HEADLINES

Nanawagan ng karagdagang pondo para sa 2022 budget ang Department of Agriculture.

Ito’y makaraang tapyasan ang kanilang hirit na P231 bilyon na lumagpak na lamang sa P91 bilyon.

Ayon kay DA Secretary William Dar, mahalaga ang pondong hiling nila lalo’t apektado rin naman ng pandemya ang sektor ng agrikultura.

Nilinaw ni Dar na halos wala namang pinagbago ang alokasyon nila noong mga nakaraang taon sa ilalim ng national expenditure program na ipinasa sa kongreso.

Ito na anya sana ang halaga na pinaka-epektibo upang masuportahan ang mga naapektuhan ng pandemya.—sa panulat ni Drew Nacino

Nagpapasaklolo na ang Philippine General Hospital matapos malagasan ng malaking bilang ng volunteer doctors sa gitna ng COVID-19 pandemic.

Ayon kay PGH Spokesman, Dr. Jonas Del Rosario, lima na lamang ang natitirang volunteer doctors sa kanilang COVID ward makaraang umabot na sa dalawampu ang hindi na nag-renew ng kontrata.

Nagpapatupad na anya ng ‘task sharing’ system ang ospital kung saan nagbibigay na ng tao ang ibang departamento sa internal medicine department na may hawak sa mga COVID patients.

Umaasa naman si Del Rosario na makapag-ha-hire pa sila ng karagdagang volunteers mula sa DOH.

Ang PGH ang itinuturing na primary COVID-19 referral hospital ng bansa.—sa panulat ni Drew Nacino

Nananatiling sapat ang supply ng mga nakareserbang oxygen tank sa lahat ng district hospital sa lungsod ng Maynila kabilang na sa Manila COVID-19 field hospital.

Batay sa datos ng Manila Health Department, sa kabuuang 2,090 oxygen tanks, 374 ang kasalukuyang ginagamit; 1,305 ang nakareserba habang 411 tangke ang wala nang laman.

Magugunitang pinaghandaan ng Maynila ang pagbili sa mga oxygen tanks sa posibleng pagtaas muli ng bilang ng tatamaan COVID-19 sa lungsod.

Ito’y upang maiwasan ang kakulangan ng tangke sa oras ng kailanganin ng mga pasyente.—sa panulat ni Drew Nacino

Muling inupakan ni Pangulong Rodrigo Duterte ang Senado na nakatutok sa imbestigasyon sa umano’y iregularidad sa COVID-19 response funds ng gobyerno.

Sa kanyang Talk to the Nation kahapon, iginiit ni Pangulong Duterte na nakapagtatakang kinukuwestyon ng senate Blue Ribbon Committee ang pagbili ng gobyerno ng medical supplies nang walang bidding gayong inaprubahan ng Senado ang bayanihan law noong 2020.

Sa ilalim ng naturang batas, exempted sa government procurement law o hindi na kailangang dumaan sa bidding process ang pagbili ng gobyerno ng mga medical supplies na ginagamit sa covid-19 response.

Sa Bayanihan 1 kayo ang nagbigay ng authority ng Executive Department even to disregard the procurement law, tapos ngayon sabi niyo you can take whatever measures for the fastest delivery of the things that we need. So iyon ang ginagawa namin tapos ngayon you are dwelling on the procurement law in asking the officials to explain of their actuations,”pahayag  ng Pangulong Duterte.

Aminado naman ang Pangulo na wala na rin umano siyang pakialam kung gisahin ng mga senador ang pharmally pharmaceuticals na nag-supply ng overpriced umanong medical products.

Iyang pharmally ninyo, pati droga, bahala kayo wala akong pakialam diyan…You can crumple ang Pharmally, wala kaming pakialam diyan. Basta ‘yang pag-avail namin — ang pakialam namin nag-order kami, dumating, tama ‘yung nag-order, tapos ang presyo negotiated,” ani ng Pangulo.—sa panulat ni Drew Nacino

Sumadsad sa 59% ang mga naisagawang tuberculosis testing noong isang taon dahil sa COVID-19 pandemic na nagkaroon ng malaking epekto sa health care system ng bansa.

Ayon sa Department Of Health, mula sa isang milyon na TB testing noong 2019, lumagpak ito sa 556,000 noong 2020.

Inihayag ni Health Undersecretary Mario Villaverde na pababa ang trend mula pa noong 2018 na mayroon namang 1. 1 milyon na pasyenteng nagpa-test laban sa tuberculosis.

Sa kabila nito, tiniyak naman ng DOH na magpapatuloy ang kanilang TB vaccination at handa rin sa mga posibleng adjustments upang maipagpatuloy ang programa kahit may pandemya.—sa panulat ni Drew Nacino

Tinatayang P33 bilyon  ang kailangang pondo upang mabigyan ng laptop ang lahat ng mga guro para sa distance learning ngayong may COVID-19 pandemic.

Ito ang tugon ng Department of Education sa tanong ni Act Teachers Party-List Rep. France Castro kung mabibigyan ng kailanganing gadget ang mga bata at guro sa ilalim ng computerization program ng ahensya.

Sa budget deliberation ng House Committee on Approriations, inihayag ni DEPED Undersecretary Alain Pascua na kabilang sa pondo ang P4 bilyon para sa data connectivity hanggang sa susunod na taon.

Aminado si Pascua na nakatulong ang Bayanihan 2 upang makapagbigay ng laptop sa mga teaching personnel kung saan umabot na sa 211,000 units ang kanilang naideliver simula noong isang taon.

Sa kanilang panukalang 2022 budget, aabot sa P630.8 bilyon ang hirit ng kagawaran.—sa panulat ni Drew Nacino

Umabot na sa 17,078,676 ang bilang ng fully-vaccinated individuals sa bansa.

Sa datos na iprinisenta ni Presidential Spokesperson Harry Roque, nasa 22.06 milyon naman ang nakatanggap na ng first dose ng COVID-19 vaccine.

Sa kabuuan, nasa 39.14 milyon doses na ng bakuna ang naiturok na sa bansa.

Sinabi pa ni Roque na umaabot sa 395,704 ang average daily jabs na naitatala.

Batay sa pinakahuling datos ng national vaccination operations center, ay nasa 56,794,113 doses ng COVID-19 vaccine ang nai-deliver na sa bansa.

Target ng pamahalaan na makapagbakuna ng 70 milyong Pilipino bago matapos ang taon upang makamit ang herd immunity at ligtas na mabuksan muli ang ekonomiya.—sa panulat ni Hya Ludivico

Karagdagang P300 milyon na pondo para sa Agricultural Credit Policy Council o ACPC ang inilaan para sa mga hog raiser upang makabawi ang mga ito mula sa epekto ng African Swine Fever (ASF).

Ayon kay DA SEC. William Dar, makikinabang dito ang  backyard at semi-commercial raisers na nasa “green zones” o mga lugar na wala ng ASF partikular na ang Mimaropa Region, Western Visayas, Central Visayas at Zamboanga peninsula.

Ang pautang ay walang interes, walang kolateral at maaaring bayaran sa loob ng limang taon.

Ang pondo ay bilang karagdagan sa re-population program ng ahensiya, na may budget na P2.7 bilyon.

Naniniwala si Dar na malaki ang maitutulong nito sa pagsisikap na maiahon ang hog industry sa bansa.—sa panulat ni Hya Ludivico

Nakapagtala ng 34 na kaso ng mas nakakahawang delta variant ang Eastern Visayas.

Sa nasabing bilan, 12 ang naitala sa Eastern Samar, 4 sa Samar, 16 sa Leyte, isa sa Tacloban City, at isa mula Sa Tomas Oppus, Southern Leyte.

Maliban sa delta variant, naitala rin ang dalawang kaso ng beta variant at isang kaso ng P3 variant na unang nadiskubre sa Pilipinas.

Sa ngayon, mayroong 65 na kaso ng delta variant sa rehiyon.——sa panulat ni Hya Ludivico

Posibleng maranasan ang La Niña phenomenon sa huling bahagi ng taong 2021 hanggang unang quarter ng susunod na taon.

Ayon sa PAGASA, nasa 70 hanggang 80% ang tsansang mabuo ito.

Ang La Niña ay ang paglamig ng temperatura sa Central at Eastern equator ng Pacific Ocean indikasyon ng pagpasok ng mas maraming bagyo at iba pang weather disturbance.

Posible rin sa mga susunod na buwan ang ‘above-normal rainfall conditions’ sa malaking bahagi ng bansa kaya’t inaasahan na ang madalas na flashfloods at landslides.

Inabisuhan na ng PAGASA ang mga concerned agency na maghanda sa inaasahang epekto ng La Niña.