HEADLINES

Nananawagan ang World Health Organization o WHO para sa pagpapatupad ng vaccine booster moratorium bunsod ng kakulangan ng suplay ng bakuna hindi lamang sa bansa kundi maging sa buong mundo.

Binigyang diin ni WHO country Representative  Dr. Rabindra Abeyasinghe, na hanggang ngayon ay wala pang matibay na ebidensya na kailangan na ng booster shots.

Layunin ng nasabing moratorium na bigyan ng pantay na alokasyon ng COVID-19 vaccines ang bawat bansa.

Binigyang diin ng WHO na kung hindi matutugunan ang vaccine inequity ay tataas pa ang bilang ng mahahawaan ng virus na magreresulta sa mas marami pang mutations at variants.—sa panulat ni Hya Ludivico

Itinanggi ni Philippine Drug Enforcement Agency Director General Wilkins Villanueva na sangkot si dating Presidential Economic Adviser Michael Yang sa illegal drugs trade sa Davao City.

Ayon kay Villanueva, kahit saan hagilapin ay hindi lumalabas ang pangalan ni yang sa drug trade.

Sa idinaos na Senate hearing noong Biyernes, ginisa si Yang dahil sa sinasabing ugnayan nito sa Chinese businessman na si Allan Lim na sangkot umano sa iligal na droga.

Magugunitang inakusahan ng sinibak na si police Officer Eduardo Acierto, noong Abril 2019 sina Pangulong Duterte at Yang na sangkot sa illegal drug trade.

Bago pa isiwalat ng dating pulis, inakusahan ni dating customs Intelligence Officer Jimmy Guban si Acierto na nanguna sa smuggling ng P6.8 bilyon hanggang P11 bilyon na halaga ng shabu sa bansa noong Agosto 2018 sa pamamagitan ng magnetic lifters.—sa panulat ni Drew Nacino

Tila napapatid na ang pasensya ni Pangulong Rodrigo Duterte kay Senate Blue Ribbon Committee Chairman Richard Gordon na nangunguna sa imbestigasyon sa umano’y anomalya sa COVID-19 response funds ng DOH.

Ayon kay Pangulong Duterte, hindi na nakatutuwa ang dami ng government official na ipinatatawag ni Gordon tuwing may Committee hearing na inaabot ng mahigit limang oras.

Sa halip anya na tumutok sa trabaho ay inaaksaya ng mga ipinatatawag na opisyal ang kanilang oras sa hearing dahilan upang matengga ang mga mahalagang programa ng gobyerno

Tama ba ‘yang ginagawa ninyo? I mean, are you crazy? Bakit ganoon? Can you not approximate the time that you would take to make these persons testify, question and answer? Lalo na ikaw Gordon, abogado ka, ano pa kakalkalin mo, nandiyan na ang medisina ginagamit na namin, para sa akin tapos na ang trabaho, pharmally man iyan o droga then we will talk about it, ” pahayag ni Pangulong Duterte.

Naniniwala naman ang Pangulo na walang bigat ang isinasagawang hearing ni Gordon sa Senado dahil sa pakikipag-ugnayan nito kay Retired Police Colonel Eduardo Acierto na sangkot umano sa iligal na droga.

Gordon now is in…paano siya lalabas nito, because I will say publicly, Gordon has forever loss his credibility…You know Senator, you are a lawyer you pretend to, wala naman akong nakitang nagtrial ka. Most of your time doon sa Subic, hindi ka na pinansin ni Ramos habol ka pa ng habol kawala mo naman,” wika ng Pangulo.—sa panulat ni Drew Nacino

Hindi nagkaroon ng pagluluwag sa quarantine protocols ngayong magsisimula na ang pagpapatupad ng alert level system.

Ito ang inihayag ni Health Undersecretary at Treatment Czar Leopoldo Vega at nilinaw na layunin ng nasabing sistema ay upang tanging ang mga may mataas na COVID-19 cases ang isailalim sa lockdown.

Binigyang diin pa ni Vega na ginawa ng pamahalaan ang hakbang upang hindi na magdulot pa ng kalituhan sa publiko kung anong quarantine status ang ipinatutupad sa isang lugar.

Kinakailangan na rin aniyang magpatuloy ang pagbubukas ng ekonomiya lalo na’t hindi naman tumitigil ang vaccination rollout sa bansa.—sa panulat ni Hya Ludivico

Hindi maaapektuhan ang operasyon ng pampublikong transportasyon sa oras na ipatupad na ang pilot implementation ng alert level system sa NCR.

Ayon kay Trade and Industry Secretary Ramon Lopez, magpapatuloy ang operasyon nito lalo at unti-unti na ring binubuksan ng gobyerno ang ekonomiya.

Patuloy rin aniyang nagdadagdag ng public transport at facility ang Department of Transportation o DoTr.

Sinabi pa ng kalihim nahindi naman binago ang mga regulasyon sa transportasyon kahit noong nasa ilalim ng Enhanced Community Quaratine (ECQ) at Modified Enhanced Community Quarantine (MECQ) ang Metro Manila.

Patuloy namang hinihikayat ang mga kumpanya na magkaloob ng shuttle services sa kanilang mga kawani.—sa panulat ni Hya Ludivico

Nakapagtala ang Bayan ng Malinao, Albay ng record high na 26 na kaso ng COVID-19.

Kinumpirma ito ni Demsy Alcala, pinuno ng Municipal Disaster Risk Reduction and Management Office o MDRRMO, at sinabing karamihan sa mga naitatalang kaso ng virus sa kanilang lugar ay isa o dalawa lamang kada linggo.

Sa nasabing bilang 23 ay mula sa drug rehabilitation center ng Malinao sa Barangay Cotmon, habang ang tatlo naman ay close contact sa isang nagpositibo sa Barangay Estancia at iba pang Barangay.

Nakatakda namang isailalim sa genome sequencing ang mga nagpositibo upang matiyak na sila ay negatibo sa ibang variant ng COVID-19.

Sinabi pa ni Alcala na hindi magpapatupad ng lockdown sa Barangay Cotmon dahil wala naman sa kanilang residente ang nagpositibo sa COVID-19 maliban sa mga nasa loob ng Drug Rehabilitation Center.—sa panulat ni Hya Ludivico

Patay ang 17-anyos na anak ni Lucban, Quezon, Mayor Olivier Dator habang kritikal naman ang isa nitong kasama matapos mabundol ng isang delivery van ang sinasakyan nilang mga motorsiklo.

Kinilala ang mga biktima na sina Guitahm Oli Dator at Sydney Saliendra.

Sa CCTV footage, makikitang papatawid sina Dator at Saliendra sa isang intersection nang mabangga ang mga ito ng isang van bandang alas-10 ng gabi nitong Lunes.

Sa lakas ng impact ay tumilapon ang mga biktima.

Nadala pa sa ospital ang mga biktima subalit nasawi kalaunan si Dator.

Kritikal naman at nagtamo ng malubhang head injury si Saliendra.

Sa ngayon ay hawak na ng Lucban Police ang driver ng delivery van.—sa panulat ni Hya Ludivico