HEADLINES

Naniniwala si Defense Secretary Delfin Lorenzana na dapat higpitan ang proseso sa pagpapapasok ng mga refugee mula sa Afghanistan.

Sa gitna na rin ito, ayon kay Lorenzana ng mga pangambang mahaluan ng mga terorista ang mga papasok na refugee sa bansa.

Tiniyak ni Lorenzana ang pagbabanta sa galaw ng mga pumapasok na Afghan refugee, bagama’t wala aniyang poder ang Defense Department at ang militar sa pagpoproseso sa pagpasok ng mga ito sa bansa.

“Trabaho ‘yan ng pulis, dahil ‘di naman trabaho ng military ‘yan…pulis ang nagpa-process n’yan, kasama nyan ang DFA at saka yung immigration, so the DND is not involve with the reception of these refugees”

Gayunman ..sinabi ni Lorenzana na hindi magiging madali para sa Afghan refugees na makapag-ikot sa Pilipinas lalo’t mahigpit din ang mga ipinatutupad na patakaran kaugnay ng COVID-19.

“Ang gagawin niyan kumontak siguro sila ng local terrorist…it take time, at dahil kakaiba naman ang itsura ng mga Afghanist, madali silang makita sa iba-ibang lugar. But you are right,it is a very concerning situation kung kasama ng mga refugees na may teroristang kasama”

Si defense secretary Delfin Lorenzana.—mula sa ulat ni Jaymark Dagala (Patrol 9)

Dumating sa bansa ang 600,000 doses ng AstraZeneca vaccines na binili ng pribadong sektor.

Pasado alas-9 ng umaga dumating sa NAIA terminal ang AstraZeneca vaccines sakay ng China airlines flight.

Winelcome ni vaccine czar ang pagdating ng bagong batch ng AstraZeneca vaccines na ang 80%  aniya ay mapupunta sa LGUs sa labas ng Metro Manila at 20% ang pakikinabangan ng private sector.–-mula sa ulat ni Raoul Esperas

Inaasahang darating ngayong weekend o sa susunod na linggo ang panibagong suplay ng Sputnik V vaccines mula Russia.

Ayon kay vaccine czar Carlito Galvez Jr., ang dagdag na 190,000 doses ng Sputnik V ay para sa second dose inoculation.

Ipinabatid pa ni Galvez ang pagdating ngayong buwan ng 1M doses ng Sputnik light vaccines na isang beses lamang ituturok.

Hinimok ng isang grupo ang PNP na makiisa sa imbestigasyon ng ICC sa anti-drug war campaign ng Duterte administration.

Sinabi ni Dr. Aurora Parong, co-chair ng Philippine Coalition for the International Criminal Court na umaapela sila sa mga pulis na mayroong konsensya at naniniwala sa katotohanan at hustisya na makipagtulungan sa nasabing imbestigasyon.

Ayon kay Parong, ang anumang tamang gagawin ng mga pulis ay makatutulong para makamit ng mga biktima ng paglabag sa karapatang pantao ang hustisya.

Hindi papayagang makapag-dine-in sa mga restaurant sa NCR ang mga customer na bigong makapagpakita ng vaccination cards.

Ayon ito kay Eric Teng, pangulo ng Resto Ph o Restaurant Owners of the Philippines sa gitna na rin nang pagpapatupad ng alert level 4 sa Metro Manila.

Sinabi ni Teng na mahigpit ang bilin nila sa kanilang mga miyembro na maging vigilant sa pagpapatupad ng safety protocols matapos dumagsa ang mga guest ng walang vax cards at nais mag-dine-in simula kahapon.

Mayroong sapat na kuwarto sa mga isolation centers sa kabila nang pagsirit ng kaso ng COVID-19.

Binigyang-diin ito ni DILG undersecretary at spokesperson Jonathan Malaya, kaya’t hindi dapat mag-home quarantine ang mga dinadapuan ng COVID-19.

Iginiit ni Malaya na ang hawahan ng virus ay nangyayari sa mga bahay at hindi lamang sa mga pagtitipon o trabaho kaya’t hindi sapat na mayroong sariling kuwarto at banyo ang isang infected.

Umapela sa gobyerno ang CHR na makipagtulungan sa imbestigation ng ICC kaugnay sa drug war campaign ng Duterte administration.

Kasunod na rin ito nang pagtiyak ni CHR commissioner Karen Gomez-Dumpit ng kooperasyon sa ICC sa imbestigasyon nito kapag hiniling ng international court.

Sinabi ni Dumpit na dapat makilahok at tugunan ng gobyerno ang nasabing proseso ng ICC dahil dapat makita at maramdaman ng pamilya ng mga biktima ang ipinagmamalaki ng gobyerno na umiiral na sistema ng hustisya sa bansa.

Una nang iginiit ng Malakanyang na walang hurisdiksyon ang ICC sa Pilipinas matapos una nang kumalas ang bansa rito.

Mahigit 50 lugar na sa Quezon City ang nasa ilalim ng special concern lockdown dahil sa pagsirit ng kaso ng COVID-19.

Kabilang dito ang park ng pook palaris sa barangay UP campus na nakapagtala ng walong kaso ng COVID-19 kung saan kaagad dinala sa quaratine facility ang mga pasyente.

Naabisuhan naman ang mga residente bago isinailalim sa lockdown ang kani-kanilang mga lugar.

Tatagal ng dalawang linggo ang lockdown kung saan sasailalim sa swab test ang mga apektadong residente at  bibigyan ng QC government ng food packs at essential kits.

Apat pang bansa ang inilagay ng Pilipinas sa red list nito kaugnay sa COVID-19 risk classification mula Setyembre 19 hanggang 30.

Kabilang dito, ayon sa IATF ang Grenada, Papua New Guinea, Serbia at Slovenia.

Pasok sa red list ang mga bansang nakapagtala ng mahigit 500 kaso ng COVID-19 sa kada 100K population, kaya’t hindi uubrang makapasok ng Pilipinas ang mga magmumula rito maliban na lamang kung mga Pilipino ang sakay sa repatriation o special commercial flights.

Una nang inilagay sa red list ng bansa mula September 12 hanggang 18 ang Azerbaijan, Guadeloupe, Guam, Israel, Kosovo, Montenegro, North Macedonia, Saint Lucia at Switzerland.

Nilinaw ng Department of Interior and Local Government (DILG) na hindi apektado ng granular lockdown ang mga business establishment.

Ayon kay Undersecretary Jonathan Malaya,sakaling mag-positibo ang mga indibidwal sa isang establisyimento ay isasailalim lamang ito sa temporary shutdown.

Posible anya itong tumagal ng isang araw na susundan ng disinfection bago bumalik sa trabaho.

Una nang naglabas ang gobyerno ng guidelines sa bagong alert level system bilang batayan para sa granular lockdown. —sa panulat ni Drew Nacino