HEADLINES

Lusot na sa ikalawang pagbasa ng mababang kapulungan ng Kongreso ang panukalang batas na layong ipagpaliban ang 2022 Regional Elections ng Bangsamoro Autonomous Region in Muslim Mindanao (BARMM).

Layon ng House Bill 10121, na i-urong ang first regular election ng BARMM sa taong 2025.

Ibig sabihin lamang, ang naturang panukala ay magbibigay kapangyarihan sa Pangulo na i-appoint ang 80 miyembro ng Bangsamoro Transition Authority (BTA) na magsisilbi hanggang Hunyo 30, 2025.

Nakatakda namang isalang sa ikatlo at huling pagbasa ang naturang panukala sa mga susunod na araw.

Magugunitang nais ng BTA na ipagpaliban ang eleksyon dahil sa negatibong epekto ng COVID-19 pandemic.

Samantala, dumistansya naman ang palasyo sa naturang isyu at sinabing ‘neutral’ ang katayuan dito ng Pangulo.

Umakyat na sa 19 ang bilang ng mga nasawi dahil sa pananalasa ng bagyong Jolina.

Ayon sa NDRRMC, ito’y matapos na madagdagan ng dalawa ang death toll. Sa pagtataya pa ng ahensya, 3 sa kabuuang bilang ang nakumpirma na habang ang 16 naman ay patuloy pang isinasailalim sa validation.

Bukod dito, nakapagtala rin ang NDRRMC ng 24 na sugatan, at 5 indibidwal na patuloy pang pinaghahanap matapos na mawala nang manalasa ang bagyong Jolina kamakailan.

Samantala, nananatili namang nasa 81,077 na pamilya o katumbas ng 313,399 na indibidwal ang apektado ng bagyong Jolina sa mga lugar ng Central Luzon, NCR, Calabarzon, Mimaropa, Bicol, maging sa iba pang rehiyon.—mula sa ulat ni Jaymark Dagala (Patrol 9)

Iniimbestigahan na ng Commission on Human Rights (CHR) ang pagkamatay ng isang Grade 10 student sa San Enrique sa Negros Occidental dahil sa umano’y hazing.

Sa isang pahayag, sinabi ni CHR Spokesperson Jacqueline De Guia na ang mga lumilitaw na dahilan ng pagkamatay ng naturang estudyante ay nakakaalarma.

Giit ni De Guia, hindi pa rin nagbabago ang katayuan ng CHR sa hazing at nanatili silang kontra rito maging sa magiging epekto nito.

Kasunod nito, nagpaalala ang CHR sa mga Department of Education (DepEd) at Commission on Higher Education (CHED) na tiyakin ang kaligtasan ng kanilang mga mag-aaral kahit pa nasa gitna ng blended learning ang pag-aaral sa bansa dahil sa COVID-19 pandemic.

Sa huli, iginiit ng CHR na panatilihin ng mga educational institution sa bansa ang pagpapatupad ng Child Protection Policy gayundin ang Anti-Hazing Act of 2008.

Paiikliin na ng Metro Manila mayors ang curfew hours sa rehiyon simula sa Huwebes, Setyembre16.

Ayon kay MMDA chairman Benhur Abalos, ito ang napagbotohan ng mga miyembro ng Metro Manila mayors nang magpulong ito kamakailan.

Ipatutupad ang pinaikling curfew hours o mula alas-10 ng gabi hanggang alas-4 ng madaling araw kasabay ng alert level system sa Metro Manila.

Samantala, nakatakda namang ilabas ng Metro Manila Council (MMC) ang napagkasunduang resolusyon.

Ang Metro Manila Mayors ay nag-meeting…nagkaroon po kami ng survey kung pati na rin ang curfew hours ay babaguhin natin. So ito po ay inuusad na, na ang implentasyon na ito ay isasabay sa pilot. Magiging 10 o’clock na po ng gabi hanggang alas-kwatro ng umaga.

Ang pahayag ni MMDA chairman Benhur Abalos sa laging handa briefing.

Nakatakdang isailalim sa alert level 4 ang National Capital Region (NCR) sa Huwebes, Setyembre 16.

Ayon kay Interior Secretary Eduardo Año, ito’y kasabay ng implementasyon ng granular lockdown dahil sa banta ng COVID-19.

Sang-ayon sa inilabas na omnibus guidelines, ang level 4 ay kung tumataas ang kaso ng COVID-19 gayundin ang utilization rate ng ICU beds.

Hindi papayagan sa ilalim ng alert level na ito ang paglabas ng tahanan ng mga nasa edad 18 taong gulang pababa at 65 taong gulang pataas maliban na lamang kung bibili ang mga ito ng essential goods at services.

Gayundin ang pagbabawal sa pagbubukas ng ilang establisimyento gaya ng sinehan, internet cafes, casinos, at iba pa.

Sa kabila nito, papayagan sa ilalim ng alert level 4 ang outdoor o Al Fresco dine-in services bagama’t hanggang 30% ng kanilang kapasidad habang 10% naman ng kapasidad sa mga indoor dining.

Pinag-aaralan na ng pamahalaan na simulan ang pagbibigay ng COVID-19 vaccine sa general public sa susunod na buwan.

Sa Talk to the People, sinabi ni Pangulong Rodrigo Duterte na sa buwan ng Oktubre ay nais niyang wala nang pipiliin kung sino ang dapat na maunang mabakunahan, maliban na lamang sa mga senior citizen at mga may kapansanan na dapat na mabigyan ng prayoridad sa pila.

Lahat aniya ng mga kabilang sa adult population na nais nang magpaturok ng bakuna ay maari nang magtungo agad sa mga vaccination sites.

Sa kabila nito, binigyang diin ng pangulo na kailangang isaalang-alang ang kapakanan ng mga mahihirap at walang kakayahang magpabalik-balik sa mga vaccination centers sa bansa.

Ipinagharap na ng patumpatong na asunto ang may 3 indibiduwal matapos maaresto sa ikinasang entrapment operations kontra loose firearms sa Brgy. Sta. Ana sa bayan ng Pateros.

Kinilala ni Criminal Investigation and Detection Group o CIDG Director P/MGen. Albert Ignatius Ferro ang mga naaresto na sina Francis Mariano alyas Kambal, John Peter Villamar at Rodel Solomon.

Ang tatlo ay miyembro ng “Loloy Fernandez Group” na sangkot sa ilegal na droga, gunrunning at gun-for-hire sa katimugang bahagi ng Metro Manila at CALABARZON.

Nakumpiska sa kanila ang 74 gramo ng hinihinalang shabu na nagkakahalaga ng mahigit 500,000 piso gayundin ang ilang armas at mga bala.

Sinampahan ang mga suspek ng paglabag sa RA 10591 o Comprehensive Firearms and Ammunition Regulation Act at RA 9165 o Comprehensive Dangerous Drugs Act of 2002. —sa ulat ni Jaymark Dagala (Patrol 9)

Itinigil muna ng Justice Jose Abad Santos General Hospital sa Binondo, Maynila ang pagtanggap ng mga pasyente.

Ito’y makaraang umabot na sa critical level ang kanilang capacity rate dahil sa pagdagsa ng mga COVID-19 patients.

Kapwa nasa full capacity na ang emergency at holding areas ng nasabing ospital.

Ayon sa pamunuan ng Abad Santos Hospital, tatanggap lamang muna sila ng mga bagong admissions sakaling may ma-discharge na iba pang pasyente.

Sa ngayon ay halos 80,000 na ang COVID-19 cases sa Maynila kabilang ang 1,247 active cases, 77,224 recoveries at 1,526 deaths. —sa panulat ni Drew Nacino

Ikinabigla ng mga barangay official ang pagdagsa ng  mga tao sa isang food strip sa Tondo, Maynila noong Linggo sa kabila ng umiiral na social distancing ngayong may pandemya.

Ayon kay Barangay 96 Chairman Lorilario Lacson,  dakong ala-7 ng gabi nang mapansin nila ang biglang pag-uumpukan ng mga tao sa iba’t ibang food stall sa Ugbo Street.

Agad anya nilang sinita ang mga ito at inabot ng isang oras bago nagpulasan ang mga parokyano ng foodstrip.

Inilista naman ang pangalan ng mga violator at binalaang mahaharap sa reklamo sa oras na umulit.

Pinagbawalan din ni Lacson ang mga tao sa pagkukumpulan sa tabi-tabing kainandahil maaaring maging isang superspreader ng COVID-19 ang kanilang lugar.  –-sa panulat ni Drew Nacino