HEADLINES

Sinimulan na ngayong araw ang pagtuturok ng ikalawang dose ng Sputnik V vaccine sa lungsod ng Navotas.

Ayon kay Mayor Toby Tiangco, ito’y makaraang dumating sa lungsod ang 590 doses ng Sputnik vaccine mula sa National Government.

Ani Tiangco, ang naturang suplay ng bakuna kontra covid-19 ay nakalaan muna sa mga nakatanggap ng unang dose noong Hunyo 21.

Mababatid na ganito rin ang problema ng iba pang lokal na pamahalaan sa Metro Manila dahil sa kakulangan ng suplay ng bakuna.

Kung kaya’t marami na ang may agam-agam sa kaligtasan at pagiging epektibo ng bakuna lalo’t naunsyami na ang pagtuturok ng ikalawang dose.

Sa kabila nito, binigyang diin ng Department of Health (DOH) na pwede namang maghintay ang mga naturukan ng first dose nang hanggang sa anim na buwan.

Nailigtas ng mga tauhan ng Philippine Navy ang anim na mga mangingisda ng lumubog na bangka sa bahagi ng Benham Bank sa Philippine Rise.

Ayon sa paunang ulat ng mga awtoridad, habang nagsasagawa ng territorial defense operations ang BRP Andres Bonifacio, nakatanggap ito ng distress call hinggil sa F/V Mr. Kupido na lubog na ang kalahating bahagi ng bangka nito.

Lulan ng bangkang ito ang kanilang kapitan na si Jayson Buheda, at mga tripulanteng sina Legazpi Villanueva; Christopher Querez; Mario Burod; Armando Mise; at Tony Reyes na pawang mga residente ng atimonan at Real sa Quezon.

Anila, nangingisda ang kanilang grupo nang salpukin ang kanilang bangka ng malakas na alon.

Mababatid na nagsumikap ang mga mangingisda na magpalutang-lutang at makaligtas sa trahedya ng dalawang araw.

Samantala, matapos na mailigtas ng mga awtoridad ang anim na mangingisda ay agad itong pinakain at sinuri ang lagay ng kanilang kalusugan. —sa ulat ni Jaymark Dagala (Patrol 9)

Nalampasan ng bilang ng enrollees sa kasalukuyang school year ang record noong nakalipas na academic year.

Ayon sa Department of Education, nasa mahigit 26-M o 100.3% ng mga nag enroll na estudyante para sa kabubukas na school year o mas mataas ng mahigit 100,000 enrolees.

Gayunman, ang enrollees ngayng school year ay mas mababa pa rin bago ang COVID-19 pandemic kung saan nasa halos 27-M ang nagpa enroll para sa school year 2019-2020.

Sinabi ng DepEd na ang CALABARZON ang nakapagtala ng pinakamataas na enrollees sa mahigit 3-M, sumunod ang Central Luzon na nasa mahigit 2.5-M at NCR – mahigit 2.4-M.

Pumapalo na sa 17-M Pinoys ang fully vaccinated na.

Ayon kay Presidential Spokesman Harry Roque, 2.2-M individual naman ang nakatanggap na rin ng unang dose ng COVID-19 vaccine.

Dahil dito, sinabi ni Roque na mahigit 39-M na ang nabakunahan kontra COVID-19.

Mahigit 6-M residente na ng Metro Manila ang full vaccinated at ito ay katumbas ng 61% ng target population sa NCR.

Patay ang 87 taong gulang na lola matapos hindi makalabas sa nasusunog nitong bahay sa Valenzuela compound sa Paranaque City.

Kinilala ang biktima na si Lolita “Lily” Matadling, na ayon sa kanyang apo ay bedridden na at naiwan sa ikalawang palapag ng nasabing bahay.

Inaresto naman ng mga tauhan ng barangay ang apo ng biktima dahil sa umano’y paulit ulit na pagbabantang susunugin ang kanilang compound.

Ipinabatid ng BFP na inabot ng ikalawang alarma ang nasabing sunog na tuluyang naapula matapos ang dalawang oras.

Halos 20 kabahayan ang natupok ng apoy 50 pamilya ang naapektuhan ng nasabing sunog na inaalam pa ang pinagmulan.

Tiniyak ng Department of National Defense (DND) na kontrolado ng Pamahalaan ang sitwasyong pangseguridad ng bansa at mahigpit itong binabantayan.

Ito ang tugon ng kagawaran sa inilabas na Travel Advisory ng Japan sa kanilang mamamayan dahil sa impormasyon ng pag-atake umano ng mga terrorista sa Timog-Silangang Asya.

Ayon kay Defense Spokesman Dir. Arsenio Andolong, mula pa nang sumiklab ang rebelyon sa Marawi ay hindi aniya ibinaba ng Pamahalaan ang alerto nito magpahanggang sa kasalukuyan.

Palagian din aniya ang ginagawang assessment ng Anti – Terrorism Council sa lahat ng banta o impormasyong kanilang natatanggap mula sa intellegence community.

Lahat aniya ng mga ito ay dumaraan naman sa mabusising beripikasyon at validation kaya’t makaaasa ang publiko na napigilan na ang anumang pagtatangka bago pa man ito sumiklab. —sa ulat ni Jaymark Dagala (Patrol 9)

Nananatiling nakabantay ang hanay ng Armed Forces of the Philippines (AFP) at ang Philippine National Police (PNP) para tiyakin ang pambansang seguridad.

Ito ang kapwa tiniyak ng AFP at PNP kasunod ng inilabas na babala ng bansang Japan sa kanilang mamamayan na umiwas sa Pilipinas dahil sa panganib ng mga pag-atake ng suicide bombing.

Ayon kina PNP Chief P/Gen.Guillermo Eleazar at AFP Spokesman, Col. Ramon Zagala, bagama’t laging may banta ng terrorismo subalit wala silang namomonitor sa ngayon batay sa ulat ng kanilang intellegence units.

Sinabi ni Eleazar na mula nuon ay mahigpit ang ugnayan ng Pilipinas sa iba’t ibang bansa sa pamamagitan ng information sharing tungkol sa iba’t ibang terror group.

Sa panig naman ni Zagala, sinabi nitong bina-validate nila ang lahat ng mga nakukuhang impormasyon, maliit man o malaki, patunay na sineseryoso nila ang anumang banta. —sa ulat ni Jaymark Dagala (Patrol 9), sa panulat ni Hyacinth Ludivico

Pinalawig ang deadline sa filing ng aplikasyon para sa pag-transfer ng voter registration record mula abroad pabalik ng Pilipinas.

Ayon sa Commission on Elections (COMELEC), mula sa dating deadline na Agosto 31 ay maaaring makaboto muli ang overseas voters sa Pilipinas sa darating na eleksyon kung makakapag-file ng transfer hanggang Setyembre 30, 2021.

Napagdesisyunan ng poll body na palawigin ang deadline upang maiwasan ang disenfranchisement ng overseas filipinos na biglaang umuwi o na-repatriate dahil sa pandemya at iba pang kaguluhan sa ibang bansa.

Ang mga dating overseas voters na nasa Pilipinas hanggang May 2022 at nais na makaboto ay maaaring magtungo sa pinakamalapit na office of the election officer at mag-file na agad ng transfer. —sa panulat ni Hyacinth Ludivico