HEADLINES

Nakapagtala ng limang bagong kaso ng delta variant ang lalawigan ng Aklan.

Sa nasabing bilang, tatlo ay mula sa bayan ng banga habang ang isa naman ay mula sa Bayan ng Ibajay na pawang gumaling na.

Nasawi naman ang isa pang pasyente na 58-anyos na lalaki mula sa Ibajay.

Kaugnay nito, agad namang inabisuhan ng Provincial Health Office – Aklan ang Local Government Units na magsagawa ng contact tracing sa mga nakasalamuha ng mga pasyente.

Sa ngayon, umakyat na sa 27 ang kabuuang bilang ng mga kaso ng delta variant sa Aklan.—sa panulat ni Hya Ludivico

Ilang health workers sa mga private hospital sa Iloilo City ang nagsisialisan na sa kanilang mga trabaho dahil sa mababang sweldo.

Ayon kay Iloilo City Mayor Jerry Treñas, nakatanggap siya ng impormasyon na may mga health worker sa mga pribadong ospital na nagbitiw na sa kanilang mga trabaho at piniling lumipat sa Department Of Health.

Bukod sa mababang sahod, napapagod na rin anya ang healthworkers sa pagharap sa mga pasyenteng may COVID-19.—sa panulat ni Hya Ludivico

Bukas si Finance Secretary Carlos Dominguez sa hirit na buwagin na ang Procurement Service – Department of Budget and Management o PS-DBM at Philippine International Trading Corporation o PITC.

Ito ang inihayag ni Dominguez sa deliberasyon ng Senate Committee on Finance sa panukalang budget ng Department of Finance para sa susunod na taon.

Ang mga nabanggit na ahensya ng gobyerno ay kabilang sa pagbili ng medical supplies sa gitna ng COVID-19 pandemic na kinukuwestyon ng Senado.

Naniniwala ang kalihim na dapat sumailalim sa regular review ang lahat ng sangay ng pamahalaan para sa posibleng pagbuwag gaya ng kanilang ginawa sa Government Commission for GOCC.

Una nang naghain ng dalawang panukala si Senator Imee Marcos na nag-a-abolish sa PS-DBM at PITC Dahil umano sa “systemic corruption” sa ahensya.—sa panulat ni Drew Nacino

Hinimok ng Private Hospitals Association of the Philippines, Inc. o PHAPI ang gobyerno na paigtingin ang contract tracing efforts nito upang mapigilan ang pagkalat ng COVID-19 sa bansa.

Sinabi ni PHAPI President Dr. Jose Rene De Grano na ang kasalukuyang contact tracing ay hindi sapat upang matukoy ang mga close contacts ng mga nagpositibong sa virus.

Aniya, tila kulang na kulang ang contact tracing efforts ng bansa dahil sa halip na 15 hanggang 20 katao ay anim hanggang walong indibidwal lamang ang nati-trace.

Binigyang diin ni De Grano na dapat na magkaroon ang Pilipinas ng maayos na mekanismo pagdating sa contract tracing gaya sa ibang bansa.

Kaugnay nito, hinikayat naman ni De Grano ang publiko na makipagtulungan sa mga awtoridad.—sa panulat ni Hya Ludivico

Umakyat na sa 30,186 ang kabuuang bilang ng kaso ng COVID-19 sa Bicol region.

Sa pinakahuling datos ng Department Of Health o DOH Bicol, nadagdagan ito ng 395 mga kaso na naitala sa Camarines Sur na may 178 mga bagong kaso; 120 sa Albay; 33 sa Camarines Norte; 29 sa Sorsogon; 25 sa Catanduanes; at anim sa Masbate habang mayroon ding apat na nagpositibo na mula sa labas ng lalawigan.

Sumampa naman sa 21,977 ang kabuuang bilang ng mga gumaling at umabot naman sa 1,011 ang bilang ng mga nasawi sa nasabing sakit.

Pinaalalahanan naman ng DOH-Bicol ang mga residente na sundin ang health protocols laban sa COVID-19. —sa panulat ni Hya Ludivico

Tatlong lungsod sa lalawigan ng Isabela ang nakapagtala ng pinakamaraming bilang ng COVID-19 related deaths.

Ayon kay Provincial Health Officer Dr. Nelson Paguirigan, umabot sa 1,120 ang kabuuang bilang ng mga nasawi sa COVID-19 kung saan karamihan dito ay mula sa Santiago City, Ilagan at Cauayan City.

Muling naranasan aniya ang pagtaas ng mga kaso ng COVID-19 sa lugar noong Agosto at ngayong Setyembre.

Sa pinakahuling datos ay umakyat na sa 3, 821 ang active cases sa probinsya.

Maliban dito, nananatili naman sa critical o high risk ang hospital use classification sa lalawigan kung saan nasa 94.2% na ang hospital occupancy rate.—sa panulat ni Hya Ludivico