HEADLINES

Maaaring ihabla ang taong nagkalat ng viral video ni Presidential Spokesman Harry Roque na nagpapakita ng kanyang galit sa grupo ng mga doktor at email ng kanya umanong pag-a-apply sa United Nations.

Ayon kay Roque, maaaring makasuhan ang taong nagkalat ng sensitibong video at dokumento alinsunod sa data privacy law.

Posibleng rin anyang panagutin ang sinumang nag-leak ng impormasyon sa ilalim ng anti-wiretapping act.

Sa tingin ko po liable , liable din po for revealing public secrets pero hahayaan ko na po iyan sa IATF. Iyan naman po ay napag-usapan sa IATF,”pahayag ni Presidential Spokesman Harry Roque.—sa panulat ni Drew Nacino

Aminado ang Department of Environment and Natural Resources na naghahanap na sila ng P43 bilyon para sa rehabilitasyon ng Manila bay.

Sa house budget hearing, inihayag ni DENR Undersecretary Jonas Leones na nasa P3 bilyon na ang nailaan sa proyekto simula noong 2019.

Ayon kay Leones, gagamitin ang pondo sa iba’t ibang proyekto sa Manila bay partikular na ang relokasyon sa mga residente at pagpapanumbalik sa kalidad ng tubig.

Para naman sa susunod na taon 2022, inilatag ng DENR ang nasa P1 bilyon sa rehabilitasyon ng Manila bay.—sa panulat ni Drew Nacino

Pagtutuunan ng pansin ng Philippine Genome Center o PGC ang pagtukoy sa COVID-19 variants sa pamamagitan ng pagbabawas ng ahensya sa kanilang COVID-19 testing.

Ayon sa Department Of Health, mula sa 150 hanggang 200 swab tests, lilimitahan nila ito sa 50 tests kada araw na tutulong sa buong genome sequencing ng PGC.

Mula naman sa 750 tests na pinoproseso kada linggo, makapag-sasagawa na ng 1,500 genome sequencing ang PGC sa mga susunod na araw.

Bahagyang umayos ang genome sequencing sa bansa makaraang maglaan ng P295.7 milyon alokasyon ang pamahalaan upang mas matukoy pa ang COVID-19 variants.

Dahil sa pondo, matutukoy na ng Visayas at Mindanao ang variant ng COVID na tatama sa isang pasyente.—sa panulat ni Drew Nacino

Binalaan ng Securities and Exchange Commission (SEC) ang publiko sa pagsali sa mga “play-to-earn” gaming platform at crypto platforms na hindi lisensyado sa Pilipinas.

Ayon sa SEC, nakatanggap umano sila ng ilang tanong hinggil sa magiging problema sa transakyon sa ilang foreign corporations na may mga produktong nasa bansa pero hindi naman rehistrado.

May posibilidad umanong hindi mabawi ng mga gamer ang kanilang pera sakaling i-transmit na ito sa labas ng bansa lalo’t kung ang entity o aktibidad ay hindi lisensyado o rehistrado at nasa ibayong dagat.

Kabilang sa mga tinukoy ng SEC na unregistered online platforms sa bansa ang foreign currency brokers and exchanges; decentralized finance investment platforms; binary options trading applications; mga pay-to-click o captcha websites at play-to-earn gaming’ platforms.

Tiniiyak naman ng ahensya na kung magkaroon ng implikasyon sa pagitan ng mga unregistered foreign entity ay maaari pa ring magpasaklolo ang mga Pilipino sa mga otoridad sa bansa.—sa panulat ni Drew Nacino

Sumuko na ang driver ng truck na responsable sa pagkamatay ng dalawang babae at pagkasugat ng dalawang lalaki na pawang sakay ng kotse na kanyang binangga sa Pasig City.

Kinilala ang suspek na si Espanto Simplicio, 42 anyos, residente ng Capaco Compound, Felix Avenue, Cainta Rizal.

Ayon sa Pasig City Police, dakong ala-6 kagabi nang sumuko sa kanilang tanggapn si Simplicio at magbigay ng kanyang pahayag.

Aminado ang driver na nahagip ng likurang bahagi ng truck ang harapan ng kotse subalit dahil sa takot ay tumakas siya.

Pasado alas-2 kahapon ng madaling araw nang maganap ang aksidente sa C-5 flyover northbound sa Barangay Ugong pasado.

Lulan ng kulay orange Mitsubishi Mirage Sedan na may plakang DOO-8200 ang mga biktimang sina Ayazeh Esgrina, 36 anyos, Mary Ann Galit 26 anyos, Mal Abdul, 30 anyos at driver na si Jesus Ilagan Canaleta Jr, 30 anyos at kapwa nakatira sa Concepcion Uno, Marikina City.

Binabagtas ng dalawang sasakyan ang C5 road flyover patungong Norte nang mahagip ng truck ang kotse at makalakad pa ito.

Sa lakas ng hampas ay nawasak ang kanang bahagi ng mirage at naipit sina Esgrina at galit na nasa kanang bahagi ng sasakyan na sanhi ng kanilang kamatayan habang itinakbo sa magkahiwalay na ospital sina Canaleta at Abdul na nagtamo ng mga pinsala sa iba’t ibang bahagi ng katawan.—sa panulat ni Drew Nacino

Tinatayang P3.5 milyon na halaga ng shabu mula sa dalawang natimbog na babaeng suspek sa Minalin, Pampanga.

Kinilala ni Col. Arnold Thomas Ibay, Pampanga Police Provincial Office Director kinilala ang mga suspek na sina Jinky De Dios, 37 anyos at Julie Ann Besa, 42 anyos at kapwa residente ng Barangay Sta. Trinidad, Angeles City.

Ayon kay Ibay, isa si De Dios sa mga high value individual sa kalakalan ng iligal na droga sa Central Luzon.

May bigat na kalahating kilo ang nasabat na shabu na isinilid sa 13 pakete.

Mahaharap naman ang dalawa sa kasong paglabag sa Republic Act 9165 o Comprehensive Dangerous Drugs Act Of 2002.—sa panulat ni Drew Nacino

Isang tauhan ng Philippine Coast Guard ang natagpuang patay sa loob ng PCG Special Operations Force Training Center sa Barangay Talacagay, Hinoba-An, Negros Occidental.

Hindi naman pinangalanan ni Lt. Jaime Depillo, Deputy Police Chief ng Hinoba-An Municipal Police Station ang 42 anyos na biktima mula sa North Cotabato na nakatakdang magdiwang sana ng kaarawan bukas.

Batay sa imbestigasyon, natagpuan ng pamangkin ng biktima ang kanyang tiyo na walang buhay sa barracks na may katabing M16 rifle.

Ayon kay Depillo, maytama ng bala sa ulo ang hindi PCG personnel.

Wala pang kumpirmasyon sa tunay na dahilan ng pagkamatay ng biktimapero tinitingnang anggulo ang posibleng ‘accidental firing at foul play.—sa panulat ni Drew Nacino

Umapela ang isang International initiative na nag-iimbestiga sa human rights abuses sa Pilipinas na itigil ang malawakang militarisasyon ng pamahalaan,walong buwan bago ang eleksyon.

Ito, ayon sa Independent International Commission of Investigation into Human Rights Violations in the Philippines o Investigate Ph, ay upang matiyak na ligtas at malinis ang halalan para sa lahat.

Ayon kay Australian Greens Senator Janet Rice, High Commissioner ng investigate Ph, mahalagang magkaroon ng International Election Observer Missions sa mismong panahon ng kampanya, araw ng halalan at bilangan ng boto.

Ang nabanggit na rekomendasyon ay bahagi ng ikatlo at huling report ng investigate Ph sa human rights situation ng bansa.

Isusumite ito sa International Criminal Court ngayong buwan bilang suporta sa kanilang full investigation sa pinaniniwalaang “crimes against humanity” ni Pangulong Rodrigo Duterte kaugnay sa “war on drugs”.—sa panulat ni Drew Nacino

Nakapagtala ang Department Of Health ng 20,745 na bagong kaso ng COVID-19 ngayong araw kung kaya’t sumampa na sa 2,248,071 ang kabuuang bilang ng nagkakasakit sa bansa.

Sa datos ng DOH, umabot na sa 180,290 ang active cases, nasa 22,290 ang gumaling kahapon kaya’t tumaas sa 2,032,471 ang total recoveries.

Nasa 163 naman ang namataydahilan upang umakyat sa 35,307 ang total death toll.

Batay sa pinakabagong ulat ng DOH, UP Philippine Genome Center at UP National Institutes of Health, sumampa na sa 2,708 katao ang tinamaan ng mas nakahahawang delta variant sa isinasagawang genome sequencing.

Ito’y makaraang pumalo sa 640 cases ang nadagdag sa talaan ng pamahalaan kahapon.  —sa panulat ni Drew Nacino