HEADLINES

Nilinaw ng Commission On Audit na wala sa kanilang report na overpriced ang mga biniling pandemic supplies ng gobyerno.

Ito’y sa gitna ng kaliwa’t kanang senate hearing at batuhan ng akusasyon ni Pangulong Rodrigo Duterte at ilang miyembro ng Senate Blue Ribbon Committee sa iregularidad umano sa COVID-19 response funds.

Sa pagdinig sa House Committee on Good Government and Public Accountability, inamin ni COA Chairman Michael Aguinaldo ang obserbasyon sa COA report ay may kaugnayan lamang sa inventory management kaysa overpricing.

Nakatutok ang imbestigasyon ng kamara sa pagbili ng DBM-PS ng medical supplies matapos ang coa report na sumita sa paglipat ng  P42 bilyon pandemic funds ng Department Of Health sa DBM-PS upang ito ang manguna sa pagbili ng supply.

Naglunsad din ng hiwalay na imbestigasyon ang Senado kung saan lumitaw na malaking bahagi ng pondo ay ipinambili ng mga kagamitan sa Pharmally Pharmaceutical Corporation na mataas umano ang presyo kumpara sa ibang kompanya.

Dismayado si Presidential Spokesperson Harry Roque sa ilang opisyales mula sa University of the Philippines – Diliman makaraang tutulan ang kanyang pagkakapasok sa isang International Law Commission (ILC).

Una nang naglabas ng maaanghang na banat ang UP – Diliman Executive Committee at iginiit na hindi dapat makakuha ng pwesto sa ILC si Roque dahil sa “poor track record” nito sa pagtatanggol sa karapatang pantao sa ilalim ni Pangulong Rodrigo Duterte.

Gayunman, rumesbak si Roque sa pagsasabing malinaw umanong may ilang sektor na gagawin ang lahat madungisan lang ang kanyang pangalan at integridad dahil salungkat siya sa kanilang paniniwala.

Nanindigan ang Palace official na pawang kasinungalingan ang akusasyon habang hinamon din niya ang kumite na patunayang wala siyang magandang track record.

Si Roque ay 15 taong nagturo ng constitutional law at public international law sa UP College of Law bago italaga ni Pangulong Duterte bilang tagapagsalita.—sa panulat ni Drew Nacino

Nilinaw ng Department Of Health (DOH) na matatagpuan lamang sa iilang lugar ang konsentrasyon ng bagong COVID-19 cases sa National Capital Region at mga karatig lalawigan nito.

Sa Spatio-Temporal Analysis ng DOH sa NCR plus areas at ilang highly urbanized cities sa Metro Manila, nagmula lang sa 11 hanggang 30% ng mga Barangay ang 80% ng bagong COVID-19 infections sa nakalipas na dalawang linggo.

Ayon kay Health Undersecretary Maria Rosario Vergeire, suportado ng datos ang maliliit na granular lockdowns na ipatutupad sa Metro Manila simula ngayong araw kasabay ng pilot alert level systems kontra COVID-19.

Tila hindi na anya epektibo ang malawakang lockdown dahil karamihan ng mga Pilipino sa NCR ay nakalalabas at nakababiyahe kahit naka-Enchanced Community Quarantine, noong Agosto 10 kumpara sa ECQ noong Abril 2021

Magugunitang inihayag ng pamahalaan na ang mga Local Government Unit na ang magdedesisyon kung ilalagay sa mahihigpit at maliliitang granular lockdowns ang mga piling lugar na may matitinding kaso ng COVID-19.

DOH naman ang magpapasya linggo-linggo kung ilalagay sa alert levels 1-5 ang mga lungsod sa Metro Manila.—sa panulat ni Drew Nacino

Posibleng parusahan ng Bureau of Internal Revenue (BIR) ang importers at distributors na mapapatunayang nagkamali sa pagdedeklara ng produktong karne at mga manok para lamang makalusot sa pagbabayad ng Value-Added Tax (VAT).

Ito ang babala ni BIR Commissioner Caesar Dulay makaraang lagdaan ang revenue memorandum circular 100-2021.

Sa ilalim ng circular, ililipat na sa Bureau of Animal Industry mula sa food and drugs administration ang pangangasiwa sa permit para sa pag-angkat ng mga produkto.

Nakasaad din sa memorandum na walang ligal na mandato ang FDA na magpataw ng parusa sa mga importer sa kanilang misdeclaration ng feed ingredients, gaya ng mantika bilang animal feed ingredient upang makaiwas sa buwis.
—sa panulat ni Drew Nacino

 Pinagbawalan ng Philippines Statistic Authority o PSA ang publiko sa pag-post sa social media ng kanilang national Identification Cards upang maiwasan ang anumang panloloko.

Ayon kay PSA Assistant Secretary Rose Bautista, mino-monitor na nila ang mga netizen na maglalantad ng kani-kanilang Philsys ID.

Ilalagay lamang anya ng publiko ang kanilang sarili sa peligro kung ilalantad ang kanilang mga personal na detalye.

Tiniyak naman ni Bautista na nakatutok na ang kanilang fraud management division sa pagtukoy kung tunay o peke ang mga ipepresentang ID habang mapaparusahan ang sinumang mapatutunayang magpe-presenta ng fake national ID.

Halos 1.7 milyong Pilipino na ang nakatanggap na ng kanilang national ID.—sa panulat ni Drew Nacino

Mahigit isang milyong National ID cards na ang naipapamahagi ng gobyerno.

Ipinabatid ni PSA assistant secretary Rosalinda Bautista na hanggang nitong Setyembre 10 ay nasa 1.7M na ang naiisyuhan ng ID cards samantalang 42M Pinoys na ang nagparehistro para makakuha ng nasabing ID.

Sinabi ni Bautista na ang sinumang nag-apply ng National ID ay mabibigyan ng pagkakataong makapagbukas ng bank account sa Landbank of the Philippines.

Target ng gobyerno na makapagparehistro ang 50M Pinoy sa National ID program hanggang sa katapusan ng taong ito.

Mahigit 100 madre sa isang kumbento sa Quezon City ang nag positibo sa COVID-19.

Dahil dito, ini-lockdown na ang Religious of the Virgin Mary Convent, Martes ng madaling araw.

Sinasabing ang 103 madre na karamihan ay senior citizens ay nahawahaan ng isang driver o messenger na madalas utusang kumuha ng pagkain at mga dokumento sa labas.

Nangangamba ang awtoridad na tumaas pa ang bilang ng mga positibo sa COVID-19 dahil isasalang din sa swab test ang 300 pang indibidwal na nakatira rin sa kumbento.

Una nang ini-lockdown ang isang orphanage sa Quezon City matapos mag positibo sa COVID-19 ang 122 mula sa 168 na mga nakatira sa nasabing pasilidad.

Patuloy ang pagsirit ng kumpirmadong kaso ng COVID-19 sa bansa na rumehistro na sa halos 2.3M matapos maitala sa 16, 989 ang mga bagong kaso ng nasabing virus.

Ayon sa DOH, ang active cases ng COVID-19 ay nasa 170, 446 kung saan 85. 4% ang mild, 9.8% ang asymptomatic, 1.4% ang severe at 0.7% ang critical condition.

Pumapalo na sa 2,076, 823 ang total recoveries matapos madagdag ang 24,123 patients na naka-recover mula sa COVID-19.

Samantala, 214 ang naitalang mga bagong nasawi sa virus, kaya’t umakyat na sa 35,742 ang death toll.

‘Dalawang kaso lang ng COVID-19.’

ito’y ayon kay Metro Manila Council (MMC) chair at Parañaque city mayor Edwin Olivarez na sapat nang dahilan para isailalim sa granular lockdown ang isang lugar.

Ayon kay Olivarez ang ganitong kahigpit na panuntunan ay sang-ayon sa inilabas na guidelines ng Interior Department para masigurong hindi na kakalat pa ang banta ng COVID-19.

Giit pa nito, ang pagpapatupad ng 2-week granular lockdown ay layong bigyang-daan ang pagsasagawa ng agresibong mass testing, contact tracing gayundin ang isolation sa sinumang mag-popositibo sa virus at mga makakasalamuha nito.

Isinusulong ng COA o Commission on Audit na marepaso ang China-Funded Kaliwa Dam project dahil sa anito’y kawalan ng patunay na hindi ito makapipinsala sa kapaligiran.

Binigyang-diin ng COA na itinuloy ng MWSS o Metropolitan Waterworks And Sewerage System ang P12.2-B Kaliwa dam project sa Infanta, Quezon kahit pa hindi nasunod na environmental pre-requisites at pagsusumite ng mga kinakailangang permit.

Sa isinagawang 2020 annual audit report, ipinabatid ng COA na bagama’t nakakuha ang NCWS KDP ng Environmental Compliance Certificate, hindi nito nakumpleto ang aplikasyon nito ng mandatory permits mula sa mga ahensiya ng pamahalaan.

Lumitaw rin sa datos ng COA na inisyu ng DENR ang ECC sa MWSS noong Oktubre 11, 2019.

Bagama’t nakapagsumite naman ng mga dokumento ang MWSS noong Mayo 20, 2021, hindi na ito ayon sa COA, hiningi ng DENR.