HEADLINES

Nanatili pa ring pinakadelikadong bansa sa Asya ang Pilipinas para sa mga indibidwal na nais protektahan ang kalikasan.

Batay sa ulat ng global witness, noong nakaraang taon ay umabot sa 29 ang nasawi sa bansa dahil sa kanilang pagprotekta sa kalikasan.

Muli namang nanguna sa buong mundo ang Columbia na mayroong 65 na land and environmental defenders na nasawi.

Sinundan naman ito ng Mexico, Brazil, Honduras, Democratic Republic of Congo, Guatemala, Nicaragua, Peru, India at Indonesia.

Ayon sa global witness, 70% ng mga biktima ay namatay dahil sa iligal na gawain sa kalikasan gaya ng deforestation, industrial development at pagprotekta sa mga ilog, coastal areas at karagatan. —sa panulat ni Hyacinth Ludivico

Nagbabala ang Food and Drug Administration (FDA) sa publiko laban sa paggamit ng nasal spray products na sinasabing epektibo umano bilang pangontra sa COVID-19.

Sa isang pahayag, sinabi ni FDA Director-General Eric Domingo na awtorisado lamang itong gamitin bilang medical device para sa panandaliang paggamit sa nasal cavity at bilang mechanical barriers mula sa mga particulate gaya ng alikabok o usok.

Aniya, ang mga nasabing produkto ay walang aktibong pharmaceutical ingredients na direktang nakagagamot, nakaaalis o nakaiiwas sa mga sakit.

Hinimok naman ng FDA ang publiko na maging mas maingat sa paggamit ng mga produkto na umanoy panlaban sa COVID-19. —sa panulat ni Hyacinth Ludivico

Hindi patas para sa mga hindi bakunadong indibidwal at hindi makakatulong ang panukalang bakuna bubble sa pagbangon ng ekonomiya.

Ito ayon kay Employers Confederation of the Philippines (ECOP) President Sergio Ortiz-Luis Jr, dahil aniya bukod sa diskriminasyon ito sa mga hindi pa bakunado ay dagdag na gastos lamang ito lalo na sa mga maliliiit na negosyo na kakailanganin pang kumuha ng karagdagang tauhan para tumingin sa mga vaccination card ng kanilang mga kustomer.

Sinabi naman ni Philippine Chamber of Commerce and Industry (PCCI) Acting President Edgardo Lacson na maraming mga kustomer ang hindi pa rin maaaring lumabas dahil prayoridad ng gobyerno sa pagbabakuna ay ang mga senior citizen at may comorbidity.

Paliwanag pa ni Lacson, paguguluhin lang ng diskriminasyon laban sa hindi bakunado ang maagang pagbubukas ng ekonomiya dahil kahit fully vaccinated na ang buong populasyon ay imposible pa ring makamit ang herd immunity ayon na rin sa mga eksperto.

Ayon naman kay Philexport Chairman George Barcelon, maliban sa malawakang pagbabakuna ay dapat na magkaroon ng iba pang mga hakbang lalo pa’t naaantala ang pagkakaroon ng population protection dahil sa limitadong suplay ng mga bakuna. —sa panulat ni Hyacinth Ludivico

Aabot sa P11.69 bilyon na taripa ang nakolekta ng Bureau Of Customs o BOC mula sa 1.74 milyon metric tons ng rice imports mula Enero hanggang Agosto ngayong taon.

Mas mataas na ito ng 17% sa minimum funding requirement para sa annual Rice Competitiveness Enhancement Fund (RCEF) para sa susunod na taon.

Sinabi ni Customs Commissioner Rey Leonardo Guerrero na ang revenues na nakuha mula enero hanggang Agosto 29, 2021 ay bumaba ng 4.4%, nagmula sa shipments na may kabuuang halaga na P35.07 bilyon.

Sinabi pa ni Guerrero  na sa improved valuation system ng BOC ay tumaas din ang average value ng rice imports ng 4.1% sa P20,188 per metric tons sa naturang panahon mula sa P19,386 per mt sa kaparehong panahon noong nakalipas na taon.—sa panulat ni Hyacinth Ludivico

Isang grade 10 student ang patay matapos umanong sumailalim sa hazing sa bayan ng San Enrique, Negros Occidental.

Setyembre 3 nang magtungo ang 18 anyos na biktima sa birthday ng isang kaibigan kung saan nagkaroon ng inuman.

Ayon kay Lt. Sammy Gasataya, Deputy Police Chief ng San Enrique Municipal Police Station, sinundo ang binatilyo ng tatlong lalaki pero puro pasa at bukol na pagbalik nito ng bahay kinabukasan.

Gayunman, nitong Setyembre 8 ay nilagnat at kalauna’y bumigay na ang katawan ng biktima dahilan ng pagkamatay nito.

Kinumpirma anya ng mga magulang ng lalaki na ini-recruit ito ng isang fraternity nitong Marso pero hindi muna sumailalim sa initiation o hazing dahil 17 anyos pa lamang ito noon.

Naaresto naman ang tatlong suspek subalit itinanggi nila ang alegasyon habang narekober ang paddle na ginamit sa initiation mula sa bahay ng isa sa mga lalaki.  —sa panulat ni Drew Nacino

Wala pa umanong planong magretiro si Senador Manny Pacquiao sa boxing sa kabila ng pagkatalo nito kay Yordenis Ugas ng Cuba.

Ayon sa isang miyembro ng team Pacquiao, gusto ni Pacman na gawin ang kanyang farewell fight sa Pilipinas sa Disyembre o Enero sa Philippine Arena, Bulacan.

Gayunman, maaaring sa US o Middle East ilipat ang laban kung patuloy ang pagdami ng kaso ng COVID-19 sa Pilipinas.

Bukod sa posibleng rematch, kabilang din umano sa mga pwedeng makasagupa ng pambansang kamao si Ryan Garcia o Saul Canelo Alvarez para sa kanyang huling laban.

Nais din ng fans na labanan ng people’s champ si Josh Taylor ng Scotland na may record na 18-0 at naging 2012 Olympian at kasalukuyang may hawak ng WBC, WBO, WBA Super at IBF Super lightweight Titles.