Hindi tatakbong Senador sa eleksyon 2022 si Leyte Representative Lucy Torres-Gomez.
Ito ayon sa kanyang asawa na si Ormoc Mayor Richard Gomez, at kinumpirmang tatakbo ito sa pagka-Alkalde ng Ormoc City.
Matatandaang noong Hulyo, inihayag ni Senate President Vicente Sotto III na kabilang si Lucy sa para sa kanilang senatorial-lineup sa 2022.
Samantala, hindi pa malinaw kung tatakbo naman bilang kongresista ang kanyang asawang si Richard.—sa panulat ni Hyacinth Ludivico
Kinuwestyon nina Senate Minority Leader at Senator Nancy Binay ang plano ng PCOO na pagtatayo ng media hub o broadcast station sa Mandaue City, Cebu.
Ayon kay kina Drilon at Binay, hindi naman “urgent” ang balak ng p.c.o.o. na maglagay ng P200 milyon media hub sa Visayas sa susunod na taon kaya’t dapat itong ipagpaliban.
Iginiit ni Binay na kahit may pampatayo ng media hub ang ahensya, nanganganib namang makaltasan ang 2022 budget ng 76 na public hospitals dahil sa pagtapyas sa budget ng Department Of Health.
Nilinaw ni PCOO Secretary Martin Andanar na magkakaroon ng TV studio, AM at FM station ang Visayas media hub katulad ng itinatayong media hub sa Davao City.
Inihayag naman si Drilon na bagaman hindi masama ang pagtatayo ng media hubs dahil magagamit sa pag-uulat kung ano ang ginagawa ng gobyerno, hindi naman ito napapanahon sa gitna ng COVID-19 pandemic.
Samantala, kinuwestyon din ng mga senador ang hirit na P50 milyon ng PCOO para naman sa maintenance at iba pang operating expenses ng isang media training academy na itatayo ngayong taon sa Bukidnon.—sa panulat ni Drew Nacino mula sa ulat ni Cely Ortega-Bueno (Patrol 19)
Dapat irespeto ng Pilipinas ang sistema ng International Criminal Court o ICC bilang responsableng miyembro ng International Community.
Ito ang inihayag ni Senador Koko Pimentel sa gitna ng ilalargang imbestigasyon ng ICC Sa war on drugs ng Pilipinas.
Ipinaliwanag ni Pimentel na ang ICC ay isang international body na nilikha sa pamamagitan ng tratado at hindi ito maaaring kontrolin.
Pinapurihan naman ni Senador Leila De Lima ang pagsisimula ng preliminary investigation ng ICC sa umano’y mga pagpatay sa ilalim ng “war on drugs” ng Duterte administration.
Umaasa si De Lima na hindi na magtatagal ay maglalabas na rin ng warrants of arrest ang naturang korte laban kay Pangulong Rodrigo Duterte at mga miyembro ng sinasabing Davao death squad. —sa panulat ni Drew Nacino mula sa ulat ni Cely Ortega-Bueno (Patrol 19)
Sumakabilang-buhay na si dating Northern Samar 2nd district Rep. Emil Ong.
Kinumpirma ni Northern Samar Governor Edwin Ongchuan na pumanaw ang kanilang ama kahapon.
Hindi nman idinetalye ng gobernador ang sanhi ng pagkamatay ng dating kongresista.
Si Ong, na isang Certified Public Accountant at abogado lawyer, ay nagsilbi ring Administrator ng National Food Authority noong panahon ni dating Pangulong Cory Aquino.—sa panulat ni Drew Nacino
Tiniyak ng Department of Education (DEPED) ang malalimang imbestigasyon sa pagkamatay sa hazing ng isang lalaking grade 10 student sa Bayan ng San Enrique, Negros Occidental.
Hinikayat din ng DEPED ang mga paaralan na maging aktibo upang maiwasan ang naturang insidente.
Nagpaabot naman ng pakikiramay ang kagawaran sa pamilya ng biktima at kinondena naman ang anumang karahasan na kinasasangkutan ng mga mag-aaral.
Bukod sa DEPED, gumulong na rin ang hiwalay na imbestigasyon ang Commission on Human Rights sa pagkamatay ng 18 anyos na estudyante ng Doña Hortencia Salas Benedicto National High School sa La Carlota City.—sa panulat ni Drew Nacino
Hinikayat ng Department Of Health ang mga ospital maging ang mga Local Government Unit na dagdagan ang kanilang bed capacity para sa mga COVID-19 patient.
Ito, ayon kay Health Secretary Francisco Duque III, ay dahil sa patuloy na pagtaas ng healthcare at ICU utilization rate bunsod ng patuloy na pagsirit ng COVID-19 cases sa bansa.
Dapat anyang maglaan ng sapat na mechanical ventilator upang magkaroon ng sapat na kapasidad para sa mga moderate, severe at critical case.
Dapat ding alagaan sa pansamantalang treatment at monitoring facilities ang mga mayroong mild cases at asymptomatic.
Pinabibilisan din ni Duque ang pagbabakuna sa mga priority group upang ma-protektahan ang vulnerable population. —sa panulat ni Drew Nacino
Nasakote ng National Bureau of Investigation ang isang Tsino sa Maynila sa pagbebenta umano ng COVID-19 vaccination slot sa halagang P18,000.
Kinilala ng NBI ang suspek na si Xiao Shio kilala rin na Feng Wang Qun.
Naaresto si Shi sa inilunsad na entrapment operation ng NBI-Anti-Fraud Division sa isang mall sa lungsod habang tumatanggap ng bayad na P5,000 mula sa isang biktima.
Nasabat din sa dayuhan ang COVID-19 vaccination identification cards na may mga pangalang Qun F. Wang, Cuiyin Lin at Wenjuan Yang.
Nag-ugat ang operasyon sa reklamo ng isang biktima na nagbayad ng P18,000 para sa slot ng first dose.
Batay sa imbestigasyon, nagpapakilala si Shi bilang miyembro ng Manila COVID-19 vaccination team at may mga koneksyon sa mga opisyal ng Barangay 239 sa Binondo. —sa panulat ni Drew Nacino
Aabot na sa 40 milyong COVID-19 vaccine dose ang naiturok sa Pilipinas simula noong Marso.
Sa datos ng DOH, binubuo ang nabanggit na bilang ng 22.3 milyon na tumanggap ng first dose habang 17.6 milyon ang fully vaccinated.
Hinimok naman ng gobyerno ang publiko na magpabakuna hangga’t libre ito.
Target ng pamahalaan makapagbakuna ng hangang 70 milyong indibidwal bago matapos ang taon upang makamit ang herd immunity. —sa panulat ni Drew Nacino
Pinabubusisi ng Department of the Interior and Local Government (DILG) sa mga may-ari ng restaurant at iba pang establisyemento ang vaccination cards ng kanilang customers.
Ito, ayon kay DILG Spokesman, Undersecretary Jonathan Malaya, ay upang maka-avail ng indoor services ang mga bakunado sa kabila ng ipinatutupad na GCQ with alert level 4 sa Metro Manila.
Sa ilalim ng alert level 4, papayagan ang indoor dine-in service sa 10% capacity pero para lamang sa mga fully vaccinated.
Dapat din anyang fully vaccinated ang mga empleyado ng mga establisyimentong pinayagang makapag-operate sa ilalim ng panibagong alert level system.—sa panulat ni Drew Nacino
Nai-evacuate na ang tatlong Pilipino mula sa Afghanistan, bagama’t 20 pang kapwa Pinoy ang nananatili sa nasabing bansa.
Ipinabatid ito ng DFA kaya’t nasa halos 200 na ang napapauwing Pinoy mula sa Afghanistan.
Ayon sa DFA, sa 20 Pinoy na naiwan sa Afghanistan, 18 ang piniling manatili doon samantalang bukas naman sa repatriation ang dalawang iba pa.
Tiniyak ng DFA na ang embahada ng bansa sa Islamad, Pakistan na nakakasakop sa Afghanistan ay patuloy na magmo-monitor sa sitwasyon dito at maghahanda ng assistance para sa mga Pilipino rito.