HEADLINES

Nananatiling delta variant-free ang Mountain Province at tanging lugar sa Cordillera Administrative Region o Car na hindi pa napapasok ng mas nakakahawang variant.

Ayon kay Mountain Province Governor Bonifacio Lacwasan Jr., bunsod ito ng pagsunod ng mga residente sa mga ipinatutupad na health protocols.

Bukod dito, ang mountain province rin ang may pinakamababang bilang ng aktibong kaso ng COVID-19 at batay na rin sa record ng provincial health office, karamihan sa mga kaso sa lugar ay mga biyahero, returning residents, at Authorized Persons Outside Residence o APOR na labas pasok sa probinsya.

Gayunman, sinabi ni Lacwasan na nakahanda pa rin ang kanilang temporary treatment at isolation facilities para sa mga indibidwal na tatamaan ng COVID-19.—sa panulat ni Hya Ludivico

Isasailalim sa COVID-19 test ang mga indibidwal o residente na maaapektuhan ng granular lockdown.

Ayon kay Metro Manila Council Chairperson at Parañaque City Mayor Edwin Olivarez, layon nitong mapigilan ang pagkalat ng virus.

Maliban dito kabilang rin sa istratehiya ng pamahalaan ang pinaigting na contact tracing at isolation sa mga mapapasailalim sa paghihigpit.

Ibinabala pa ni Olivarez na asahan na ang ipatutupad na sobrang higpit na granular lockdown.—sa panulat ni Hya Ludivico

Huwag muna kaagad magluwag ng quarantine restrictions sa gitna ng ipatutupad na bagong alert level system sa NCR.

Ito ang ipinayo ni World Health Organization Country Representative Dr. Rabindra Abeyasinghe dahil mataas pa rin aniya ang banta ng COVID-19 kaya hindi pa maaaring luwagan ang quarantine restrictions.

Ayon sa Department Of Health, nananatiling nasa high risk classification ang bansa dahil sa dami ng COVID-19 cases.

Gayunman, sinabi ni Health Usec. Ma. Rosario Vergeire na bumaba naman ang bilang ng COVID-19 related deaths ngayong taon, kumpara sa nakalipas na taon.

Nabawasan din aniya ang bilang ng mga health workers na namatay dahil sa COVID-19.

Paliwanag ni Vergeire, ang pagbaba sa bilang ng mga nasawi sa hanay ng healthcare workers ay bunsod ng high vaccination coverage, at proteksyong dulot ng bakuna.—sa panulat ni Hya Ludivico

Nasa high risk pa rin ang occupancy rate ng Intensive Care Unit beds para sa COVID-19 patients sa bansa maging sa National Capital Region.

Ayon sa Department Of Health, 77% ng 4,200 ICU beds sa buong bansa ang okupado habang 79% ng kabuuang 1,400 beds sa NCR ang okupado rin.

Dahil dito, ang ward beds sa buong bansa at metro manila ay ikinukunsidera ring nasa high risk.

Tinatayang 73% ng kabuuang 16,000 ward beds sa bansa at 73% ng 4,400 ward beds sa NCR ang okupado.

Samantala, 57% ng kabuuang 3,300 mechanical ventilators sa Pilipinas ang ginagamit habang 61% t ng kabuuang 1,100 ward beds sa ncr  ang okupado na rin.—sa panulat ni Drew Nacino

Handa na ang mga restaurant at salon employee sa muling pagbubukas ng kani-kanilang mga establisyimento kasabay ng pilot implementation ng GCQ with alert level 4 sa Metro Manila, simula ngayong araw.

Sa ilalim ng mga bagong patakaran, kung outdoor ang personal care service — gaya ng mga barberya, hair o nail spa, at salon — puwede silang mag-operate nang 30%  capacity habang 10% kapag indoor pero fully vaccinated lamang ang papayagan sa mga establisimyento.

Ayon kay reyes haircutters Chairman at CEO Les Reyes, limitado lamang sa pag-aayos ng buhok ang kanilang serbisyo at wala muna ang massage at iba pang mayroong physical contact.

Tiniyak naman ni sm North Edsa Head Jocelyn Clarino na all systems go na ang kanilang mall kaya’t nagdagdag na sila ng mga mesa sa ilang open area na maaaring gamitin ng sinumang customer.

Una nang inihayag ni Trade Secretary Ramon Lopez na inaasahang aabot sa 150,000 na manggagawa ang magbabalik-trabaho simula ngayong araw sa pagpapatupad ng alert level 4 sa Metro Manila.—sa panulat ni Drew Nacino

Maaaring umakyat sa 30,000 hanggang 40,000 kada araw ang mga bagong kaso ng COVID-19 sa bansa sa katapusan ng Setyembre o Oktubre.

Ayon kay University of the Philippines COVID-19 pandemic response team Professor Jomar Rabajante, dahil ito sa mataas na positivity rate sa mga nati-test na indibidwal.

Binigyang-diin pa ni Rabajante na nananatiling mataas ang hospital occupancy rate sa Pilipinas.

Sinabi pa ni Rabajante na mas mainam ang ‘granular lockdown’ kumpara sa malawakang lockdown.

Ito’y dahil na mas matututukan sa ilalim ng granular lockdown ang mga lugar na may mataas na kaso ng COVID-19.—sa panulat ni Hya Ludivico

Pansamantalang isinara ang isang vaccination site sa Malabon City dahil sa mababang bilang ng mga nagpapabakuna kontra COVID-19.

Sinabi ni Bong Padua, Public Information Chief ng Malabon LGU na isinara ang Ninoy Aquino Elementary School vaccination site simula kahapon at mananatiling sarado hanggang sa Biyernes.

Inabisuhan naman ang lahat ng nakatakdang bakunahan ng second dose o nais mag-walk-in na magtungo sa fishermall malabon vaccination site.

Samantala, sinabi ni Padua na plano ng lokal na pamahalaan na magsagawa ng house-to-house vaccination bilang tugon sa mababang bilang ng nagpapabakuna.—sa panulat ni Hya Ludivico

Dagdag P8 bilyon ang inihirit ng Commission on Elections (COMELEC) para sa karagdagang Vote Counting Machines o VCM  kung pabibilisin ang voting process sa May 2022 national elections.

Ito ang inamin ni COMELEC Steering Committee Head Commissioner Marlon Casquejo sa gitna ng pangambang magkaroon ng delay sa halalan dahil sa COVID-19 pandemic.

Sa kanyang pagharap sa Joint Congressional Oversight Committee hinggil sa automated election system, inihayag ni Casquejo na aabot sa 20,000 VCM ang kailangan upang mabawasan ang voter to VCM ratio sa 600 voters per machine.

Sa ngayon ay mayroong mahigit 97,000 VCM ang poll body na ini-re-refurbished para sa halalan sa susunod na taon.

Gayunman, nasa 61 milyon ang registered voters indikasyon na tinatayang 1,000 voters ang pipila sa kada makina.—sa panulat ni Drew Nacino

Isang barko ang sumadsad sa mababang bahagi ng karagatan sa Surigao City, Surigao Del Norte.

Ayon sa Philippine Coast Guard, 75% ng barkong LCT golden star 9 ang sumadsad sa malapit sa danawan island at nagdulot ng butas sa port quarter area ng engine room dahilan para pasukin ito ng tubig.

Nagresulta rin ito sa pagkapinsala ng mga corals sa nabanggit na lugar.

Batay sa imbestigasyon, umalis ang barko sakay ang 12 crew sa dinagat island patungong Cabadbaran, Agusan Del Norte noong Setyembre 10.

Wala naman itong kargamento pero habang nasa baybayin ng Danawan ay hindi inasahang makasalubong nito ang naglalakihang alon.

Ang LCT golden star 9 ay isang cargo vessel at pag-aari at ino-operate ng manfel cargo shipping na nakabase sa Taguig City.—sa panulat ni Drew Nacino

Sumampa na sa mahigit P422 milyon ang iniwang pinsala ng bagyong Kiko sa Batanes.

Ayon kay Governor Marilou Cayco, kabilang sa mga nakapagtala ng malaking pinsala ang imprastraktura at kabahayan sa lalawigan na aabot sa P275 milyon.

Patuloy anya ang kanilang assessment at magbibigay ng kumpletong detalye sa oras na matapos na ito.

Sa kabila nito, wala namang naitalang namatay sa pananalasa ng bagyo bagaman mayroong 27 ang nasugatan habang 56 ang nawalan ng tirahan.

Samantala, umapela naman ng tulong si Cayco sa national government para sa bigas at construction supplies upang makapagsimula ulit ang mga residente.—sa panulat ni Drew Nacino