HEADLINES

Binalaan ni Probinsyano Partylist Representative Alfredo Delos Santos ang publiko kaugnay sa Facebook scams.

Kasunod na rin ito ng mga sumbong kay Delos Santos ng mga nabiktima ng Facebook scams na financial expert worldwide na isang double your money investment scam at pekeng gadget store na Tech House Ph.

Sa sumbong ng OFW na si Paula, nag-remit siya ng isanlibong piso sa financial expert worldwide at naging tatlong libo ito makalipas ang sampung araw kaya’t hinimok niya ang mga kapwa OFW na mag-invest na rin.

Umabot aniya sa 220,000 pesos ang naipadala ng kanilang team Taiwan sa nasabing kumpanya, subalit nitong huling linggo ng Agosto ay hindi na nagparamdam ang founder ng nasabing FB page na si Mike Arais, sa kanilang group chats.

Samantala, ipinabatid ng mga itinago lamang sa pangalang Dennis at Michael na kabilang sila sa 60 na scam ng Tech House Ph na kaagad silang blinock matapos makapagpadala ng pera sa Unionbank sa account ng isang Carlo Palma.

Dahil dito, nanawagan si Delos Santos sa DTI at NBI cybercrime division na tutukan at panagutin ang nasa likod ng mga nasabing pekeng FB pages.

Mahalagang papel ang gagampanan ng media para sa isang ligtas at credible elections.

Binigyang-diin ito ni John Groch ng US embassy public affairs section matapos isagawa ang isang seminar.

Makatutulong aniya ang naturang seminar para makapag-isip-isip ang mga botante at maging critical thinkers sa gitna na rin nang pagdagsa ng mga pekeng impormasyon.

Sa idinaos na 2020 elections sa Amerika, sinabi ni groch na ang mga effort na pagbibigay ng tama at transparent information ay nakatulong para mapatatag ang US democratic system sa gitna nang paulit-ulit aniyang hamon sa kumakalat na disinformation sa resulta ng nasabing halalan.

Dahil dito, isinulong ni Rona Ann Caritos, executive director ng Lente o Legal Network for Truthful Elections ang mga area kung saan maaaring i-highlight ng media ang kanilang coverage sa 2022 national elections sa bansa.

Kabilang dito aniya ang pagwaksi sa misinformational at disinformation, tanungin ang mga kandidato kung saan nanggagaling ang kanilang campaign funds, pag-aralan ang online platforms na dapat managot at ipaalam sa mga botante ang bagong COVID-19 health protocols para ngayong eleksyon.

Inaprubahan na ng Pangulong Rodrigo Duterte ang pagpapalabas ng mahigit P3-B ayuda para sa mga pampublikong driver na nakiisa sa service contracting program.

Ipinabatid ito ni LTFRB chairman Martin Delgra na nagsabing apat na libong piso ang makukuha ng PUV operators at drivers bukod pa sa lingguhang bayad base sa kilometro na byahe nito kada linggo, may pasahero man o wala.

Ayon kay Delgra, nagsimula na ngayong araw na ito ang pagpapalabas ng pondo para sa mga apektadong driver at operator at inaasahang matatapos nila sa susunod na dalawa hanggang tatlong araw ang pamamahagi ng one time pay out.

Isasagawa ng Comelec sa Setyembre 18 hanggang 20 ang ikalawang internet voting test run katuwang ang Smartmatic.

Ang nasabing test run, ayon kay Director Sonia Bea Wee-Lozada ng Comelec Office for Overseas Voting ay magsisimula ng alas-8 ng umaga ng Setyembre 18 hanggang alas-8 ng umaga ng Setyembre 20.

Ang mga nakiisa sa unang bahagi ng internet voting test run mula sa 70 bansa ay sila ring kasali sa ikalawang test run.

Tuloy ang vaccination roll out sa San Nicolas, Ilocos Norte sa kabila nang pagkasunod ng daan-daang COVID-19 vaccines noong nakalipas na linggo.

Ito ayon kay San Nicolas acting mayor Edistio Valdez ay dahil mayroon namang mga bagong nai-deliver na bakuna sa kanila mula sa provincial government.

Nasa 120 doses ng Astrazeneca at 60 doses ng Sinovac ang naapektuhan nang masunog ang refrigerator ng mga bakuna sa ikalawang palapag ng Regional Health Unit.

Hindi pa kabilang sa hinihinging P1.6-B para sa Manila Bay rehabilitation project sa 2022 ang pondo para sa paglalagay ng dolomite dito.

Sa halip, sinabi ni Environment Undersecretary Jonas Leones na ang nasabing pondo ay para sa rehabilitasyon ng waterways patungong Manila Bay at paglilinis sa mga estero at sapa.

Ayon pa kay Leones, gagamitin din ang bahagi ng nasabing pondo para sa konstruksyon ng water treatment plants na sasala sa mga kontaminado at maduming tubig na inaasahang dadaan pa-Manila Bay.

Naibigay na aniya sa kanila ang pondo  para sa dolomite noong 2019 at 2020 budget ng DENR.

Inaalam na ni Presidential Spokesperson Harry Roque kung naihain na ng Palasyo ang formal request nito sa Commission on Audit (COA) para masimulan na ang pag-audit sa pondong ibinibigay sa Philippine Red Cross (PRC).

Ayon kay Roque, asahan nang kumikilos na ukol dito ang pamahalaan lalo’t mismong si Pangulong Rodrigo Duterte ang nag-utos na nais nitong ipa-audit ang government fund na pumapasok sa humanitarian body.

Mababatid na sa ngayon, wala pa aniya siyang impormasyon kung naipadala na o kung natanggap na ng COA ang formal request na ito ng Palasyo.

Magugunitang una nang sinabi ng Pangulo, na kung patuloy na magmamatigas ang PRC na ipa-audit ang pondo ng pamahalaan na pumapasok sa kanila, ay mapipilitan siyang ipatigil ang lahat ng transaksyon ng pamahalaan dito.—mula sa ulat ni Patrol 17, Jopel Pelenio

Lilimitahan na ng pamahalaan sa mga fully vaccinated kontra COVID-19 ang mga tatanggapin sa mga dine-in services sa Metro Manila.

Ayon kay Tourism Secretary Bernadette Romulo-Puyat, ito’y kasabay ng pagsasailalim ng Metro Manila sa alert level 4 simula bukas, Setyembre 16.

Sa ilalim ng naturang alert level system, 10% lamang ang papayagang kapasidad sa mga dine-in operations kaya’t kinakailangang iprisinta ng mga ito ang kanilang vaccination card.

Habang ang mga hindi pa nakakatanggap ng bakuna ay papayagan naman sa al-fresco dining sa 30%  kapasidad.

Samantala, ipinagmalaki naman ni Secretary Puyat na 99% na sa mga tourism workers sa Metro Manila ang naturukan na ng COVID-19 vaccine.

Inaasahang ilalabas na ng DOH ngayong linggo, ang pasya nito sa isyu ng booster shots.

Ayon kay FDA Director General Eric Domingo, magpupulong ang all expert group ng DOH para sa pinal na rekomendasyon hinggil sa booster shots partikular sa health workers na highly vulnerable at mataas ang exposure sa COVID-19.

Una nang inihayag ni Infectious Disease Expert Dr. Rontgene Solante, miyembro ng Vaccine Expert Panel na kailangang mabigyan ng booster shots ang health workers lalo na yung mga nagpaturok ng Sinovac nuong Marso.

Bahagyang bumaba ang reproduction number ng COVID-19 sa Metro Manila ngayong linggo.

Ito ayon sa OCTA Research Group ay bagama’t patuloy ang naitatalang average na mahigit limang libong kaso ng COVID-19 kada araw sa NCR.

Sinabi ni Dr Guido David, Fellow ng Octa Research na nasa 1.34 ang reproduction number ng NCR ngayong linggo, mula sa 1.39 noong nakalipas na linggo.

Ipinabatid ni David na ang NCR ay nakapagtala ng average na 5,854 cases sa nakalipas na linggo, na mayroong 11% growth rate.

Sinimulan na ngayong araw na ito ang dalawang linggong implementasyon ng alert levels system sa NCR na nasa alert level 4 dahil sa patuloy na pagsirit ng kaso ng COVID-19.