFP.

Nagpakitang gilas sa tinaguriang pagbubuklod 2021 ang mga bagong asset ng navy at marines kung saan itinampok ang amphibious assault/raid, insertion/extraction, amphibious sealift, tactical sealift, force protection capability, support and sustainment, afloat command and control, maritime search and rescue, shipboard helicopter operations o HELOPS at casualty evacuation operation o CASEVAC

Lumahok din sa war exercise ang bagong barkong pandigma ng NAVY na BRP Jose Rizal partikular sa isinawagang gunnery exercise, maritime interdiction operation, surface action group gaya ng air defense exercise, over the horizon targeting and search and attack unit operations.—mula sa ulat ni Jaymark Dagala (Patrol 9)