HEADLINES

Kinukulang na sa oxygen tanks ang Western Visayas.

Ayon kay Iloilo Provincial Administrator Atty. Suzette Mamo, iisa lamang ang supplier ng COVID-19 oxygen tanks sa rehiyon kaya’t limitado lang ang suplay na natatanggap ng bawat ospital.

Aniya, nakakabahala na ito dahil patuloy ang pagdami ng mga kaso ng COVID-19 partikular na sa Iloilo.

Patuloy naman ang paghahanap ng Iloilo Provincial Government ng dagdag na supplier upang makabili ng oxygen tanks.

Sa ngayon umabot na sa 118,139 ang kabuuang bilang ng COVID-19 cases sa Western Visayas.—sa panulat ni Hyacinth Ludivico

Ipinagtanggol ni Metro Manila Council at Parañaque City Mayor Edwin Olivarez ang implementasyon ng granular lockdown sa ilang bahagi ng National Capital Region.

Ito’y sa gitna ng batikos ng ilang grupo ng mga doktor sa lockdown maging sa panibagong alert level system na sinimulang ilarga kahapon.

Ayon kay Olivarez, bibiglain din ang pagpapatupad granular lockdown dahil mabilis ang pagkalat ng COVID-19 lalo ang delta variant nito.

Iginiit ng Alkalde na maiging sorpresa ang pag-a-anunsyo ng lockdown upang maiwasan ang pagkalat ng COVID-19.

Tuwing mag-a-anunsyo anya ng lockdown ay agad nagpupuntahan ang mga residente ng ncr sa kanilang mga kaanak o kaibigan sa labas ng Metro Manila upang makaiwas sa mga restriction.

Sa ngayon ay mayroon ng 2,304,192 COVID cases sa bansa kabilang ang 177,946 are active cases.—sa panulat ni Drew Nacino

Inaasahang makakatanggap ang Pilipinas ng 14.89 milyon doses ng Pfizer at Moderna vaccines mula sa Amerika bago matapos ang buwan.

Ayon kay NTF Chief Implementer Secretary Carlito Galvez Jr., mapapataas nito ang vaccination program ng bansa habang inihahanda na ang guidelines para sa pagbabakuna sa mga menor de edad at general public alinsunod sa approval ng vaccine expert panel.

Sinabi pa ni Galvez na inaasahang darating ngayong buwan ng Setyembre ang mahigit 30 milyong COVID-19 vaccines.—sa panulat ni Hyacinth Ludivico

Inilunsad ng Securities and Exchange Commission o SEC ang bagong feature sa kanilang online company registration system na magpapahintulot sa domestic corporations na makumpleto ang registration process sa loob lamang ng isang araw.

Sa pamamagitan ng one-day submission and express registration of companies o Onesec feature ng electronic simplified processing of application for registration of company, ay mas mapapabilis na ang pagsisimula ng negosyo.

Ang Onesec ay tatanggap ng aplikasyon para sa registration ng domestic stock corporations na 100% pag-aari ng mga Pinoy at ang common shares ay may par value na hindi bababa sa piso.

Ayon kay Sec. Chairperson Emilio Aquino, makakatulong ang bagong feature upang madaling makakasunod ang mga bagong negosyo sa registration requirements ng komisyon.

Matitiyak rin aniya nito ang pagpapatuloy ng business sector sa gitna ng COVID-19 pandemic.—sa panulat ni Hyacinth Ludivico

Inoobliga na magpabakuna kontra COVID-19 ang lahat ng empleyado ng Davao City government.

Alinsunod ito sa direktiba ni Davao Mayor Sara Duterte, kung saan dapat fully vaccinated na ang lahat ng plantilla, job order, contract of service at volunteers bago sumapit ang Nobyembre 30, 2021.

Kaugnay nito, inatasan na rin ang Human Resource Management Office na i-organisa ang schedule ng bakuna ng mga tauhan ng City government.

Ang mga tatangging magpabakuna ay sususpindihin ng isang buwan.

Habang ang mga lalabag sa kautusan ay sususpindihin ng isa hanggang anim na buwan naman para sa unang paglabag.

Tatanggalin naman sa serbisyo ang mga tauhan na lalabag sa ikalawang pagkakataon.

Hindi naman kasama sa mandatory vaccination ang mga indibidwal na hindi pa maaaring bigyan ng bakuna.—sa panulat ni Hyacinth Ludivico

Muling pinaliguan ng sermon ni Pangulong Rodrigo Duterte si Senate Blue Ribbon Committee Chairman Richard Gordon, na nangunguna sa imbestigasyon ng umano’y anomalya sa pandemic funds ng gobyerno.

Sa kanyang Talk to the People, nagbalik-tanaw si Pangulong Duterte sa pagiging SBMA Chairman noon ni Gordon na anya’y pinakinabangan nang husto ng Senador sa panahon ni dating Pangulong Fidel Ramos.

Inungkat din ng Pangulo ang kinasasangkutan umanong katiwalian ni Gordon bilang Chairman ng Philippine Red Cross.

Gusto niya hawakan ang Subic, ngayon wala na ang Subic kanya, may red cross naman siya. May I remind you Senator na alam mo ang corruption mo diyan sa red cross buhay ang nilalaro

Kasi ang kapital mo nga dugo, hindi ka na nahiya diyan  p******** ang laro mo diyan buhay, ang kapital mo dugo,”wika ng Pangulong Duterte.

Kinuwestyon naman ng punong ehekutibo kung saan napupunta ang ibinabayad sa red cross ng sinumang nangangailangan ng dugo.

Ang mahirap diyan o mayaman gusto ng dugo sa red cross,nagbabayad isama mo diyan ang mga dugo na kinuha mo diyan sa mga sundalo pati sa mga sibilyan. I’m just trying to reconcile, magbayad ka, maski mahirap ka, saka magpablood letting ka para may maibigay kang tulong sa kapwa mo Pilipino,” pahayag ng Pangulo.

Dahil dito, binantaan ni Pangulong Duterte si Gordon na ipakakagat na lamang niya ito kay “dracula” upang makakuha ng maraming dugo.

Kaya kapag nakausap ko si Dracula ipakagat kita kapag natutulog,kunin lahat ng dugo mo. Marami kang dugo, laki ng  katawan mo bilog na bilog puro dugo iyan. Ako galit talaga sa iyo, Gordon sa totoo lang, alam mo kung bakit? Kilala mo ako all these years, hindi mo ako nakita nagbabastos ng tao. Nakita naman ninyo kagabi I behave. I defer to you, pero kapag nawala ang respeto ko sa tao, anak ka ng p******** bababuyin talaga kita hanggang mamatay ka o hanggang harapin mo ako, ” wika ng Pangulong Rodrigo Duterte.—sa panulat ni Drew Nacino

Sinita ng mga doktor ang implementasyon ng panibagong alert level systems sa Metro Manila kasabay ng nararanasang surge sa COVID-19 cases.

Kinuwestyon ni Philippine College of Physicians President, Dr. Maricar Limpin ang timing sa pagpapatupad ng alert level system gayong puno na ang mga ospital sa kalakhang Maynila.

Ayon kay Limpin, dapat magbigay ng metrics o batayan ang gobyerno hinggil sa ipinatutupad na alert level sa Metro Manila.

Dapat anyang paghandaan na ng pamahalaan ang posibleng pagtaas o pananatili ng datos ng mga kaso habang nakataas ang alert levels sa NCR.

Naniniwala naman si Limpin na bagaman maluwag ang quarantine restrictions sa Metro Manila, dapat pa ring iwasan ang paglabas ng bahay at kung hindi naman maiiwasan ay dapat sundin ang health protocols.—sa panulat ni Drew Nacino

Isang 3 taong gulang na babae ang patay matapos kumain ng jelly candy sa Gabaldon, Nueva Ecija.

Ayon sa mga otoridad, paborito umano ng paslit ang naturang candy na binibili ng ina.

Gayunman, nahirapan umanong huminga ang bata makaraang mabulunan.

Pinayuhan naman ng Municipal Health Office ang mga magulang na huwag basta magbigay ng pagkain sa mga anak lalo’t kung hindi pa ito masyadong marunong ngumuya lalo ang mga edad tatlo pababa.—sa panulat ni Drew Nacino