HEADLINES

Tiniyak ng Palasyo na makatatanggap ng food supplies ang mga lugar na isasailalim sa granular lockdowns sa Metro Manila.

Ayon kay Presidential Spokesman Harry Roque, magkatuwang na responsibilidad ng mga Local Government Unit at Department of Social Welfare and Development (DSWD) ang pamamahagi ng pagkain.

Gayunman, nilinaw ni Roque na wala ng matatanggap na cash aid ang mga residenteng maaapektuhan ng lockdown, simula bukas.

Una nang inihayag ni MMDA Chairman Benhur Abalos na nasa dalawa hanggang tatlong libong pamilya ang isasailalim sa lockdown sa NCR kasabay ng bagong quarantine classification na may kaakibat na alert level.—sa panulat ni Drew Nacino

Posibleng isailalim ng provincial government sa mas mahigpit na Enhanced Community Quarantine (ECQ) ang lalawigan ng Benguet upang maiwasan ang pagkalat pa ng COVID-19.

Ito, ayon kay Governor Melchor Diclas, ang kanilang huling option dahil sa lumalalang sitwasyon sa lalawigan.

Kasalukuyang nasa GCQ ang Benguet at mayroong 1,624 active covid-19 cases kabilang ang 164 additional cases.

Aminado si Diclas, na isang doktor, na hindi na nila hihintaying bumagsak ang health care system lalo’t ilan lamang ang mga ospital sa lalawigan kasabay ng pagdami ng COVID patients sa mga public health facility.—sa panulat ni Drew Nacino

Tinatayang 200k manggagawa ang inaasahang magbabalik-trabaho kasabay ng pilot implementation ng panibagong COVID-19 alert level system sa Metro Manila, simula bukas.

Umaasa si Trade Secretary Ramon Lopez na makababangon muli ang ekonomiya lalo’t nasa P180 milyon kada linggo ang projected revenue sa pagbabalik ng mga manggagawa.

Ayon kay Lopez, kabilang sa mga makikinabang ang mga nasa industriya ng food at personal care service tulad ng barbershops at beauty salons.

Nasa dalawang milyong katao anya ang nagta-trabaho sa restaurant industry at halos kalahati sa mga ito ay nasa Metro Manila.

Simula bukas ay isasailalim ang NCR sa GCQ. with alert level 4, ang ikalawang pinaka-mataas sa five-level alert system.—sa panulat ni Drew Nacino

Pinalawig ng Commission on Elections ang deadline ng filing ng application para sa pag-transfer ng voter registration record mula abroad pabalik ng Pilipinas.

Iniatras ito ng COMELEC sa Setyembre 30 mula sa dating Agosto 31.

Nagpasya ang poll body En Banc na palawigin ang deadline upang maiwasan ang disenfranchisement ng maraming Overseas Filipinos na biglaang umuwi o na-repatriate dahil sa pandemya at kaguluhan sa ibang bansa.

Maaaring makaboto muli sa pilipinas sa May 2022 elections kung makakapag-file ng transfer hanggang Setembre 30, 2021 ang mga overseas voter.

Pinayuhan namang magtungo sa pinakamalapit na Office of the Election Officer sa kanilang lugar at mag-file na agad ng transfer ang mga dating overseas voter na nasa Pilipinas. —sa panulat ni Drew Nacino

Nadagdagan pa ang bilang ng mga napaulat nasawi bunsod ng pananalasa ng bagyong Jolina.

Ayon sa pinakahuling ulat ng National Disater Risk Reduction and Management Council o NDRRMC, umabot na sa 19 ang kabuuang bilang ng nasawi kung saan tatlo sa mga ito ang kumpirmado habang 16 naman ang patuloy na bineberipika.

Nasa 24 naman ang nasugatan habang nananatili sa lima ang nawawala.

Samantala, umakyat naman sa mahigit P1.1 bilyon ang halaga ng pinsala na naitala sa sektor ng agrikultura at imprastraktura dahil sa bagyong Jolina.

Iniulat din ng NDRRMC na 15,790 na mga kabahayan ang nasira kung saan 15,190 dito ang partially damaged habang 600 naman ang lubhang winasak ng bagyo.—sa panulat ni Hya Ludivico

Nanawagan ang Quezon City government sa mga kumpanya na agad ipagbigay-alam sa kanila kung may mga tauhan o manggagawa silang nagpositibo sa COVID-19.

Ayon kay Quezon City Mayor Joy Belmonte, ito ay upang maiwasan ang pagkalat ng virus sa kanilang work area at katabing mga komunidad.

Nagbanta si Belmonte na magsasampa sila ng kaso sa mga construction firm na hindi makikipagtulungan sa pamahalaang lungsod.

Kasunod ito ng paghahain ng kaso ni City Attorney Orlando Paolo Casimiro sa millennium Erector Corporation na lumabag sa health protocols kung saan 57 construction workers nito ang nagpositibo sa COVID-19.—sa panulat ni Hya Ludivico