HEADLINES

Kinilala ng National Police Commission o NAPOLCOM ang naging ambag ng National Telecommunications Commission o NTC para sa pagpapanatili ng Kapayapaan at Kaayusan sa bansa.

Ayon sa NAPOLCOM, maliban sa paghahatid ng mga abiso, paalala at babala sa publiko, nakuha rin ng NTC ang pulso ng mamamayan sa mga bagong patakaran na ipinatutupad ngayong panahon ng pandemiya.

Kabilang sa mga ito ang survey ng NTC tungkol sa pagpapatupad ng checkpoint sa panahon ng Community Quarantine at ang pananaw ng mga Pilipino sa community safety.

Ayon ay NAPOLCOM Vice Chairman at Executive Officer Vitaliano Aguirre II, napakalaking bagay aniya sa panahong ito ang pagpapakalat ng mga makabuluhang impormasyon na makasasagip ng buhay at pakikinabangan ng maraming Pilipino

Ipinag-utos ni DILG secretary Eduardo Año sa local government units at NCRPO ang pagpapaigting sa pagpapatupad ng minimum public health standards sa Metro Manila.

Sinabi ni Año na hindi magbabago ang basic rules kahit pa ipinatutupad ang bagong alert level system, kaya’t dapat matiyak na sumusunod ang publiko sa health protocols.

Ayon kay Año, dapat buhayin ng LGUs at NCRPO ang kanilang task force displina, barangay disiplina brigades, force multipliers at police marshalls para tumutok sa mga aktibidad ng mga residente ng Metro Manila.

Muling bumaba ang reproduction number ng COVID-19 sa Metro Manila.

Ipinabatid ni Dr. Guido David, fellow ng OCTA research group na bumaba pa sa 1.28 ang reproduction number sa NCR mula September 9 hanggang 15 kumpara sa 1.34 mula September 2 hanggang 8.

Ayon kay David, nakapagtala ang NCR ng average na 5, 819 COVID-19 cases kada araw sa nakalipas na linggo at may growth rate na 9%.

Inihayag pa ni David na ang average daily attack rate sa Metro Manila ay 41. 66 cases kada 1,000 populasyon at positivity rate na 25%.

Mas pabor ang Pangulong Rodrigo Duterte sa imbestigasyon ng kamara kaysa ng senado sa isyu ng umano’y overpriced medical supplies na binili ng doh.

Sinabi ng Pangulo na walang makukuhang makatuwirang sagot mula sa senado dahil ang imbestigasyon dito ay pinangungunahan ni senador Richard Gordon na tinawag nitong despot at pathological storyteller.

Binabara aniya at pinatitigil ni Gordon sa pagsasalita ang resource persons hanggang dumating sa puntong napapasunod ng senador ang testigo sa teorya nitong may katiwalian sa nasabing isyu.

Taliwas ito ayon sa Pangulo sa sitwasyon sa kamara kung saan malayang magsalita ang mga testigo.

Pinayagan na ng Pangulong Rodrigo Duterte sina Health Secretary Francisco Duque III at vaccine czar Carlito Galvez, Jr. na patuloy na dumalo sa imbestigasyon ng senado sa umano’y overpriced medical supplies na binili ng DOH.

Ayon sa Pangulo, wala namang ibang sasabihin sina Duque at Galvez kundi katotohanan lamang na aniya’y magiging sampal kay senate blue ribbon committee chair Richard Gordon na tinawag pa nitong “stupid”.

Una nang inihayag ng Pangulo na kailangang humingi muna ng go signal sa kanya ang cabinet officials bago dumalo sa nasabing pagdinig.

Iginiit ng Malakanyang na walang hurisdiksyon ang ICC o International Criminal Court sa Pilipinas.

Ito ayon kay Chief Presidential Legal Counsel Salvador Panelo ay matapos nang kumalas ang Pilipinas sa ICC.

Sinabi ni Panelo na paglabag sa karapatan ng bansa at pakikialam sa Domestic Affairs ng gobyerno ang gagawing imbestigasyon ng ICC sa anti-drug campaign ng Duterte administration.

Kasabay nito, ipinabatid ni Panelo na hindi papapasukin sa bansa ang mga imbestigador ng ICC.—mula sa ulat ni Jopel Pelenio (Patrol 17)

Wala pang natatanggap na formal communication ang CHR mula sa ICC o International Criminal Court.

Kaugnay ito sa pagsisimula ng imbestigasyon ng ICC sa anti-illegal drugs campaign ng Duterte administration.

Sinabi ni CHR chair Chito Gascon na hihintayin pa nila ang ICC para pormal na ipaalam sa kanila ang imbestigasyon nito hinggil sa usapin na kontrolado mismo ng international court.

Ayon kay Gascon, ang mga pagpatay na may kinalaman sa drug war ng gobyerno na posibleng imbestigahan ng ICC ay maaaring siya ring iniimbestigahan ng CHR.

Nabigyan na ng DFA ng care packages ang halos 30 Pinoy fishermen na stranded sa karagatang sakop ng China.

Kabilang sa care package, ayon kay DFA Assistant Secretary Enrico Fos ay pagkain, damit at hygiene kits.

Kasabay nito, ipinabatid ni FOS na pinaplantsa na ng may-ari ng bangka na nakabase sa Taiwan ang pagpapauwi sa mga mangingisdang Pinoy.

Pinaiimbestigahan na rin sa senate blue ribbon committee ang umano’y kwestyunableng pagbili ng mga PPE o Personal Protective Equipment ng PITC o Philippine International Trade Corporation.

Sa kaniyang inihaing resolusyon, tinukoy ni Senador Leila De Lima ang 2020 COA report hinggil sa emergency procurement ng PITC ng  iba’t ibang PPE mula sa isang supplier nang hindi umano ikinonsider ang mas mababang presyo para sa bawat item.

Batay sa COA report, nasa P186.58-M ang halaga ng sampung magkakahiwalay na kontrata na ini-award ng PITC noong Abril 1, 2020  para sa pagbili ng mga surgical mask, shoe cover, N95 mask, head covers, goggles, gloves, face shields, coveralls at aprons na para sa DOH na binili sa Biosite Medical Instruments na naka-base sa Matina, Davao City.

Sinabi ni De Lima na nakatipid sana ng halos P2.17-M kung bumili ang PITC sa ibang kumpanya na nag-alok ng mas mababang presyo.

Bukod dito, kasama rin sa pinaiimbestigahan ni De Lima ang isa pang  report ng COA na nabigo ang PITC na gamitin ang mahigit P11-B na inilipat dito ng iba’t ibang ahensya ng gobyerno mula 2014 hanggang 2020 para sa mga proyektong ipapa-bidding pa lamang ngayong 2021 tulad nang pagbili para sa DOH ng kama, wheelchair, ECG machines at pagpapatayo ng national reference laboratory building.—mula sa ulat ni Cely Bueno (Patrol 19)

Umapela si Senate President Vicente Sotto III sa mga kapwa senador  na kaagad aprubahan ang panukalang batas hinggil sa mandatory registration ng prepaid sim cards.

Kasunod na rin ito nang paglalatag sa plenaryo ng Senate Bill number 2395 o panukalang Sim Card Registration Act na ayon sa may akda nitong senate committee on public services chair Grace Poe ay mag-o-obliga sa mga telecommunications company at kanilang resellers na kunin ang impormasyon nang bibili ng sim cards.

Binigyang-diin ni Sotto na ang registration ng prepaid sim card ay para na rin sa kaligtasan ng publiko at ng bansa mula sa mga krimen at terorismo.

Tinukoy ni Sotto ang reports na nagamit na ang cellular phones na mayroong unregistered sim card sa pagpapasabog ng mga bomba, sa kidnapping at laganap na financial fraud o scam.

Sinabi ni Sotto na batay sa datos ng DICT, nasa 129.6M ang prepaid mobile phone subscribers sa bansa noong 2018 habang nasa mahigit 5M naman ang postpaid subscribers.—mula sa ulat ni Patrol 19, Cely Bueno