HEADLINES

Inupakan ng Palasyo ang tila pinapa-uso ni Senador Manny Pacquiao na salitang “plundemic” o plunder sa public funds habang nakikipaglaban ang pamahalaan sa COVID-19 pandemic.

Iginiit ni Presidential Spokesman Harry Roque na walang nangyaring pandarambong sa public funds sa panahon ng pandemya.

Una nang inihayag ni Senador Pacquiao sa pagpapatuloy ng Senate Blue Ribbon Committee Hearing na ang paggasta ng gobyerno sa COVID-19 response funds ay isang uri ng “plundemic” o plunder.

Nagkaroon na po ng paglilinaw dito ang COA , sa kanyang report sa DOH, hindi po niya sinabi na nagkaroon ng pandarambong, so wala pong plundemic na sinasabi. Ang sinasabi nga po ng COA, nais nilang magkaroon ng linaw kung bakit ang ilang mahahalagang salapi na ibinigay sa DOH ay hindi nga po nagastos, iyan pong clarification na iyan, hindi po ako ang nagsabi niyan, ito po ay nanggaling sa COA,” pahayag ni Presidential Spokesperson Harry Roque.

Ayon kay Roque, hindi na siya nagugulat sa mga banat ng mambabatas dahil bukod sa pandemya ay panahon na rin ng pulitika.

Hindi po ako nagtataka kung iyon ang kanyang pakiramdam. Pero ang totoo po niyan ang problema si delta variant, 3x more infectious at may infectious pa na variant, na alpha variant, so talaga pong dadami ang kaso natin,” pahayag ni Roque.

Isinusulong sa mababang kapulungan ng Kongreso ang resolusyong magbibigay ng P1 milyon sa itinuturing na pinakamatandang tao hindi lamang sa Pilipinas, kundi sa buong mundo.

Ito’y makaraang mapaulat na posibleng galing sa Pilipinas ang world’s oldest living person na ipinasa na sa Guinness world records para kay Francisca Susano, 124 na taong gulang.

Ipinanganak si Lola Francisca noong Setyembre 11, 1897, mas matanda sa kasalukuyang record holder na si Kane Tanaka ng Japan na ipinanganak naman taong 1903.

Ayon kay Senior Citizen Party-List Rep. Rodolfo Ordanes, dapat ituring na national treasure si Lola Francisca lalo’t nasaksihan nito ang mga mahalagang yugto sa kasaysayan ng bansa sa nakalipas na mahigit isang siglo.

Mas matanda pa si Susano sa deklarasyon ng kalayaan ng Pilipinas mula sa Espanya, nasaksihan ang digmaan ng Pilipinas at Amerika, nalampasan ang una at ikalawang digmaang pandaigdig maging ang kalamidad.—sa panulat ni Drew Nacino

Isang lalaki ang patay matapos pagbabarilin ng hindi nakilalang salarin sa loob ng kanyang bahay sa  Tondo, Maynila.

Kinilala ng Manila Police District (MPD) ang biktimang si Dennis Sison at dating nakatira sa Pilar Street, Manuguit.

Lumipat na umano ng tirahan si Sison simula nang ma-demolish ang kanilang bahay pero may pagkakataong  bumabalik sa Pilar street kung saan siya nasundan at binaril ng naka-bonnet at facemask na salarin.

Ayon sa MPD, posibleng may kinalaman sa iligal na droga ang motibo sa krimen dahil sangkot umano sa pagtutulak ng shabu ang biktima.

Patuloy ang imbestigasyon ng pulisya upang matukoy ang pagkakilanlan ng gunman.—sa panulat ni Drew Nacino

Tiniyak ng Pilipinas ang tulong pinansyal sa Afghanistan bilang tugon sa apela ng United Nations Office for the Coordination of Humanitarian Affairs o OCHA.

Ayon sa Philippine Mission sa Geneva, Switzerland, nananatili ang Commitment ng Pilipinas na magbigay ng humanitarian support sa lahat ng nangangailangan.

Wala pang detalye ang Department of Foreign Affairs sa halaga ng ibabahagi ng Pilipinas sa Afghanistan.

Bukod sa ayuda, una nang inihayag ni DFA Secretary Teodoro Locsin na nagsimula na ring tumanggap ang Pilipinas ng mga Afghan refugee na tumakas sa malupit na pamamahala ng grupong Taliban.—sa panulat ni Drew Nacino

Bumulusok sa 177, 670 ang active COVID-19 cases sa bansa.

Ito’y sa gitna ng pagbaba ng bilang ng bagong kasong naitatala ng Department Of Health (DOH)  kada araw.

Nakapagtala lamang ang DOH ng 18,056 na bagong kaso ng COVID kaya’t lumundag sa 2,266,066 ang kabuuang kaso.

Mataas naman ang bagong recoveries ngayong araw na sumirit sa 20,542 kaya’t umabot na sa 2,052,867 ang bilang ng gumaling.

Tumaas din sa 222 ang bagong pumanaw kaya’t nasa 35,529 na ang namamatay sa naturang sakit.

Isa sa dahilan ng kaunting bilang ng naitalang daily COVID-19 cases ay ang mababang testing output na umaabot lamang sa 50,425 makaraang mabigo ang 12 laboratoryo na magsumite ng datos.—sa panulat ni Drew Nacino

Itinalaga ni Pangulong Rodrigo Duterte si Court of Appeals (CA) Associate Justice Japar Dimaampao bilang Associate Justice ng Supreme Court.

Ito’y sang-ayon sa liham na ipinadala ni Executive Secretary Salvador Medialdea kay Chief Justice Alexander Gesmundo.

Mababatid na si Dimaampao na ang ikalawang Muslim sa kasaysayan ng Korte Suprema matapos nang maitalagang Associate Justice si Abdulwahid Bidin noong taong 1987.

Binuksan na ng Pateros ang walk-in vaccination nito sa kanilang mga residente.

Ayon kay Edgar Noel Castillo ng Pateros Public Information Office, sa mga nais na magpabakuna ay kailangan lamang magdala ng valid government ID na nagpapatunay na sila’y lehitimong residente ng Pateros.

Inaasahan naman na sa hakbang na ito ay mababakunahan na ang nasa 14,000 na mga taga-Pateros na hindi pa nakatatanggap nito.

Paliwanag ni Castillo, marami sa mga nagparehistro sa vaccination program ang hindi sumipot sa kanilang schedule habang ang iba naman ay nagkaproblema sa pagre-register online.

Samantala, bukas din ang pagbabakuna kontra COVID-19 sa mga hindi residente ng Pateros, pero kailangan ng mga itong magparehistro online bago mabigyan ng schedule.

Pinapurihan ng Restaurant Owners of the Philippines o Resto Ph ang desisyon ng pamahalaan na isailalim sa alert level 4 ang Metro Manila simula Huwebes, Setyembre 16.

Ayon kay Resto Ph president Eric Teng, ang naturang alert level system na pumapayag sa pagbabalik ng ilang porsyento ng dine-in at Al Fresco dining services ay talagang makatutulong sa kanilang sektor.

Aniya sa ganitong paraan ay maibabalanse ng pamahalaan ang kapakanan ng publiko laban sa virus gayundin sa kagutuman.

Kasunod nito, pinasalamatan ni Teng ang pamahalaan sa pamamagitan ni Trade Secretary Ramon Lopez, mga gabinete, at Metro Manila mayors matapos na dinggin ang kanilang panawagan.

Sa huli, binigyang-diin pa ni Teng na kaisa sila ng pamahalaan at publiko sa pag-iingat kontra COVID-19 kasabay ang unti-unting pagbubukas ng mga establisimyento.

Inaasahang darating sa bansa sa mga susunod na linggo ang karagdagang 10M doses ng bakuna kontra COVID-19 mula Covax facility ng World Health Organization (WHO).

Ito’y ayon kay WHO country representative Rabindra Abiyasinghe, na magandang balita para sa bansa.

Aniya, ang naturang suplay ng bakuna ay posibleng dumating sa ikatlo o ika-apat na quarter ng taon na makatutulong na mabakunahan ang mas marami pang mga Pilipino.

Kasunod nito, ipinagmalaki ni Abeyasinghe na umabot na sa 13M doses ng bakuna ang na-i-deliver ng vaccine-sharing platform na Covax facility.

Samantala, sa pinakahuling datos ng National Task Force against COVID-19, pumalo na sa higit 16.7M Pilipino ang nakatanggap ng bakuna sa bansa.

Magpapalabas ng Immigration Lookout Bulletin Order (ILBO) ang Justice Department laban kay dating presidential adviser Michael Yang o Yang Hong Ming.

Ito’y ayon kay Justice Secretary Menardo Guevarra matapos na hilingin ito ni Senador Richard Gordon na Chair ng Blue Ribbon Committee na may hawak sa imbestigasyon sa umano’y maanomalyang paghawak sa pandemic funds ng pamahalaan.

Ipinag-utos ng senado ang naturang lookout bulletin laban kay Yang nitong Lunes para mapigilan itong makalabas ng bansa habang nagpapatuloy ang pagdinig ng mataas na kapulungan.

Bukod dito, pinaaabisuhan din ni Gordon sa Justice Department ang kanilang Kumite sakaling magdesisyon si Yang na lumabas ng bansa at iba pang mga inisyuhan nito.

Bago nito, ay nagpalabas na rin ng ILBO ang Bureau of Immigration (BI) laban kay dating budget usec. Lloyd Christopher Lao at pitong iba pa na opisyal ng Pharmally Pharmaceutical Corporation matapos na i-utos ni Senate President Tito Sotto, III.