HEADLINES

Patay ang isang lalaking rider matapos salpukin ng dump truck sa Quezon City.

Kinilala ang biktimang si Paul Allan Infante, rider ng Honda motorcycle na may mv file number 1801-0186342.

Agad namang naaresto ng Quezon City Police ang suspek na si Jaris Pabatang, driver ng Shacman dump truck na may plakang NEJ 1041.

Ayon sa QCPD – Traffic Sector 5, naganap ang aksidente sa kanto ng Commonwealth Avenue at masaya street sa Barangay San Vicente.

Natumba umano ang biktima bago nagulungan ang ulo nito ng truck. — sa panulat ni Drew Nacino. 

Sinelyuhan na ng US,UK at Australia ang isang espesyal na security deal na magbibigay ng karagdagang defense capability sa Royal Australian Navy.

Sa ilalim ng kasunduang tinawag na Aukus, magpapalitan ng advanced technologies ang tatlong bansakabilang ang pag-acquire ng mga nuclear-powered submarine para sa Australia.

Layunin din ng Aukus na ma-protektahan ang interes ng tatlong bansa sa indo-pacific pacific region at mapigilan ang anumang banta at lumalawak na pwersa at impluwensya ng China.

Bukod sa advance weapon system, tututok din ang kasunduan sa cyber capabilities, artificial intelligence at karagdagang undersea capabilities. — sa panulat ni Drew Nacino.

Binabantayan na ng Pagasa ang panibagong low pressure area sa Eastern Visayas.

Namataan ng Pagasa ang LPA sa sa layong 135 kilometers Silangan Hilagang-Silangan ng Guiuan, Eastern Samar.

Nakapaloob ang naturang sama ng panahon sa Intertropical Convergence Zone na naka-aapekto sa Palawan, Visayas at Mindanao.

Asahan na ang maulap na kalangitan at kalat-kalat na pag-ulan sa Mindanao at Eastern Visayas.

Samantala, ang ITCZ naman ang magdadala ng bahagyang maulap na kalangitan at kalat-kalat na pag-ulan sa Metro Manila at nalalabing bahagi ng bansa. — sa panulat ni Drew Nacino. 

Patuloy ang pagnipis ng supply ng oxygen tank sa ilang lalawigan sa Mindanao sa gitna ng pagtaas ng kaso ng COVID-19.

Kinumpirma ng DOH – region 9 na kabilang sa apektado ang Zamboanga Del Sur makaraang mahirapan ang supplier mula Cagayan De Oro City sa pag-supply ng dahil sa COVID surge sa naturang lungsod.

Ayon kay Region 9 Regional Director, Dr. Joshua Brillantes, hanggang noong Martes ay nasa 200 oxygen tanks na ang idineliver sa lalawigan.

Samantala, inihayag ni Trade Secretary Ramon Lopez na tatlong oxygen manufacturers ang nagsimula nang mag-deliver ng mga tangke sa Mindanao.

Sa kabila nito, nananatili namang sapat ang oxygen supply sa Metro Manila.

Batay sa datos ng DOH, 655 tons ng oxygen tank ang konsumo ng bansa kada araw habang ang produksyon ay nasa 800 tons kada araw.—sa panulat ni Drew Nacino

 Isang abogado ang patay matapos pagbabarilin ng riding-in-tandem sa bayan ng Surallah, South Cotabato.

Kinilala ni Surallah Mayor Antonio Bendita ang biktimang si Atty. Juan Macababad, 70 anyos.

Batay sa imbestigasyon, dakong ala-5 kahapon nang dumating ang dalawang lalaking lulan ng motorisklo sa tapat ng bahay ni Macababad sa Barangay Poblacion.

Binubuksan ng abogado ang gate ng kanyang bahay nang pagbabarilin sa ulo at katawan.

Naisugod pa si Macababad sa Javelosa hospital pero hindi na ito umabot ng buhay.

Inaalam na ng pulisya kung ano ang motibo sa krimen at sino ang posibleng nasa likod nito. —sa panulat ni Drew Nacino

Pinalagan ng Alliance of Health Workers o AHW kabiguan umano ng gobyerno na i-prayoridad ang public health dahil sa tinapyasang budget ng 76  na public hospital sa susunod na taon.

Ayon sa grupo, tila hindi tugma ang P242 bilyong proposed budget para health sector lalo’t 33% nito ay inilaan para sa Philhealth.

Sa katunayan ay P157 bilyon lamang ang inilaan sa Department Of Health sa ilalim ng Office of the Secretary.

Anim na beses umanong maliit ang pondo ng DOH sa P686.1  bilyon na proposed budget ng DPWH.

Sa halip din anila na itaas ay tatapyasan ang budget para sa maintenance and other operating expenses ng mga pagamutan.

Kabilang sa mga apektado ang Philippine Children’s Medical Center at Lung Center of the Philippines, Philippine Heart Center, National Kidney and Transplant Institute at Philippine General Hospital.—sa panulat ni Drew Nacino

Nagpapasaklolo na sa gobyerno ang pamilya ng dalawang OFW na nagtatrabaho bilang mangingisda na naaresto sa boundary ng Saudi Arabia at Eritrea.

Kinilala ang mga pinoy na sina Eduardo Gabriel at Ariel Quintana.

Ayon kay Annalyn Quintana, ikatlong araw ng pangingisda ng kanilang mga mister nang bigla umanong lapitan ang mga ito ng isang naval vessel.

Hindi naman anya ang kanyang mister ang hinahabol kundi ang kasamahan nila na nasa pampang.

Nangangamba na rin si Ginang Lilibeth Gabriel dahil hanggang ngayon ay wala pa rin silang balita at nabalitaan din nilang pinatutubos ang kanilang mga mister sa halagang P1.3 milyon.

Samantala, tiniyak naman ni Labor Attache Roel Martin ng Philippine Overseas Labor Office sa Jeddah na aaksyunan nila agad ang panawagan ng pamilya ng mga nawawalang OFW.—sa panulat ni Drew Nacino

Isinailalim na sa GCQ with alert level 4 ang National Capital Region simula ngayong araw.

Ito, ayon kay Interior Secretary Eduardo Año, ay kasabay ng implementasyon ng granular lockdown sa iba’t ibang lugar sa Metro Manila.

Alinsunod sa omnibus guidelines, isasailalim sa level 4 ang isang partikular na lugar kung may mataas na kaso ng COVID-19 at utilization rate ng ICU beds.

Hindi papayagan sa nasabing alert level ang paglabas ng bahay ng mga edad 18 pababa at 65 pataas maliban na lang kung bibili ang mga ito ng essential goods at services.

Ipinagbabawal din ang pagbubukas ng ilang establisyimento gaya ng sinehan, internet cafes, casinos, at iba pa.

Papayagan naman ang outdoor o al fresco dine-in services pero hanggang 30%  capacity lamang habang 10% sa indoor dining.—sa panulat ni Drew Nacino

May go-signal na ng International Criminal Court o ICC ang imbestigasyon sa “war on drugs” sa Pilipinas.

Inaprubahan ng ICC ang imbestigasyon kahit kumalas na ang Pilipinas sa nabanggit na korte noong 2019.

Nakitaan ng mga hukom ng ICC ng basehan ang reklamong “crimes against humanity” laban kay Pangulong Rodrigo Duterte lalo’t isa ang murder sa mahalagang elemento upang ituloy ang imbestigasyon.

Binigyang-diin ng korte na hindi maaaring ituring na lehitimong law enforcement operation ang giyera kontra droga maging ang mga pagpatay.

Ipinunto rin ng ICC na batay sa mga isinumiteng ebidensya ay inilunsad ang malawakan at systematic attack laban sa mga sibilyan alinsunod sa isang state policy.

Hunyo nang hilingin ni dating ICC Chief Prosecutor Fatou Bensouda sa mga mahistrado na ilarga na ang full-investigation sa drug war ng Pilipinas.—sa panulat ni Hya Ludivico