HEADLINES

Ipinagtanggol ni Senate President Vicente Tito Sotto III ang ginagawang imbestigasyon ng Senate Blue Ribbon Committee hinggil sa biniling medical supplies ng DOH.

Binigyang-diin ni Sotto na hindi makapipinsala o makasisira sa bansa ang imbestigasyon ng senado para maliwanagan ang isyu at makapagrekomenda ng mga kinakailangang hakbang upang hindi na maulit ang isang anomalya.

Sinabi ni Sotto na hindi naman prosecutor ang mga Senador at Ehekutibo at Ombudsman aniya ang may tungkuling mag-prosecute sa mga lilitaw na sangkot sa anumang anomalya o iregularidad.

Una nang inihayag ng ilang administration congressmen na gusto lamang wasakin ng ilang senador ang Pangulo sa ginagawang imbestigasyon dahil mismong COA ang nagsabing walang overprice sa mga biniling medical supplies.–-mula sa ulat ni Cely Bueno

Hindi magpapaapekto ang mga senador sa banat ng ilang administration  congressmen sa ginagawang imbestigasyon sa isyu nang pagbili ng gobyerno ng medical supplies sa Pharmally Pharmaceutical Corporation.

Tiniyak ito nina Senate Blue Ribbon Committee Chair Richard Gordon at Senate Minority Leader Franklin Drilon na nagsabing hindi sila matitinag  sa pag-iimbestiga sa naturang isyu.

Iginiit naman ni Gordon na  mananatili silang naka-focus sa pagbusisi sa isyu lalo pa’t dumadami at lumalakas ang mga ebidensya sa posibleng iregularidad sa transaksyon ng  procurement service ng DBM sa pharmally corporation.—mula sa ulat ni Patrol 19, Cely Bueno

Nagbukas na ngayong araw na ito ang pisikal na misa sa Quiapo church.

Sa gitna na rin ito nang pagsisimula ngayong araw na ito nang pagsailalim sa Metro Manila sa GCQ – alert level 4.

Pinayagang makapasok sa loob ng simbahan ang 200 katao o 10% lamang ng indoor capacity, na kailangang magpakita ng vaccination card o kopya nito bilang patunay na naturukan na kontra COVID-19.

Samantala, 300 deboto naman ang pinayagang tumayo sa harap ng simbahan o sa Plaza Miranda para makinig sa misa.

Humihingi ang DOH ng dagdag na P1.23-B para sa Special Risk Allowance (SRA) ng health workers.

Ayon kay Health Secretary Francisco Duque III, naipalabas na nila ang P15. 1-B na halaga ng mga benepisyo para sa health workers tulad ng SRA, hazard pay, meal/accommodation/transportation allowance at life insurance.

Bukod dito, ipinabatid ni Duque na P882-M na halaga ng SRA ang naipalabas na rin sa ilalim ng batch 3 at inaasikaso na nila ang P6-M na SRA sa ilalim ng batch 4.

Ikinakasa na ng DOLE ang pagsasampa ng kaso laban sa mga  sangkot sa anomalya kaugnay sa pamamahagi ng tulong pinansiyal sa mga nawalan ng trabaho sa Quezon City.

Gayunman, nilinaw ni Labor Secretary Silvestre Bello III na ang paghahain ng kaso ay preventive measure pa lamang laban sa umaabuso sa kanilang Tupad program.

Ito’y ayon kay Bello bagama’t pinaiimbestigahan na niya sa NBI ang nasabing anomalya.

Ipinatigil pansamantala ang Tupad program sa Quezon City matapos magreklamo ang beneficiaries na P2,000 lamang ang natanggap nila sa halip na P7,500 para sa dalawang linggong pagtatrabaho.

Pinag-aaralan ng Comelec kung i-extend ang oras nang pagboto para sa 2022 elections dahil sa COVID-19 pandemic.

Ayon kay Comelec chairman sheriff Abas, bukas ang mga presinto mula alas-6 ng umaga hanggang alas-6 ng gabi, subalit uubra itong ma-extend hanggang alas-9 ng gabi.

Sinabi ni Abas na titingnan nila ang dagsa o dating ng mga botante sa mismong araw ng eleksyon para makapagpasya kaagad ang en banc kung mai-extend ang oras ng pagboto kahit dalawa hanggang tatlong oras.

Maaari aniya nilang palawigin ang voting hours sa mga lugar na maituturing na hotspot ng COVID-19.

Pinakilos ng Pangulong Rodrigo Duterte si Solicitor General Jose Calida para pormal na i-request sa COA na busisiin ang public funds na tinanggap ng Philippine Red Cross.

Iginiit ng Pangulo na ang pag-audit sa nasabing pondo ng PRC ay dapat gawin “immediately” o sa lalong madaling panahon.

Una nang inihayag ng Palasyo na ang pondo ng gobyerno na ibinayad sa PRC para sa COVID-19 tests ay dapat isailalim sa COA audit.

Iniimbestigahan na ng BIR ang unang batch ng 250 social media influencers.

Kasunod na rin ito nang pag-i-isyu ng BIR ng LOA o Letters of Authority para imbestigahan ang ilang social media influencers na “top earners” o kumikita ng malaki sa kanilang Vlogs.

Ayon sa DOF, ang mga social media influencer na kumikita mula sa kanilang post sa digital media ay maituturing na self-employed individuals o nagne-negosyo bilang sole proprietors, kaya’t ang kita ng mga ito ay ikinukonsider na business income.

Dahil dito, sinabi ni BIR Deputy Commissioner Arnel Guballa na hinihikayat nila ang mga nasabing influencers na magparehistro para makapagsagawa sila ng profiling sa mahigit 250 personalities at maimbestigahan ang mga ito para makapagbayadng tamang buwis sa kanilang kita.

Pinawi ni Defense Sec. Delfin Lorenzana ang pangamba hinggil sa abiso ng Japan tungkol sa bantang pag-atake ng mga terrorista sa Timog – Silangang Asya.

Ayon sa Kalihim, mahigpit na binabantayan ng intellegence community partikular na sa rehiyon ng ASEAN ang galaw ng mga terrorista upang agad itong mapigilan.

Dagdag pa ni Lorenzana, kokunsultahin nila ang Japan hinggil sa naging batayan nito sa kanilang inilabas na travel advisory dahil seryoso aniya ang naturang banta.

Sinabi pa ng Kalihim na patuloy nilang inaalam sa ngayon kung ilan ang mga sinasabing suicide bombers sa bansa dahil batay sa datos, ilan sa mga ito ay namatay na habang ang ilan naman ay naaresto.

Gayunman, tiniyak ni Lorenzana na patuloy ang kanilang pagpupursigeng pigilan ang anumang banta ng terrorismo sa bansa at kumikilos ang Pamahalaan hinggil dito.

Aabot na sa mahigit 50%ng mga tourism worker sa bansa ang fully vaccinated na laban sa COVID-19.

Katumbas ito ng mahigit 126,000 mula sa 245,000 tourism workers.

Ayon kay Tourism Secretary Berna Romulo-Puyat, pinakarami ang nabakunahan sa Metro Manila na aabot sa 94%, na sinundan ng Davao Region; 88% at Cordillera Administrative Region, 80%

Ang pagbabakuna lamang anya sa mga tourism worker ang paraan upang maipagpatuloy ang recovery ng domestic tourism sa gitna ng presensya ng COVID-19 Delta variant. — sa panulat ni Drew Nacino.