HEADLINES

Nanganganib maapektuhan ang kakayahan ng gobyerno na magbigay ng serbisyo-publiko sakaling putulin nito ang ugnayan sa Philippine Red Cross (PRC).

Ayon kay Atty. Lorna Kapunan, miyembro ng Board of Governors ng PRC, bilang First Responder, ang Red Cross ang katuwang ng gobyerno pagdating sa mga emergency situation.

Kahit anya sa giyera kontra droga ng pamahalaan ay may naitutulong ang Red Cross.

Magugunitang nagbabala si Pangulong Rodrigo Duterte na ititigil niya ang pakikipag-transaksyon ng gobyerno sa PRC kung hindi ito papayag na sumailalim sa isang state audit.

Ito’y sa gitna ng imbestigasyon ni Senate Blue Ribbon Committee at Red Cross Chairman Richard Gordon sa umano’y iregularidad sa paggamit ng COVID-19 funds ng gobyerno.  —sa panulat ni Drew Nacino

Inilabas na ng Malakanyang ang guidelines para sa ipatutupad na pilot COVID-19 alert level system sa Metro Manila simula sa Huwebes, upang mapigilan pa ang pagkalat ng COVID-19 at mga variant nito.

Ayon kay Presidential Spokesperson Harry Roque, sa ilalim ng guidelines ng IATF ipatutupad ang “3C” strategy o mga dapat iwasan, ito ang closed, crowded at close contact.

Tinukoy naman ang alert level 1 kung saan mababa at bumababa ang COVID-19 transmission, total bed utilization at Intensive Care Unit (ICU) utilization rates;

Level 2, kung saan mababa rin ang COVID-19 transmission maging ang healthcare utilization pero tumataas ang total bed utilization at intensive care unit utilization rates;

Level 3, mataas ang COVID-19 transmission habang tumataas din ang total bed at ICU utilization rates; level 4,na may mataas na COVID-19 transmission maging ang total bed at ICU utilization rates;

At level 5, kung saan naka-aalarma na ang COVID-19 transmission habang nasa kritikal ang total bed at ICU utilization rates. —sa panulat ni Drew Nacino

Patuloy ang recruitment ng Department of Health para sa karagdagang health workers sa bansa.

Ito ayon kay Presidential Spokesperson Harry Roque, kasunod ng pagbibitiw ng 11 volunteer doctors sa Philippine General Hospital (PGH).

Tiwala si Roque na mapupunan ng mga bagong graduate ang kakulangan sa doktor at nurse sa nasabing pagamutan.

Sinabi pa ng kalihim na handa ang gobyerno na palawigin pa ang COVID-19 bed capacities. —sa panulat ni Hyacinth Ludivico

Oobligahin ang mga close contacts ng COVID-19 patients na tapusin ang 14-day quarantine kahit pa bakunado na at negatibo na sa virus.

Batay ito sa inilabas na guidelines pilot implementation ng alert levels system para sa COVID-19 response sa National Capital Region document na inilabas nitong Lunes.

Ipatutupad naman ang minimum public health standards sa panahon ng pagpapatupad ng alert level systems. —sa panulat ni Hyacinth Ludivico

Inihayag ng Philippine General Hospital (PGH) na lampas na sa kanilang operating capacity ang kanilang inilaan para sa mga pasyenteng may COVID-19.

Sinabi ni PGH Spokesperson Dr. Jonas Del Rosario, mayroon silang halos 320 COVID beds para sa mga pasyenteng may COVID-19 kung saan, 310 ang mga pasyente ngayon sa ospital, at halos 40 na mga pasyente ang nasa emergency room na naghihintay na makapasok.

Bukod dito, mayroon pang halos 200 pasyente na  naghihintay na ma-admit sa PGH.

Imposible na rin aniyang ma-admit ang mga pasyenteng nasa waitlist, lalo’t kulang na rin sila sa mga doktor. –-sa panulat ni Hyacinth Ludivico

Pumalo na sa 38,746,501 doses ng bakuna kontra COVID-19 ang naiturok na sa buong bansa.

Ayon sa National Task Force Against COVID-19, 21,951,956 nakatanggap ng unang dose ng bakuna habang 16,794,545 naman ang nakakumpleto na ng dalawang dose ng COVID-19 vaccine.

Habang aabot na sa 415,362 doses kada araw ang average na bilang ng mga bakunang naituturok sa Pilipinas sa nakalipas na pitong araw.

Sinabi naman ni Vaccine Czar at NTF Chief Implementer Sec. Carlito Galvez Jr., na mas marami pang suplay ng Pfizer, Moderna, at Astrazeneca vaccines ang dadating sa bansa sa mga susunod na buwan. —sa panulat ni Hyacinth Ludivico

Umakyat na sa 23,115 ang kabuuang bilang ng mga Pilipino sa abroad na nagpositibo sa COVID-19 matapos itong madagdagan ng 79.

Sa inilabas na datos ng Department of Foreign Affairs (DFA), 113 ang bilang ng mga bagong gumaling dahilan para umabot sa 13,328 ang total recoveries.

Anim naman ang nadagdag sa bilang ng mga nasawi kung kaya’t umakyat na sa 1,383 ang kabuuang bilang ng mga nasawi sa nasabing sakit.

Sa ngayon, mayroong 8,405 pasyente na nagpapagaling pa sa COVID-19.

Ayon sa DFA, mula sa 103 na mga bansa at teritoryo ang mga Pilipino na nagpositibo sa COVID-19. —sa panulat ni Hyacinth Ludivico

Walang financial assistance na ibibigay sa mga lugar na isasailalim sa granular lockdown sa oras na magsimula ang pilot implementation ng COVID-19 alert level system sa Metro Manila.

Ito ang inihayag ni Interior Undersecretary Epimaco Densing dahil food packs aniya ang napagdesisyunang ipamahagi sa mga apektadong residente.

Sinabi pa ni Densing na ang 50% ng suplay ng food packs ay sasagutin ng gobyerno para makatulong sa mga lokal na pamahalaan. —sa panulat ni Hyacinth Ludivico