HEADLINES

Ibinuking ni Bayan Muna Partylist representative Ferdinand Gaite ang DPWH sa paggamit nito ng mahigit P10-B na contingency fund sa pagpapatayo ng swimming pools at batcave.

Kasunod na rin ito nang pagbubusi ng bayan muna sa listahan ng mga proyketo ng DPWH na pinaggamitan nito ng contingency fund na ginamit din sa pagtatayo ng sports facilities, cruise sport, conventon center at museum.

Binigyang-diin ni gate sa pagdinig ng panukalang 2022 budget ng DPWH na ang contingent fund ay hindi uubrang gamitin sa mga naturang proyekto na maaaring pa simpleng pork barrel funds.

Nilinaw naman ni DPWH secretary Mark Villar na ang cotingent fund ay hindi pondong nasa ilalim ng kanilang ahensya bagama’t nangakong isusumite sa kamara ang listahan ng mga proyektong pinagkagastusan ng nasabing pondo.

Halos 91% ng mga lalawigan at lungsod sa bansa ang itinuturing na high risk kaugnay sa COVID-19.

Sa mga lugar nito , ayon kay health secretary Francisco Duque III, 82% ang mayroong mataas na health care utilization at ICU rates.

Sa ilalim ng metric ng DOH, ang mga lugar na tinaguriang high risk ay mayroong mahigit 70% na okupado  ang COVID-19 hospital at ICU beds.

Ipinabatid pa ni Duque na nananatiling mataas ang COVID-19 fatality rate sa mga matatanda o may edad 50 hanggang 80.

Hindi pa masabi ng Malakanyang kung kailan maisasailalim sa maluwag na quarantine restrictions ang Metro Manila.

Ayon ito kay presidential spokesman Harry Roque bagama’t ang mahalaga naman ay umuusad ang pagbabakuna kung saan mahigit 60 percent na sa mga taga-Metro Manila ang naturukan ng bakuna kontra COVID-19.

Sinabi ni Roque na ang alert level 4 na ipinatutupad sa Metro Manila ay dapat maging epektibo dahil ito anya ang targeted approach para mapababa at mapahina ang pagkalat ng COVID-19 sa rehiyon.

Publiko na ang huhusga sa mga nakalap na impormasyon at dokumento ng senate blue ribbon committee sa imbestigasyon hinggil sa pagbili ng procurement service ng DBM ng medical supplies sa pharmally pharmaceutical corporation.

Binigyang-diin ito ni senador Panfilo Lacson sa harap nang pag testigo sa kamara ni dating PS DBM ngayo’y overall deputy ombudsman Warren Liong na walang overpricing sa pagbili ng medical supplies sa pharmally.

Ayon kay Lacson, ang mga record o dokumento ang makapagsasabing ‘di hamak na mas mataas ang presyo ng pharmally kumpara sa presyo ng ibang suppliers tulad na lamang ng face mask na sa local manufacturer ay P13.50 lang, subalit naglalaro sa P22 hanggang halos P28 ang presyo kada isa ng Pharmally.

Kinontra rin ni Lacson ang pahayag ni Liong na nasunod ang tamang procedure sa transaksyon sa Pharmally na ang P635,000 na capital ay taliwas sa nakasaad sa resolution ng government policy board  na dapat legally, technically at financially capable ang kumpanyang makikipag-transact para sa pagbili ng  common use supplies.

Lumilitaw rin aniyang kahit wala pang purchase order ay naka-deliver na ang pharmally sa gobyerno na patunay na mayroon silang koneksyon at mayroon nang impluwensya sa nasabing purchase.—mula sa ulat ni Cely Bueno (Patrol 19)

Pinagsusumite ni senate minority floorleader Franklin Drilon ang PCOO o Presidential Communications Operations Office ng record ng halos 1,500 contractual employees nito.

Ito ayon kay Drilon ay para maiwasang paghinalaang may pinopondohang troll farms ang gobyerno matapos niyang tanungin ang PCOO sa pagdinig ng panukakang 2022 budget ng ahensya kung ang mga naturang contractual workers ay mga troll.

Sinabi ni Drilon na kakaiba ang nangyari dahil mula sa 3,883 plantilla position sa PCOO, 2,107 pa lang ang napunuan na nangangahulugan aniyang mayroon pang malaking vacancy sa ahensya, subalit nag-hire na ang ahensya ng contractual workers.

Dahil dito, nais ni Drilon na isumite ng PCOO ang pangalan, address , job description at daily time record ng mga naturang contractual worker na susundin naman ng PCOO bagama’t hihingin anito muna ang opinyon ng kanilang leg office kung uubrang isumite ang address ng contractual workers na posibleng paglabag sa data privacy act

Magugunitang pinuna ng COA ang pag-hire ng PCOO ng contractual workers na pinaglaanan nito ng P76-M na budget.-–mula sa ulat ni Cely Bueno (Patrol 19)

Umaasa si senador Risa Hontiveros na susundin ng Pangulong Rodrigo Duterte  ang sariling mga salita nito na “kung walang itinatago, bakit matatakot?”.

Kasunod na rin ito nang paggigiit ni Hontiveros na panahon na para harapin ng Pangulong Duterte ang imbestigasyon ng ICC o  International Criminal Court hinggil sa anti-drug war campaign ng gobyernong Duterte.

Ayon kay Hontiveros, hindi dapat harangin pa ang mga opisyal ng ICC sa pagtupad ng mandato nitong mag imbestiga at matukoy ang mga utak at arkitekto ng mga malalang krimen tulad ng madugong patayan sa bansa dahil sa drug war.

Inaasahan din ni Hontiveros na aktibong makikipagtulungan ang sambayanan partikular na ang mga opisyal ng bansa para  mapanagot ang lahat ng may sala.—mula sa ulat ni Cely Bueno (Patrol 19)

Sumirit pa ang kumpirmadong kaso ng COVID-19 sa bansa sa 2,304,192 matapos madagdaga ang 21,261 na mga bagong kaso nito.

Dahil dito, umakyat pa sa 177,946 ang active cases ng COVID-19 kung saan 86.1% ang mild, 9.2% ang asymptomatic, 1.4% ang severe at .6% ang critical condition.

Pumapalo naman sa halos 2.1M na ang total recoveries matapos maitala sa 13,644 ang mga bagong gumaling sa COVID-19.

Nasa mahigit 36,000 na ang death toll sa COVID-19 kabilang ang 277 na mga pasyenteng bagong nasawi sa naturang virus.-–mula sa ulat ni Aya Yupanco

Inamin ni vaccine czar Carlito Galvez, Jr. Na kulang ang suplay ng Tocilizumab na isa sa mga gamot sa COVID-19.

Sinabi ni Galvez na wala pang makukuhang suplay ng nasabing gamot ang bansa bagama’t naipaabot na nila sa Swiss Ambassador at manufacturer ng Tocilizumab na Roche ang problema sa supply nito.

Una nang inihayag ng DOH na nakipag-ugnayan na ito sa iba’t ibang supplier ng Tocilizumab mula sa Iran.

Dapat na isailalim sa mas mahigpit na quarantine classification ang Metro Manila.

Ayon ito kay Dr. Antonio Dans, spokesperson ng Healthcare Professionals Alliance against COVID-19, dahil hindi naman bumaba ang kaso ng COVID-19 at nananatiling dagsa ang mga pasyente ng COVID-19 sa mga ospital.

Sinabi ni Dans na sa tingin nila ay nasa alert level 5 ang Metro Manila matapos maitala ang aniya’y pinakamasamang pagsirit ng kaso ng COVID-19 sa nakalipas na isang taon at kalahati.

Hindi na aniya dapat hintaying pang magkapaton- patong ang mga namamatay sa emergency room bago ipatupad ang alert level 5 sa NCR.

Patuloy ang panawagan ng Philippine National Police o PNP sa mga taga-Metro Manila na makipagtulungan, sumunod sa patakaran at unawain ang mga bagong patakaran.

Ito ang pahayag ni PNP Chief P/Gen. Guillermo Eleazar ngayong nagsimula na ang General Community Quarantine o GCQ with granular lockdown at alert level system sa NCR.

Ayon kay Eleazar, generally peaceful naman ang unang araw ng GCQ kung saan, may mangilan-ngilang negosyo na ang nagbukas, subalit limitado pa rin ang maaaring lumabas.

Batay sa datos ng PNP mula nang isailalim ang Metro Manila sa MECQ ay aabot sa 300 libo ang kanilang nahuling lumalabag mula Agosto a-21 hanggang kahapon, Setyembre a-15.

Naniniwala si Eleazar na ang pagsunod lamang sa Quarantine Protocols ang susi upang ganap na mapigilan ang mabilis na pagkalat ng virus sa buong bansa