HEADLINES

Halos anim na milyong taga-NCR ang nakakumpleto na ng bakuna kontra COVID-19.

Ito ang inihayag ni MMDA Chairman Benhur Abalos sa pagdinig sa Senado kaugnay sa vaccine passport.

Ayon kay Abalos, sa huling tala hanggang noong Setyembre 12, nasa 5.930 milyon na ang fully vaccinated sa Metro Manila o 60.50% ng kabuuang 9.8 milyon na target population.

Nasa 8.4 million o 85.73% na anya ang naka-first dose.

Aabot naman sa 88.5% ang projection ng fully vaccinated individual pagdating ng Disyembre 12. —sa panulat ni Drew Nacino

Umabot sa 52% ang voter turnout ang naitala ng COMELEC sa kanilang overseas internet voting test run.

Kabuuang 669 qualified test voter ang nakarehistro sa aktibidad kung saang mayroong 348 actual voters para sa 52% voter turnout.

Ginanap ang unang test run para sa overseas internet voting simula Setyembre 11 hanggang kahapon gamit ang voting system ng voatz.

Umaasa naman si COMELEC – Office For Overseas voting Director Sonia Bea Wee-Lozada na ganito rin ang magiging resulta sa May 2022 national elections.

Naniniwala si Lozada na mahusay at komportable ang ganitong paraan ng pagboto dahil hindi matakaw sa oras kumpara sa tradisyunal na botohan.—sa panulat ni Drew Nacino

Nakatambak lamang umano sa isang government hospital sa Lucena City, Quezon Province ang mga bangkay ng mga nasawi sa COVID-19 na malapit nang maagnas.

Sa mga larawang ipinadala ng isang impormante, ang mga bangkay na nagsisimula na umanong mabulok ay nakasilid sa mga body bags at iniwan sa ground floor ng Annex building ng Quezon Medical Center.

Matatagpuan din sa ground floor ang silid na ginagamit para sa CT scan, 2D echo at blood bank kaya’t nangangamba na ang ilang empleyado at iba pang COVID-19 patient.

Inirereklamo na ng mga empleyado at pasyente ang anila’y umaalingasaw na amoy ng mga bangkay na matagal ng naka-tengga sa pasilyo ng ospital.

Nagpatawag na ng pulong si Governor Danilo Suarez kaugnay ng sitwasyon sa ospital pero wala pang malinaw at kongkretong solusyon na nailatag.

Sa DILG-DOH Joint Memorandum Circular 1 series of 2020, hindi maaaring patagalin ng higit labing-dalawang oras ang labi ng pumanaw sa COVID-19 bago sunugin o i-cremate dahil sa lubos itong nakapanghahawa.—sa panulat ni Drew Nacino

Wala pang pinal na rekomendasyon ang mga eksperto maging ang Department Of Health sa pagtuturok ng COVID-19 booster shots.

Ito ang nilinaw ng DOH matapos ang ulat na inaprubahan na ng National Immunization Technology Advisory Group o NITAG ang booster shots para sa health care workers at maari nang ibigay sa katapusan ng Oktubre o Nobyembre.

Ayon kay Health Undersecretary Maria Rosario Vergeire, ang DOH all expert group kasama ang kagawaran ay maingat na pinag-uusapan ang issue.

Bagaman may rekomendasyon na ang vaccine expert panel,wala pa anyang approval at rekomendasyon mula sa NITAG at tatalakayin pa ito ng AEG bago magpasya ang DOH.—sa panulat ni Drew Nacino

Lumiliit na ang tsansa na magkaroon ng sapat na supply ng COVID-19 vaccine para sa mga mahirap na bansa.

Aminado ang UN – World Health Organization na numinipis na ang stock ng bakuna sa COVAX facility nila sa US dahil sa pagbabawas ng supply ng mga bansang contributor.

Sa halip na makapagdeliver ng 1.9 bilyon doses ng bakuna ngayong taon, maaari umanong hanggang 1.4 bilyon lamang taliwas sa rekomendasyon ng mga health expert na kailangan ang 11 billion dose upang makontrol ang pandemya.

Sa ngayon, nasa 254 milyon dose pa lang ang nadedeliver ng COVAX facility kumpara sa plano nitong 785 milyon doses.

Ilan pa sa mga dahilan ang paghakot ng mayayamang bansa ng mahigit 80% ng suplay ng bakuna at pinaghahati-hatian na lang ng mga mahihirap na bansa ang natitira.

Isa rin umanong dahilan ang pagpigil ng Indian government sa pagluluwas ng kanilang bakuna tulad ng Astrazeneca o COVID shield na gawa ng Serum Institute of India at pamimigay ng booster shot sa mga mayamang bansa.—sa panulat ni Hyacinth Ludivico

Nagbabala ang Food and Drug Administration o FDA sa publiko laban sa paggamit ng nasal spray products na sinasabing epektibo umano bilang pangontra sa COVID-19.

Sa isang pahayag, sinabi ni FDA Director-General Eric Domingo na awtorisado lamang itong gamitin bilang medical device para sa panandaliang paggamit sa nasal cavity at bilang mechanical barriers mula sa mga particulate gaya ng alikabok o usok.

Aniya, ang mga nasabing produkto ay walang aktibong pharmaceutical ingredients na direktang nakagagamot, nakaaalis o nakaiiwas sa mga sakit.

Hinimok naman ng FDA ang publiko na maging mas maingat sa paggamit ng mga produkto na umanoy panlaban sa COVID-19.—sa panulat ni Hyacinth Ludivico

Hindi patas para sa mga hindi bakunadong indidwal at hindi makakatulong ang panukalang bakuna bubble sa pag-ahon ng ekonomiya.

Ito ayon kay Employers Confederation of the Philippines o ECOP President Sergio Ortiz-Luis Jr.  dahil aniya bukod sa diskriminasyon ito sa mga hindi pa bakunado ay dagdag na gastos lamang ito lalo na sa mga maliliiit na negosyo na kakailanganin pang kumuha ng karagdagang tauhan para tumingin sa mga vaccination card ng kanilang mga kustomer.

Sinabi naman ni Philippine Chamber of Commerce and Industry o PCCI Acting President Edgardo Lacson na maraming mga kustomer ang hindi pa rin maaaring lumabas dahil prayoridad ng gobyerno sa pagbabakuna ay ang mga senior citizen at may comorbidity.

Paliwanag pa ni Lacson, paguguluhin lang ng diskriminasyon laban sa hindi bakunado ang maagang pagbubukas ng ekonomiya dahil kahit fully vaccinated na ang buong populasyon ay imposible pa ring makamit ang herd immunity ayon na rin sa mga eksperto.

Ayon naman kay Philexport Chairman George Barcelon, maliban sa malawakang pagbabakuna ay dapat na magkaroon ng iba pang mga hakbang lalo pa’t naaantala ang pagkakaroon ng population protection dahil sa limitadong suplay ng mga bakuna.—sa panulat ni Hyacinth Ludivico

Tiniyak ng gobyerno na health care workers ang unang makatatanggap ng booster shot bilang dagdag proteksyon kontra COVID-19.

Ayon kay Vaccine Czar, Secretary Carlito Galvez, sisimulan ng administrasyon ang pamamahagi ng booster shots sa sandaling makapagtala ng sapat na bilang ng mga residenteng fully vaccinated o nakatanggap ng kanilang unang dose.

Sa sandali anya makamit ang ninanais na bilang, maaari ng maturukan ang medical frontliners at iba pang healthcare workers bago matapos ang taon o sa unang quarter ng 2022.

Idinagdag pa ni Galvez na hindi dapat mangamba ang mga healthcare worker dahil sa oras na magpasya ang Department Of Health at World Health Organization na simulan ang pagtuturok ng booster shot ay may sapat na bakuna para sa kanila. —sa panulat ni Drew Nacino