HEADLINES

Nanindigan si Foreign Affairs Secretary Teodoro Locsin na hindi ibebenta ng Pilipinas ang mga property nito sa Japan.

Ito’y sa gitna ng plano ng gobyerno na magbenta ng mga ari-arian bilang alternatibong “source of funds.”

Sa Senate hearing, binigyang-diin ni Locsin na malabong mangyari ang balak na ibenta ang mga lupain dahil nagsisilbing memorial ang mga ito para sa mga Pilipinong nagbuwis ng buhay noong World War 2.

Ang mga property ay matatagpuan sa highly-urbanized at commercial area ng Tokyo at Kobe, Japan na na-acquire ng Pilipinas sa 1956 reparations agreement bilang danyos sa sinapit ng mga Pinoy sa Japanese imperial force noong World War 2.

Ilan sa ari-arian na nagkakahalaga ng daan-daang milyong piso ay kinatitirikan ng ilang government facility tulad ng Philippine Embassy sa Tokyo.—sa panulat ni Drew Nacino

Ikinasa na ng House Committee on Ways and Means ang panukalang magbibigay ng 20%  discount sa mga bayarin ng mga health workers sa mahigit 42K Barangay.

Ayon kay 2nd District Albay Rep. Joey Salceda, Chairman ng komite, pinagtibay na ang “substitute bill” o kapalit ng ilang panukalang batas na nagsusulong sa “magna carta for Barangay health workers o BHWS act.”

Kabilang sa bayarin ng BHWs ang mga gastusing pangkalusugan, public transportation, restaurant, hotel accomodation, sinehan, burol at paglilibing sa mga namatay.

Sa ibang mga panukala ay nakasaad lamang ang 10 % discount at “value-added tax exemption sa mga BHW.

Binigyang diin ng kongresista na ang karagdagang probisyon ay nagbibigay ng malasakit sa sakripisyo ng mga naturang manggagawa lalo’t mababa lamang ang suweldo ng mga ito.—sa panulat ni Drew Nacino

Isang madre na ang patay habang 22 iba pa ang tinamaan ng COVID-19 sa isa na namang kumbento sa Quezon City.

Kasalukuyang nakararanas ng COVID surge ang Convent of Holy Spirit sa Barangay Immaculate Concepcion makaraang magkasakit ang 13 madre at 9 na staff member nito.

Kinumpirma ni Dr. Rolando Cruz ng City Epidemiology and Surveillance Unit noon lamang unang linggo ng Setyembre binawian ng buhay ang hindi pa pina-pangalanang madre.

14  anya sa mga nagkasakit ay fully-vaccinated habang ang iba ay wala pang bakuna kahit 1st dose.

Mayroong 90 kataong naninirahan sa kumbento kung saan 46 na ang sumailalim sa swab test noong Setyembre 10 habang ang pamunuan na ng Holy Spirit ang mangangasiwa sa test ng iba pa.

Mayorya ng mga madre na nagpositibo ay senior citizens na edad 80 pataas. —sa panulat ni Drew Nacino

Naniniwala ang ilang mambabatas sa paliwanag ni Health Secretary Francisco Duque na kulang ang supply noong kasagsagan ng pandemya kaya’t mataas ang presyo ng medical supplies.

Sa pagdinig ng House Committee on Good Government and Public Accountability, inihayag ni Duque na hindi na nila mahintay na bumaba ang presyo ng mga face mask, face shields at PPE dahil marami ng apektadong medical workers.

Kabilang sa mga sumang-ayon ang kilalang kaalyado ng administrasyon na si Deputy House Speaker Rodante Marcoleta at Quezon Province Rep. Jayjay Suarez.

Ayon kay Suarez, dahil sa law of supply and demand, sadyang mataas ang presyo noong panahong iyon na hindi maaaring kumpara ngayon dahil magkaiba ang sitwasyon noong 2020 sa kasalukuyang taon.

Inamin ni Duque na noong unang buwan ng pandemya ay umabot na sa 27 health workers ang namamatay kaya’t napilitan na silang bumili kahit mahal ang presyo.—sa panulat ni Drew Nacino

Asahan na ang pag-ulan sa ilang bahagi ng bansa dahil sa Inter-Tropical Convergence Zone na pinaigting ng Low Pressure Area na namataan sa Eastern Visayas.

Namataan ng pagasa ang LPA sa layong 50 kilometero Hilagang-Silangan ng Guiuan, Eastern Samar at nakaloob sa Intertropical Convergence Zone.

Kikilos ang nabanggit na sama ng panahon pa-kanluran hilagang-kanluran patungong Bicol region at Mimaropa pero maliit ang posibilidad na maging isa itong bagyo.

Kabilang naman sa mga inaasahang makararanas ng katamtaman hanggang sa malakas na pag-ulan ang Northern Samar, Quezon, Mimaropa at Bicol region.—sa panulat ni Drew Nacino

Nananatili sa high risk category ang Intensive Care Unit o ICU beds sa bansa makaraang iulat ng Department of Health (DOH) na 77%  ng kabuuang bilang nito ang nagamit na.

Batay sa pinakahuling datos, 79% ng kabuuang 1,500 beds sa NCR ang okupado na.

Ikinokonsiderang high risk ang occupancy rate kung 70% hanggang 85% na itong okupado.

Nasa 73% aman ng kabuuang 15,900 ward beds sa buong bansa ang ginagamit na habang 72% ng 4,500 ward beds sa NCR ang okupado na.

Umabot naman sa 57% ng 3,300 mechanical ventilators ang nagamit na habang 61% ng 1,200 mechanical ventilators sa NCR ang ginagamit na rin.—sa panulat ni Hyacinth Ludivico

Pinapurihan ng National Union of Peoples’ Lawyers o NUPL ang desisyon ng International Criminal Court na ipagpatuloy ang imbestigasyon kaugnay ng kontrobersyal na “war on drugs” ni Pangulong Rodrigo Duterte.

Sa isang liham, binigyang diin ni NUPL President Edre Olalia, ang nangyayaring extrajudicial killing sa bansa na ikinasawi ng maraming Pilipino.

Hulyo 4, 2016 nang unang punahin ng grupo ang extra-judicial killings sa drug campaign ng administrasyon, na ayon sa grupo ay target lamang ang mahihirap na Pilipino.

Nanawagan naman si Olalia sa mga miyembro ng nupl na manatiling matatag sa gitna ng maraming problema at pagsubok na maaari nilang kaharapin.—sa panulat ni Hyacinth Ludivico