HEADLINES

Namahagi ng new normal education package ang pamahalaang lungsod ng Taguig sa mga estudyante’t guro sa mga pampublikong paaralan ngayong nagsimula na ang school year 2021-2022.

Ayon kay Taguig City Education Office Chief Dr. George Tizon, nasa mahigit 134,000 mga mag-aaral ang naka-enroll sa kanila para sa taong ito.

Tumanggap sila ng iba’t ibang kagamitan tulad ng P.E. uniform, school bag, school uniform, kapote, modules, school supplies, emergency bag at emergency kit.

Maliban dito, tumanggap din ng anti COVID-19 kits at personal protective equipment o PPE’s ang nasa 5,000 guro upang maging pananggalang nila sa banta ng iba’t ibang variant ng virus.

Una nang ipinagmalaking pamahalaang lungsod na nakamit na nila ang herd immunity matapos makapagturok ng may isang milyong bakuna sa mga residente nito.

Pinagsabihan ni Senate Minority Leader Franklin Drilon si dating Budget Usec. Christopher Lloyd Lao.

Ito’y dahil sa mga aroganteng sagot ni Lao sa nagpapatuloy na pagdinig ng Senate Blue Ribbon Committee ngayong araw.

Pinuna rin ng mga senador ang pagkambyo ni Lao sa naunang pahayag nito na walang due diligence sa pagbibigay ng kontrata sa pharmally para sa pagbili ng medical supplies.

Binulatlat din ni Drilon ang mga nakita niyang milyun-milyong pisong halaga ng purchase order na pirmado ni Lao subalit hindi nakasama sa report ng Commission on Audit.

Dahil dito, hiniling ni Drilon na ipa-subpoena ang mga naturang dokumento para mabusisi ng senado.

May panibagong taas presyo sa kanilang mga produktong petrolyo ang mga kumpaniya ng langis simula bukas, Setyembre 14.

Ayon sa mga kumpaniyang Caltex, Shell, Petro Gazz at Seaoil, magdaragdag sila ng P0.35 sa kada litro ng diesel habang P0.40 naman sa gasoline.

Habang ang kumpaniyang CleanFuel naman ay nasa P0.30 lamang ang umento sa kada litro ng kanilang gasoline.

P0.15 naman ang umento ng mga kumpaniyang Caltex, Seaoil at Shell sa kanilang kerosene.

Unang magpapatupad ng umento ang Caltex 12:01 ng hatinggabi bukas, 6 ng umaga naman ang Total, Petro Gazz, Shell at Seaoil habang 4:01 naman ang CleanFuel.

Welcome kay Vice President Leni Robredo ang inirekumendang dagdag pondo ng mga mambabatas para sa kaniyang tanggapan.

Ito’y makaraang dagdagan ng kamara ang pondo para sa Office of the Vice President ng aabot sa P713.41 milyon para sa 2022.

Ayon kay Robredo, makatutulong aniya ang dagdag pondo para suportahan ang mga medical frontliners at iba pang pasilidad na nangangailangan ng PPEs at iba pa.

Bagama’t nagpapasalamat, sinabi ni Robredo na tila nasanay na siya sa maliit na pondo na ibinibigay sa kaniya mula nang maupo siya sa puwesto nuong 2016.

Kaya naman, walang nakikitang balakid ang pangalawang Pangulo sa maliit na pondo para hindi nito maipagpatuloy ang serbisyo sa publiko.

Pumalo na sa 2,708 ang kabuuang bilang ng mga naitatalang kaso ng Delta variant ng COVID-19 sa bansa.

Ito’y ayon sa Department of Health (DOH) ay matapos madagdagan ito ng 640 na bagong kaso sa nakalipas na magdamag.

Mula sa nasabing bilang ay 584 dito ang mga local cases habang nasa 52 naman ang nagmula sa returning Overseas Filipino Worker  (OFWs).

Sa mga lokal na kaso, sinabi ng DOH na 112 dito ang mula sa National Capital Region, 52 mula sa Cagayan Valley habang 49 naman ang nagmula sa Calabarzon.

May dalawang kaso rin ng Delta variant ang naitalang naka-address sa Bangsamoro Autonomous Region In Muslim Mindanao (BARMM)

Umakyat na sa mahigit 289,000 ang bilang ng mga lumalabag sa quarantine protocols ngayong nakapailalim pa rin ang Metro Manila sa Modified Enhanced Community Quarantine (MECQ).

Ito’y batay sa datos ng Joint Task Force COVID-19 shield ng Philippine National Police (PNP) mula Agosto 21 hanggang Setyembre 12.

Mula sa naturang bilang, nasa mahigit 174,000 ang nasita, 99,000 naman ang pinagmulta habang 15,000 naman ang iba pang lumabag.

Una rito ayon kay PNP Chief P/Gen. Guillermo Eleazar, nagbigay direktiba na siya sa mga pulis sa Metro Manila na pag-aralan ang ipatutupad na bagong quarantine classifications upang maiwasan ang kalituhan.

Muling haharap sa publiko si Pangulong Rodrigo Duterte ganap na 8:30 mamayang gabi.

Gayunman, tumangging magdetalye hinggil dito si Presidential Spokesman Harry Roque partikular sa lalamanin ng talk to the people ng Pangulo.

Magugunitang sa pinakahuling pagharap ng Pangulo nuong isang linggo, isa-isang binanatan ng Pangulo ang mga senador sa nagpapatuloy na senate inquiry.

Pero sa pagkakataong ito, walang maisagot si Roque kung ano ang magiging paksa ng ulat sa bayan ng Pangulo at kung kabilang ba rito kung kailan sisimulan ang bagong quarantine classifications na sisimulan sa Metro Manila.

Kilos protesta rin ang isinalubong ng mga magulang ng mga batang mag-aaral sa Pres. Corazon Aquino Elementary School sa Quezon City ngayong unang araw ng klase.

Suot ang school uniform, ipinanawagan ng mga magulang na miyembro ng grupong Gabriela sa pamahalaan na tugunan ang problema ng mga magulang at mag-aaral sa distance learning.

Anila, hirap na ang mga magulang sa napaka-gastos na sistema ng pag-aaral sa ilalim ng distance learning na maaari pang mailaan sana sa mas mahalagang bagay.

Subalit hindi naman masagot ng grupo kung sakaling magkahawaan ng COVID-19 ang mga mag-aaral sa eskuwelahan sakaling ibalik na ang face-to-face classes sa bansa.

Sinalubong ng kilos protesta mula sa mga guro at mag-aaral ang unang araw ng klase sa mga paaralan sa ilalim pa rin ng distance learning system ngayong araw.

Halos ilang oras lamang ang pagitan ng mga isinagawang kilos protesta ng Alliance of Concerned Teachers (ACT) at ng Student Christian Movement of the Philippines sa makasaysayang Mendiola sa Maynila.

Ayon kay Ruby Bernardo ng Act-National Capital Region Chapter, sigaw nila ang isang ligtas na paaralan, benepisyo at dagdag na proteksyon para sa mga public school teacher sa gitna ng COVID-19 pandemic.

Sa panig naman ni Kej Andres, National President Ng Student Christian Movement, mariin nilang kinondena ang sistema ng  distance learning dahil wala naman anilang nakukuhang suporta ito mula sa pamahalaan.

Umakyat na sa 81,048 na pamilya o katumbas ng 313,373 indibiduwal ang naapektuhan ng pananalasa ng Bagyong Jolina.

Ayon kay National Disaster Risk Reduction and Managemen Council Spokesman Mark Timbal, nagmula sa Central Luzon, Calabarzon, Mimaropa, Bicol, Eastern At Western Visayas, Soccsksargen at Metro Manila ang mga apektado ng bagyo

Nananatili naman sa 17 ang bilang ng mga nasawi, 24 naman ang sugatan habang pito pa ang nawawala.

Nasa mahigit P665 milyon ang naitalang pinsala sa sektor ng agrikultura habang papalo naman sa mahigit P63 milyon naman sa imprastraktura.

8,924 na mga kabahayan ang nasira dahil po dito kay Jolina diyan po sa Calabarzon, Mimaropa, Region V, VI at VIII. Pinaka marami pong nasirang mga kabahayan diyan po sa Region VIII, yung unang sumalubong kay Typhoon Jolina.

Ang tinig ni NDRRMC Spokesman Mark Timbal sa panayam ng DWIZ…